“Ko ʻEku ʻOhovale Lahi ʻi he FSY,” Ki Hono Fakamālohia ʻo e Toʻu Tupú, Fēpueli 2022.
Ko ʻEku ʻOhovale Lahi ʻi he FSY
ʻE fakamālohia fēfē hoʻo fakamoʻoní ʻe ha ʻaho ʻe nima ʻo e hulohulá, vaʻingá, mo e ngaahi ʻekitivitī kehé?
ʻOku lahi e ngaahi fakatahaʻanga ʻa e Siasí ʻokú ma ʻalu ki ai, pea ko ha fakatahaʻanga ʻe taha naʻá ku ʻalu ki ai ʻi he ngaahi taʻu siʻi kuohilí naʻe ongo mālohi ia kiate au. Ko ha houalotu fakamoʻoni ia ʻi ha uooti ʻi Pāselona ʻi Sipeini.
Ne u ʻohovale ʻi hono vahevahe ʻe ha toʻu tupu ʻe toko 10 nai ʻa ʻenau fakamoʻoní hili ha konifelenisi FSY ne nau kau ki ai. Ko e meʻa naʻe ongo taha kiate aú ko ʻenau vahevahe kotoa ha fakamoʻoni haohaoa mo mālohi ki he Fakamoʻui ko Sīsū Kalaisí, ko ʻEne feilaulau fakaleleí, pea mo ʻEne ʻofa kiate kitautolu kotoá. Naʻá ku ofo ʻi he hili ha ʻaho ʻe nima ʻo e ngaahi ʻekitivitī fiefia mo e toʻu tupu kehé, meʻakaí, vaʻingá, mo e ngaahi hulohulá, ko e meʻa ne nau maʻú ko e fiefia ne nau maʻu ʻi he Fakamoʻuí. Naʻá ku fifili ai pe ko e hā nai hono ʻuhingá.
Kimui angé, naʻá ku hiki ki Palāsila. Naʻá ku ʻilo ai naʻe teuteu ʻa e kau taki ʻi he feituʻu ko iá ki ha konifelenisi FSY. ʻI heʻeku hoko ko e Fitungofulu Fakaʻēliá, naʻe fakaafeʻi au ke u tokoni ʻi hono fokotuʻutuʻu ʻo e konifelenisí pea kau fakataha mo e toʻu tupú ʻi he foʻi ʻaho kotoa ʻe nimá.
Kimuʻa peá u mavahé, naʻe kole mai ʻe he Kau Palesitenisī Fakaʻēliá ke u teuteu ke fai ha lipooti ki heʻeku aʻusia ʻi he FSY he taimi te u foki mai aí. Naʻá ku ʻalu mo hoku uaifí ki he konifelenisí, pea ʻi he ʻuluaki ʻaho ʻe tolú naʻá ma fiefia ʻi he ngaahi ʻekitivitī naʻe fokotuʻutuʻú, ʻo kau ai e ako folofola pongipongí, ngaahi fakataha lotú, ngaahi kalasí, ngaahi ʻekitivitī ʻi tuʻá, meʻakai leleí, efiafi fakafāmilí, mo e ʻū hulohulá. Ne fakahoko lelei ʻa e meʻa kotoa pē, pea ne u ongoʻi kuo feʻunga e meʻa kuó u aʻusiá ke fakakakato ʻaki ʻeku lipōtí.
ʻI he efiafi hono hokó, naʻe fai ai haʻamau polokalama mūsika fakaʻofoʻofa mo ongo moʻoni ki he lotó. Naʻe mātuʻaki makehe ʻaupito ʻa e Laumālié ʻo aʻu ʻo talamai ai ʻe he tokotaha ʻoku haʻana ʻa e feituʻu faiʻanga konifelenisí, ʻa ia ʻoku ʻikai ko ha mēmipa ʻo e Siasí, te ne saiʻia ʻaupito ke talitali ʻemau kulupú ki he FSY ʻi he taʻu kotoa pē.
Hili e polokalama mūsiká, naʻe fakataha mai ʻa e toʻu tupú ki heʻenau ngaahi kulupú ke vahevahe ʻenau fakamoʻoní. Naʻá ku ʻalu mo hoku uaifí ki he kulupu takitaha ʻo fanongo ki ha ngaahi fakamoʻoni ne ongo moʻoni ki he lotó. Ne lava ke ma tala naʻe maʻu ʻe kinautolu ne kau ʻi he konifelenisí ha ngaahi aʻusia fakalaumālie mālohi. Ne ma saiʻia ʻaupito ke fanongo ki hono fakahaaʻi tauʻatāina ʻe he toʻu tupú ʻenau ngaahi ongo fiefiá. Naʻá ma ongoʻi ʻokú ma kau ki ha konga ʻo ha fāmili fakalaumālie tokolahi. Ne mau ongoʻi e ʻofa ʻa e Fakamoʻuí kiate kimautolu kotoa.
Naʻá ku sio ki hoku uaifí peá u fehuʻi ange, “Ko e hā e meʻa ʻoku hoko hení?” Ne ʻikai ke ne lava ʻo foaki mai ha foʻi lea. Ka naʻá ma ʻiloʻi kuo aʻusia ʻe ha tokolahi ha momeniti fakalaumālie pea maʻu mo ha fakamoʻoni fakangalongataʻa ki he ʻEiki ko Sīsū Kalaisí.
Naʻá ku hū ki hoku lokí he pō ko iá ʻo tohi ha lipooti mātuʻaki kehe ʻaupito! ʻI he taʻu hono hokó, naʻá ku toe ʻalu mo hoku uaifí ki he FSY peá ma aʻusia ʻa e fiefia tatau. ʻOku mahino kiate au he taimí ni ʻa e ʻuhinga ne vahevahe ai ʻe he toʻu tupu ʻi he houalotu fakamoʻoni ko ia ʻi Sipeiní ʻa e ngaahi ongo mahuʻingamālie pehē ki he Fakamoʻuí kae ʻikai ke fakamatala e ngaahi ʻekitivitī fakalata ne nau maʻú.
Ko ʻeku fakaʻamú ke mou maʻu ha ngaahi aʻusia tatau ʻi hoʻo moʻuí, ʻo tatau ai pē pe ʻi he FSY, ʻi ho veʻe mohengá lolotonga hoʻo lotú, ʻi hoʻo lau e folofolá, pe ko e taimi ʻokú ke vahevahe ai hoʻo fakamoʻoní mo hoʻo ngaahi kaungāmeʻá.
ʻOku ou fakamoʻoni ko e ngaahi foha mo e ngaahi ʻofefine fakalaumālie kitautolu ʻo ha Tamai Hēvani ʻofa. Ne tau omi ki māmani mei Hono ʻaó, pea ʻoku tau hoko kotoa pē ko e kau mēmipa ʻo Hono fāmili fakalaumālie maʻongoʻongá. Ko hotau Tokoua lahi tahá ʻa e ʻEiki ko Sīsū Kalaisí. Ko Ia hotau ʻEikí, pea ʻe lava ke tau ako meiate Ia pea tupulaki ʻi he “potó … mo e lahí, pea … ʻofeina ʻe he ʻOtuá mo e tangatá” (Luke 2:52), ʻo hangē ko ia naʻá Ne faí.
Fakaikiikí mei he Christ and the Rich Young Ruler [Kalaisi mo e Talavou Koloaʻiá] tā ʻa Heinrich Hofmann
Ko Sīsū Kalaisi hotau Fakamoʻuí. ʻOku taʻe-fakangatangata Hono mālohí, pea ʻokú Ne mateuteu ke fakahaofi kitautolu mei ha faʻahinga tūkunga faingataʻa pē te tau ʻi ai. Ko hotau kaumeʻá Ia—ko ha kaumeʻa ʻoku ʻofa ʻiate kitautolu, ʻokú Ne ʻafioʻi kitautolu, pea kuó Ne foaki ʻEne moʻuí ke fakahaofi kitautolu. Kuo ʻEne feilaulau fakalelei maʻatautolú ʻo ʻai ke Ne lava ʻo ʻafioʻi e founga ke tokoniʻi, fakamālohia mo fakahaohaoaʻi ai kitautolú. Tau tali kotoa muʻa ʻEne fakaafe ke: “Haʻu, ʻo muimui ʻiate au” (Luke 18:22).