Ko e Kaveingá mo Au

ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné

Ko Hono Vahevahe ʻEku Tuí mo ʻEku Faifaleʻí

Fai ʻe Ethan Trujillo

“Te u tokoni ki hono teuteu ʻo e māmaní ki he toe hāʻele mai ʻa e Fakamoʻuí ʻaki hono fakaafeʻi e tokotaha kotoa ke haʻu kia Kalaisi pea maʻu e ngaahi tāpuaki ʻo ʻEne Fakaleleí.”

ʻīmisí

Laʻitaá ʻi he angalelei ʻa Ethan Trujillo

ʻOku ou maʻu e loto-tailiilí, ko ia ʻoku ou ʻalu ki ha faifaleʻi he uike kotoa pē. ʻI he ngaahi ʻuluaki fakatahá, naʻá ku fakaʻehiʻehi mei he talanoa ki heʻeku faifaleʻí fekauʻaki mo ʻeku tuí. Naʻe fakamamahiʻi au koeʻuhí ko ʻeku makehé, pea ne u manavasiʻi naʻá ku toe laveangofua pē.

Ka ʻi he Sānuali ʻo e taʻu kuo ʻosí, naʻe folau ʻeku tangataʻeikí mei Kalefōnia, USA, ki Niu Mekisikou, USA, ke fakanofo au ki he tuʻunga ʻo e akonakí. Kuo māvae ʻeku ongomātuʻá, pea naʻe fifili ai ʻeku faifaleʻí pe ko e hā nai ka haʻu ai ʻeku tangataʻeikí ʻi ha maile ʻe 1,000 ke ʻaʻahi mai kiate au mo hoku ngaahi tehiná ʻi ha ngaahi ʻaho siʻi pē.

Naʻá ku fakakaukau, “ʻOiauē, ko e kamatá ʻeni!” Naʻá ku fakamatalaʻi ange naʻe fakanofo au ʻe heʻeku tangataʻeikí ki he lakanga fakataulaʻeikí pea ko ha meʻa makehe ia.

Naʻe kamata ai ke u vahevahe fekauʻaki mo ʻeku tui fakalotú! Naʻe kamata ke ma talanoa tauʻatāina fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne u ʻiloʻi ai ʻoku ʻi ai hono kāinga ʻoku kau ki he Siasí. Naʻá ne talamai ʻoku tokoni ʻene fanongo ki heʻeku tuí mo e ngaahi aʻusiá ke mahino lelei ange ai kiate ia ʻa e Siasí.

ʻOku ʻikai ha talanoa fakaofo ʻo e fakauluí ʻe hoko he talanoa ko ʻení. ʻOku ʻikai fie kau ʻeku faifaleʻí ki he Siasí. Ka ʻoku mahuʻinga ia kiate au—kuo tokoni ʻeku talanoa mo ʻeku faifaleʻí ke u maʻu ai ha loto-falala ke ʻoua naʻá ku fakalongolongo ʻi he meʻa ʻoku ou tui ki aí.

Naʻá ku faʻa manavasiʻi ke talanoa fekauʻaki mo e tui fakalotú, ka ʻi he lahi ʻeku toutou fakahoko iá, ʻoku ʻikai leva ke u toe manavasiʻi. ʻOku ʻikai haʻaku toe veiveiua ʻoku ʻi ai ha ngāue ʻa e Tamai Hēvaní maʻaku ke u fai. Mahalo naʻa kehe ʻeku ngāué mei he meʻa ʻoku fai ʻe he niʻihi kehé, ka ko hai ia te ne toe lava ʻo vahevahe ʻa e ongoongoleleí mo e kakai ʻoku ou ʻiloʻí, ʻo hangē ko ʻeku faifaleʻí? Ko ʻeku ngāué ia.

Naʻe ʻomi kotoa kitautolu ki he māmaní ke tau ako mo tupulaki. Te tau lava ʻo hoko ko e founga ʻoku fakahoko ai ʻe he Tamai Hēvaní ha meʻa ʻi heʻetau ʻofa ki he niʻihi kehé mo tō e tenga ʻo e ongoongoleleí ʻi honau lotó. Ko ia ai ko e taimi kotoa pē ʻoku ou maʻu ai ha faingamālie ke ngāue fakafaifekau, ʻoku ou fakaʻaongaʻi ia he ʻoku ou ongoʻi ʻa e Laumālié ʻiate au—pea ʻoku ou fiefia he taimi kotoa pē ʻoku ou fai ai iá.

ʻOku nofo ʻa e tokotaha naʻá ne faʻú ʻi Niu Mekisikou, USA.