Kae Hā ʻEku Ngāue Fakafaifekaú?

Fai ʻe Amoako Afran-Okese

ʻI heʻeku teuteu ke ngāue fakafaifekaú, ne fakafokifā pē ʻeku fokoutua ʻi ha mahaki fakatupu vaivai ki he sinó ʻo ʻahiʻahiʻi ai ʻeku tuí.

faifekau

Tā fakatātaaʻi ʻe Emily Call

Talu mei heʻeku kei siʻí mo ʻeku fakaʻamu ke u ʻalu ʻo ngāue fakafaifekau. Ka ʻi hoku taʻu hono ua ʻi he ako māʻolungá, naʻe kamata ke u ongoʻi ʻoku ongonoa hoku vaʻé, ongo tuí, mo e ongo nimá. ʻI ha ngaahi uike siʻi pē mei ai, naʻe ʻikai ke u toe lava ʻo lue, lele, pe kaka ʻi ha sitepu.

Naʻe kamata ke fai ha ngaahi faitoʻo, ko e fakakaukau te u sai ki ai kae lava ke u foki ki he akó mo teuteu ki heʻeku ngāue fakafaifekaú. Ka naʻe fakaʻau pē ke toe kovi ange. Ne ʻikai fuoloa mei ai kuo ʻikai ke u kei lava ʻo fai ha meʻa ʻiate au pē—ne ʻikai ke u lava ʻo helu hoku ʻulú pe tuʻu ki ʻolunga ke toʻo e remote ʻo e TV.

Ne lahi e ngaahi tāpuaki lakanga fakataulaʻeiki ne fai kiate au, ka naʻe ʻikai pē ke u sai mei he mahakí. Naʻe ʻave au ki ha falemahaki ʻi ʻAkalā ʻa ia naʻe ngāue ai ha kau toketā taukei kiate au, ka naʻe ʻikai ke nau lava ʻo tala pe ko e hā koā e meʻa ʻoku hokó. Naʻe kamata ke u fakakaukau he ʻikai ke u toe lava ʻo lue, pe te u lava ʻo ngāue fakafaifekau.

Lolotonga ʻeku ʻi falemahakí, ne haʻu e palesiteni fakamisioná mo hono uaifí ke ʻaʻahi mai kiate au mo ʻeku faʻeé. Naʻá ne ʻeke mai pe te u fie ʻalu ʻo ngāue fakafaifekau. Naʻá ku talaange naʻá ku fie ʻalu, kimuʻa peá u puké. Naʻá ne pehē mai, “ʻOua te ke hohaʻa, kuo pau ke ke ngāue fakafaifekau.”

ʻI he hili pē ʻaho ne mau foki mai ai mei falemahakí, naʻá ku lolotonga tangutu mo ʻeku fineʻeikí ʻi heʻeku fanongo ki ha leʻo ʻoku pehē mai ke u tuʻu ki ʻolunga ʻo lue. Ne u ilifia naʻa faifaí peá u tō, ka naʻá ku ʻiloʻi naʻe pau ke u feinga. Naʻá ku tuʻu hake ʻiate au pē. Naʻe māmālie pē ʻeku lava ʻo manga ʻaki hoku vaʻé, ʻa ia ne fakalalahi ai ʻeku loto-falalá. Naʻe hoko atu ʻeku laká. Neongo naʻe ʻikai ke palanisi lelei ʻeku laká ʻi he kamataʻangá, ka naʻá ku ʻiloʻi ne tuʻunga ʻi heʻeku tui kia Sīsū Kalaisí mo e ngaahi tāpuaki ʻo e lakanga fakataulaʻeiki ne u maʻú, ʻa ʻeku lava he taimí ni ʻo ʻalu ʻo ngāue fakafaifekau.

Ne u foki ki he akó, pea ʻi he ʻosi pē ʻeku akó, naʻá ku fakahū leva ʻeku foomu ngāue fakafaifekaú. Naʻe maʻu hoku uiuiʻí hili ha ngaahi māhina mei ai ke u ngāue ʻi he Misiona Nigeria Lagos. Ne u maʻu ha fiefia lahi ʻi heʻeku ngāue maʻá e ʻEikí mo akoʻi e ongoongolelei kuo toe fakafoki maí ki Heʻene fānaú. Neongo kuo teʻeki fakaakeake ʻa e tokotaha kotoa pē ʻo hangē ko aú, ka ʻoku ou ʻiloʻi ʻe tāpuakiʻi ʻe he ʻEikí ha taha pē, ʻo fakatatau mo Hono finangaló, ʻi he taimi ʻoku tau tui ai kiate Iá.

ʻOku nofo ʻa e tokotaha naʻá ne faʻú ʻi Kana.