Ngaahi Fehuʻi mo e Talí

“‘Oku ou ongoʻi he taimi ʻe niʻihi ʻoku ʻikai mahuʻinga ha meʻa te u fai. ʻE lava fēfē ke u fai ha lelei?”

“Tui ki he ʻOtuá peá ke falala ki he meʻa te ke lavá. ʻOkú ke lelei ange koe he anga hoʻo fakakaukaú.”

ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, konifelenisi lahi ʻo ʻOkatopa 2015 (Ensign pe Liahona, Nōvema 2015, 50).

Manatuʻi

finemui

“Ko e taimi pē ʻoku ou fai ai ha faʻahinga ngāue tokoni, ʻoku ou tohi ia ʻi ha kiʻi laʻipepa pea faʻo ia ʻi ha foʻi hina. Ko e taimi kotoa pē ʻoku ou ongoʻi ai ʻoku ʻikai ke u mahuʻinga, ʻoku ou fakaava e foʻi hiná pea lau e ngaahi meʻa fakaofo kotoa pē kuó u fakahokó. ʻOku tokoni ʻeni ke u manatuʻi naʻá ku fai ha lelei ʻi he moʻui ʻa ha taha, neongo kapau ko ha kiʻi ngāue siʻisiʻi pē.

Alexandra M., 14, California, USA

Hangē ko Sīsū Kalaisí

finemui

“ʻI he ngaahi taimi ʻo e loto-veiveiuá, ʻoku ou muimui ʻi he sīpinga ʻa Sīsū Kalaisí. ʻI he taimi ʻoku tau ngāue mo tokoni ai ʻo hangē ko Kalaisí, ʻo tatau ai pē pe ʻoku siʻisiʻi fēfē, ʻoku tau fakahaaʻi ai ʻetau ʻofa kiate Ia mo e Tamai Hēvaní. ʻE hoko ʻeni ke tau maʻu ai ha nonga mo e fiefia ʻoku tuʻuloá.”

Laura V., 18, Chile

Ngāue Tokoni Faingofua

finemui

“Hokohoko atu pē hoʻo hoko ko ha tākiekina lelei ki he kakai ʻoku mou feohí. Ko hono vahevahe pē ha kiʻi pōpoaki faingofua ʻo e ongoongoleleí pe ko e fakafanongo pē ki ha tahá ʻe lava ke ongo moʻoni ia ki honau lotó pea nau fiefia ai. ʻE fiefia foki mo ʻetau Tamai Hēvaní, pea houngaʻia ʻiate kitautolu ʻi heʻetau tokoni ki Heʻene ngāué.”

Daniela M., 15, Honduras

Meʻangāue ʻi Hono Toʻukupú

talavou

“ʻOku faingataʻa ke tau sio ki hotau ʻaongá he taimi ʻe niʻihi. Ka ʻi heʻetau tā ha sīpinga ko e kau muimui ʻo Sīsū Kalaisí pea fāifeinga ke tauhi ʻetau ngaahi fuakavá, ʻe tāpuekina kitautolu ʻe he ʻEikí. Te tau hoko ko ha meʻangāue ʻi Hono toʻukupú ke aʻu ki he loto ʻo e kakai kehé. Te tau lava ʻo fai ha liliu ʻi ha taha kehe, neongo kapau he ʻikai ke tau fakatokangaʻi ʻene hokó.”

José C., 14, England

ʻOku Mahuʻinga Hoʻo Ngaahi Ngāué

finemui

“ʻOku mahuʻinga e meʻa kotoa pē ʻokú ke faí. ʻOku ou feinga hoku lelei tahá ke fai e meʻa kotoa pē ʻi he loto-lelei pea molomolomuivaʻe ʻia Kalaisi. ʻOku tatau ai pē pe ko ha talamonū ki ha kaungā vaʻinga, fakafiemālieʻi ha tuofefine pe tuongaʻane, pe fakalea ki ha kaungāʻapi, ʻe tokoni ʻa e kihiʻi ngāue kotoa pē ʻoku tau fai he māmaní ke fai ha meʻa mahuʻinga ʻi he ngāue maʻongoʻonga ʻa e ʻEikí!”

Savannah K., 14, Tennessee, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi fakaʻōfisiale ʻo ha tokāteline ʻo e Siasí.

Ko e Hā Hoʻo Fakakaukaú?

“Te u lava fēfē ʻo ongoʻi lelei ange ʻa e Laumālié ʻi he taimi ʻoku ou aʻusia foki ai ʻa e loto-hohaʻá pe tailiilí?”

ʻOmi hoʻo talí mo e laʻitaá kimuʻa he ʻaho 15 ʻo Māʻasi 2022.

ʻAlu ki he ftsoy.ChurchofJesusChrist.org pea lomiʻi ʻi he “Submit Your Work (Fakahū Hoʻo Ngāué).” Hū ʻaki hoʻo ʻAkauni ʻi he Siasí pea fili leva ʻa e “For the Strength of Youth (Ki Hono Fakamālohia ʻo e Toʻu Tupú)” ʻi lalo ʻi he “Choose Magazine (Fili ʻa e Makasiní).” Lomiʻi ʻi he “Add File (Tānaki Atu ʻa e Failé)” ke fili hoʻo failé mo e ʻū taá, pea lomiʻi ʻi he “Submit (Fakahū)” ke upload mo ʻomi kiate kimautolu hoʻo failé. Pe ʻīmeili mai kiate kimautolu ʻi he [e-mail].

ʻE lava ke liliu ʻa e ngaahi talí koeʻuhí ke lōloa feʻunga pe mahino.

ʻOkú Ke Feʻunga

“ʻE lava ke vakai ho fāmilí mo e kaungāmeʻa ofi tahá ʻo ʻiloʻi ʻokú ke feʻunga—pea ʻoku nau ʻiloʻi lelei taha koe. ʻOku tokanga ʻetau Tamai Hēvaní kiate koe pea ʻokú Ne ʻofa foki ʻiate koe. ʻIloʻi ko ʻEne fānau koe pea ko ha konga koe ʻo ʻEne palaní. ʻOkú Ne ʻafioʻi koe, pea ʻoku mahuʻinga hoʻo ngaahi ngāué ʻi Hono ʻaó.”

Matthew W., 14, California, USA

ʻOku ʻAfioʻi ʻe he Tamai Hevaní

“ʻOku ʻafioʻi ʻe he Tamai Hēvaní hoʻo ngaahi tōʻongá, fakakaukaú, mo e ngaahi taumuʻá. Neongo kapau ʻoku hangē ʻoku ʻikai fakatokangaʻi ʻe ha taha ʻa e lelei ʻokú ke faí, ka ʻoku ʻafioʻi ia ʻe he Tamai Hēvaní mo Sīsū, pea te ke maʻu ha ngaahi tāpuaki ai. Kaekehe pē ke ke feinga ho lelei tahá ke fili ki he totonú, ʻoku ʻikai fie maʻu ia ke ke hohaʻa pe ilifia.

Bella R., 14, Arizona, USA

Kau Helo Fakaʻahó

“Te ke lava ʻo fai ha lelei ʻi he fanga kiʻi founga iiki tahá, ʻo tatau ai pē pe ko e tangutu mo ha kiʻi leka ʻoku taʻelata he akó, talanoa mo ha taha, pe ʻave ha ʻīmeili ke fakahaaʻi ki ha taha ʻokú ke tokaʻi ia. Mahalo he ʻikai te ke ʻiloʻi ia he taimi pē ko iá, ka ʻoku ou fakapapau atu te ke toki ʻiloʻi ia ʻamui. Te ke lava ʻo hoko ko e helo ʻi he moʻui ʻa ha taha pe maʻu ha kaungāmeʻa foʻou. ʻOku ou ʻiloʻi fakapapau ia he kuó u aʻusia tonu ia.”

Ashlyn F., 16, Utah, USA

Fanga Kiʻi Meʻa Iiki mo Faingofuá

“ʻOku ou maʻu ha fiemālie ʻi he ngaahi lea ʻa e palōfita ko ʻAlamaá: “ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahí” (ʻAlamā 37:6). ʻI he taimi ʻoku ou fifili ai pe ko e hā ʻa e fanga kiʻi meʻa iiki mo faingofua ko ʻení, ʻoku ou lotua ke ʻiloʻi e finangalo ʻa e ʻEikí maʻakú, pea mo ha tokoni ʻi hono fakahoko Hono finangaló. Kuó u ʻiloʻi ʻoku hoko ʻa hono fai ʻo e fanga kiʻi meʻa īkí ke u ofi ange ai kiate Ia.”

Kaelen R., 18, New York, USA

Vahevahe ha Fofonga Malimali

“ʻOku ou fai ha lelei ʻi heʻeku feinga ke malimali ha tahá. ʻOku tatau ai pē pe ko ha toko taha pē, ʻai ke nau kata, fakahīkihikiʻi kinautolu, pe ʻaʻahi kiate kinautolu, ʻe lava ke ne fai ha tākiekina lahi ʻaupito.”

Megan B., California, USA