“Mei he ʻIkai ha Meʻá ki he Maʻu ha Meʻá,” Ki Hono Fakamālohia ʻo e Toʻu Tupú, Fēpueli 2022.
Lesoni Fakataumuʻaʻo e Efiafi ʻi ʻApí
Mei he ʻIkai ha Meʻá ki he Maʻu ha Meʻá
ʻI he taimi ʻokú ke ongoʻi ai ʻoku tōnounou hoʻo ngaahi feingá, sio kia Sīsū Kalaisi ke liliu hoʻo ngaahi feingá ki ha meʻa ʻoku lelei angé.
ʻIkai lava. Tōnounou. Fai ha fehalaaki. Naʻa mo e faiangahalá. ʻOku tatau ai pē pe ko e hā, kae mahalo kuó ke aʻusia ʻa e ongoʻi ʻoku hangehangē ʻoku ʻikai pē ke ke ʻaongá. ʻI heʻetau hoko ko e kau muimui ʻo Sīsū Kalaisí, ʻoku tau fie maʻu maʻu pē ke fai hotau lelei tahá, ka ko e taimi ʻe niʻihi ʻe lava ke tau ongoʻi ʻoku ʻikai haʻatau ʻaonga.
Ko hono moʻoní, he ʻikai ke tau lava ʻo haohaoa ʻiate kitautolu pē. Ko e haohaoá ʻoku ʻia Sīsū Kalaisi (vakai, Molonai 10:32–33). ʻI heʻetau haʻu kiate Iá, ʻoku tau loto-fakatōkilalo, fakatomala, pea fakamālohia ʻetau tuí, te Ne ngaohi ʻetau “ngaahi meʻa vaivaí ko e mālohi” (ʻEta 12:27). Hangē ko e akonaki ʻa Palesiteni Lāsolo M. Nalesoní, “ʻE lava ke tau ikunaʻi e ngaahi faingataʻa ʻi heʻetau moʻuí, ʻaki e tui kiate Iá.”1
ʻI he lēsoni fakataumuʻa ko ʻení, te ke lava ai mo ho fāmilí ʻo talanoa fekauʻaki mo e founga ʻe lava ke tokoniʻi ai koe ʻe he Tamai Hēvaní mo Sīsū Kalaisi ke liliu ho ngaahi tōnounoú ki ha meʻa ʻoku lelei ange ʻi he meʻa naʻá ke fakakaukau ki aí.
Meʻa ke Faí
-
Kole ki ha mēmipa ʻo e fāmilí ke ne tohitohi ʻaki e pení ha meʻa faingofua ʻi he laʻipepá. Kole ange ke ne fakataumuʻa ke tā ha meʻa he ʻikai ʻiloʻi ʻe ha taha.
-
Paasi e laʻipepá ki ha mēmipa ʻe taha ʻo e fāmilí pea kole ange ke ne fakaʻaongaʻi e ʻū peni fakaʻilongá pe peni kala lanu kehekehé ke tā ha meʻa foʻou ʻaki e meʻa ne tohitohi he laʻipepá—ko ha fakatātā, ko ha tokotaha, ko ha teuteu fakaʻaati. ʻE lava pē ko ha faʻahinga meʻa pē te ne fakakaukau ki ai. ʻAi ke ke mohu founga!
-
Ko ʻene ʻosí pē pea kole ange ke ne vahevahe ʻene ʻilo foʻoú mo e toenga ʻo e fāmilí. Mahalo naʻa fakalata ke kau mo e kau mēmipa kehe ʻo e fāmilí.
1
2
3
Tuku ke Tokoni ʻa e ʻOtuá
Ko e taimi ʻe niʻihi ko ʻetau faifeinga ke fai leleí ʻoku ʻikai hano loko ʻaonga, ʻo hangē pē ko ha tohitohi he laʻipepá. Mahalo te tau meimei lavaʻi pē ʻetau ngaahi taumuʻá, pea ko e taimi ʻe niʻihi ko e ola ʻo ʻetau ngaahi ngāué he ʻikai pē ke ʻiloʻi ia.
Ka ko e taimi te tau tuku ai ʻetau ngaahi ngāué ki he ʻEikí, te Ne lava ʻo fai ha ngaahi meʻa fakaofo! Naʻe akonaki ʻa Palesiteni ʻEselā Tafu Penisoni (1899–1994) ʻo pehē: “Ko e tangata mo e fefine kuo momoi ʻene moʻuí maʻá e ʻOtuá te ne fakatokangaʻi ʻa e toe lahi ange ʻa e meʻa te Ne lava ke fai ʻaki ʻene moʻuí. Te Ne fakalahi ʻenau fiefiá, fakaʻatā ʻenau ngaahi vīsoné, fakavaveʻi ʻenau fakakaukaú, fakamālohia honau ngaahi uouá, hiki hake honau ngaahi lotó, fakatupulaki honau ngaahi tāpuakí, fakalahi honau ngaahi faingamālié, fakanonga honau ngaahi laumālié, ʻomai ha ngaahi kaungāmeʻa, pea lilingi mai ʻa e nongá. Ko ia ia ʻe mole ʻene moʻuí ʻi he ngāue maʻá e ʻOtuá te ne maʻu ʻa e moʻui taʻengatá.”2
Mahalo te tau loto-ʻita he taimi ʻoku ʻikai iku ai ʻetau ngaahi feinga ke fai leleí ʻo tatau mo e meʻa ne tau ʻamanaki ki aí, ka ʻoku ʻikai fie maʻu ke tau loto-foʻi. ʻI hoʻo “lotu ki he Tamaí ʻi he huafa ʻo Kalaisí, koeʻuhí ke ne fakatapui hoʻo ngāué maʻaú,” ʻe “ʻaonga ʻa hoʻo ngāué ki ho laumālié” (2 Nīfai 32:9). Neongo hotau ngaahi vaivaí, ka ʻi heʻetau loto-fakatōkilalo mo tui ki he ʻOtuá, te Ne tokoniʻi kitautolu ke tau hoko ʻo tatau mo Iá!