“Lavameʻa ʻi he Tōnounoú,” Ki Hono Fakamālohia ʻo e To‘u Tupú, Fēpueli 2022.
Tokoni ʻo e Moʻuí
Lavameʻa ʻi he Tōnounoú
Mahalo ʻe ʻi ai ha ngaahi taimi te ke tōnounou ai, ka ʻe ala tokoni ia ke ke tupulaki ai.
ʻŪ tā fakatātā ʻa Alyana Cazalet
Kapau te ke faʻu ha tohi fekauʻaki mo hoʻo moʻuí, ko e hā nai e hingoa ʻo e tohí? ʻE ui nai ia ko e Ko ʻEku Moʻui Haohaoa mo Lavameʻa Kakató pe Ko ʻEku Moʻui Fakaofo, ʻIkai ha Fehalākí?
Ko hono moʻoní, te ke ongoʻi taʻefiemālie ʻi he ngaahi hingoa ko iá he ʻoku ʻikai moʻoni ia. ʻOku ʻikai haohaoa hoʻo moʻuí pe hao mei he tōnounoú. ʻOku pehē foki mo haʻakú. Ko hono moʻoní, ʻoku ʻikai haohaoa ha moʻui ʻa ha taha. Ko e fehalākí mo e tōnounoú ko ha konga ia ʻo e moʻuí, ka ʻoku ʻi ai ha faikehekehe lahi ʻi he tōnounoú mo e hoko ko ha fehalākí. ʻOku ʻikai ko ha fehalaaki koe, pea ko e tōnounoú ʻoku ʻikai ko ha meʻa ia ʻoku kovi maʻu pē. Ko ha fanga kiʻi tokoni ʻeni ʻe tolu ke tokoni atu ke liliu hoʻo ngaahi tōnounoú ki ha lavameʻa.
Ko ha Faingamālie ke Lavameʻa he Kahaʻú
Ko e taimi ʻe niʻihi ʻe lava ke hoko ʻa hono fai ha tōnounoú ke te ongoʻi ai ko e ʻosi ia ʻa e māmaní. Ka ʻoku faʻa hoko ʻa e tōnounoú ko ha founga lelei ia ke te ako ai. ʻE lava ke hoko ia ko ha faingamālie ke “fakakaukau ki [hoto] ngaahi ʻaluʻangá” (Hakeai 1:5), liliu e foungá, pea toe feinga pē. ʻE tokoni ʻeni ke lelei ange ai ʻete lavameʻá he kahaʻú.
Fakaʻehiʻehi mei he Tauhele ʻo e Fakafehoanakí
ʻOku faingofua ke fakafehoanaki kitautolu ki he niʻihi kehé. ʻOku taulōfuʻu maʻu pē ʻetau mātā e ngaahi meʻa fakafiefia mo fakaʻofoʻofa ʻoku hangē ʻoku fai he tokotaha kotoa peé—tautautefito ʻi he mītia fakasōsialé. ʻE lava ke ne ʻai ke tau ongoʻi hangē ʻoku ʻikai ke tau feʻungá.
ʻOua ʻe tokanga ki he ngaahi meʻa ʻoku maʻu ʻe he kakai kehé ʻa ia ʻoku ʻikai ke te maʻú, ka ke taʻofi e fakafehoanaki kita mo e niʻihi kehé kae tokanga ki he ngaahi tāpuaki kuó te maʻú. Naʻe toe tapou mai foki ʻa ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ke tau “fetuʻutaki ʻaonga mo e niʻihi kehé pea tānaki atu e māmá ki heʻenau moʻuí.”1 Fakafiefiaʻi e ngaahi lavameʻa ʻa e niʻihi kehé pea kamata faʻu ha palani ki ha ngaahi founga te te lava ʻo fakalakalaka ai. ʻOku ola lelei ange ʻeni ʻi he tuku taha e tokangá ki he fakafehoanaki ʻete moʻuí ki he moʻui ha taha kehé.
ʻE Lava ke Fengāueʻaki Fakataha e Ngaahi Meʻa Kotoa Pē ke Ke Lelei Ai
Te tau fehangahangai kotoa pē mo e tōnounoú. ʻOku ʻi ai ha founga te tau lava ai ʻo fakaakeake mei ha tōnounou, fakaleleiʻi kitautolu, pea hoko atu ʻetau tupulakí, kae ʻikai ko ʻetau tauteaʻi kitautolu mo fakakaukau ʻoku tau taʻefeʻunga pe taʻetāú.
ʻOku akoʻi kitautolu ʻe he folofolá ke tau “fekumi faivelenga, lotu maʻu ai pē, pea loto-tui, pea ʻe fengāueʻaki fakataha ʻa e ngaahi meʻa kotoa pē koeʻuhi ko [ʻetau] leleí” (Tokāteline mo e Ngaahi Fuakava 90:24). Naʻe pehē ʻe ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku moʻoni ʻeni he ʻoku ʻafioʻi ʻe he Tamai Hēvaní mo hotau Fakamoʻui ko Sīsū Kalaisí “ʻa e founga ʻe lava ke ngāue fakataha ai ʻa e meʻa kotoa pē, pea ʻokú Na ʻafioʻi ʻa e meʻa ʻoku lelei maʻatautolú.”2 ʻOku haohaoa ʻEna ʻafioʻi mo ʻofa ʻiate kitautolú. Kapau te tau falala kiate Kinaua, ʻe lava ke poupouʻi kitautolu ʻe heʻetau tuí ke tau faifeinga pē he taimi ʻoku tau tōnounou aí.
He ʻikai lava ke tau haohaoa ʻiate kitautolu pē. ʻOku ʻia Kalaisi ʻa e haohaoá pea ʻoku maʻu ia ʻi heʻetau tui kiate Iá mo muimui kiate Iá. ʻI hoʻo fakakaukau kuó ke tōnounou pea ʻikai lava ke ke fakatonutonu iá, tafoki ki he Tamai Hēvaní mo e Fakamoʻuí pea māta e founga te Na tokoniʻi ai koe he ʻaho takitahá.