“ʻI Lākosi, Naisīlia,” Ki Hono Fakamālohia ʻo e Toʻu Tupú, Sune 2022.
Founga ʻo ʻEmau Moihuú
ʻI Lākosi, Naisīlia
Laʻitā mei he Getty Images
Mālō e Lelei! Ko hoku hingoá ko Mōsaia O.
ʻOku ou nofo ʻi Lākosi, Naisīlia, mo ʻeku fineʻeikí, tangataʻeikí, pea mo hoku kiʻi tuofefine taʻu fitu fakaʻofoʻofa ko Helietá. ʻOku ou manako mo hoku tuofefiné ke ma tohi fakataha. ʻOku haʻu ʻeku ongomātuʻá mei ha faʻahinga kehekehe—ko ʻeku tangataʻeikí mei he faʻahinga ʻIolupá pea ʻoku haʻu ʻeku faʻeé mei he faʻahinga ʻItó Ko ia ʻoku ou lea faka-Pilitānia, ka ʻoku ou toe lea faka-ʻIulopa foki. ʻOku mau saiʻia ʻaupito ʻi he nofo heni ʻi Lākosí. ʻOku ʻi ai ha ngaahi matātahi mo ha ngaahi fale fakaʻofoʻofa.
Meʻakai mo e Fakafiefia ʻa Naisīliá!
ʻOku ou ʻofa ʻi ʻAfilika koeʻuhí ko e meʻakai kehekehe ʻoku mau maʻú. Ko hai ia ha taha ʻoku ʻikai saiʻia ʻi he meʻakaí? ʻOku ou manako he feimeʻatokoní pea ʻoku ou akoako ngaohi ha ʻū meʻatokoni foʻou ʻi ʻapi. ʻOku lanu fakaʻofoʻofa e meʻakai ʻa Naisīliá. Ko e taha ʻo e meʻatokoni ʻoku ou saiʻia taha ke ngaohí ko e Epkang Nkukwo, ko ha supo ʻoku ngaohi mei he ʻakau ko e cocoyam, ʻoku hangē ko e aka ʻo e taló. ʻOku ou saiʻia foki ke ngaohi e supo ʻuliʻulí ʻaki ʻa e ekó (pe agidi) ʻa ia ko ha puteni ʻoku ngaohi mei he mahoaʻa koané.
ʻOku ou ongoʻi kuo tokoniʻi au ʻe he maʻu meʻatokoni fakatupu moʻui leleí ke u feʻunga mo mateuteu ange ke maʻu fakahā fakataautaha. ʻOku ou ʻilo ʻoku ʻofa ʻa e ʻEikí ʻiate kitautolu pea ʻokú Ne ʻafioʻi foki mo e ngaahi meʻa ʻoku tau kaí. ‘Okú Ne finangalo ke tau moʻui lelei mo vēkeveke ke fakahoko ʻEne ngāué.
Ko e ngaahi meʻa ʻoku ou manako taha aí ko e fanongo mūsiká, faʻu hivá, faʻu maau, mo lau e ngaahi tohi leleí. ʻOku ou saiʻia ʻaupito he ako ke tā kītaá mo e kīpōtí. ʻOku akoʻi au ʻe heʻeku faʻeé ki he founga tā himí. ʻOku mau maʻu foki ha faama lāpisi. Kuo hoko hono tokangaʻi ha fanga kiʻi lāpisi ʻe 13, ko ha faingamālie lelei maʻaku—pea ko ha ngāue makehe ia!
Ongoʻi Talitali Lelei ki he Seminelí
Ko e taha ʻo e ngaahi konga ʻoku ou saiʻia taha ai ʻi heʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e maʻu ha ngaahi kaungāmeʻa foʻoú. ʻOku ou saiʻia ʻi he faingamālie ke feʻiloaki ai mo e kakai foʻou ʻo ʻeku tuí. ʻOku ou saiʻia he ʻalu ki he seminelí, ka ʻi heʻeku fuofua kamatá, ne u ongoʻi tuenoa. Ko au naʻe siʻi tahá, pea naʻe feʻilongaki e toengá ia. Naʻe ʻikai ke nau faʻa lea mai kiate au. Naʻá ku faʻa fefaʻuhi fakapulipuli mo e ongoʻi tuenoá, ka naʻá ku lotu, pea naʻá ku ongoʻi moʻoni ʻa e ʻofa ʻa e ʻOtuá kiate aú. Naʻá ku fokotuʻu ha taumuʻa ke u maheni lelei ange mo e fānau ako kehé, pea naʻá ku ʻiloʻi moʻoni ʻa e lahi ʻo ʻenau tokanga mai kiate aú. ʻOku ou ʻilo ʻoku finangalo ʻa e ʻOtuá ke tau tupulaki mo maʻu ha ngaahi vā fetuʻutaki ʻoku mahuʻingamālié. Kuó Ne ʻomi ha ngaahi founga ke tau fakahoko ai ia ʻo fakafou ʻi he ngaahi polokalama ʻa e Siasí.
Tokoni mei he Laumālie Māʻoniʻoní
ʻI he taimi ʻe niʻihi, ʻoku finangalo e ʻOtuá ke tau vilitaki atu. ʻOku pehē ʻe he Tokāteline mo e Ngaahi Fuakava 58:4, “He ʻe hoko mai ʻa e ngaahi tāpuakí hili ʻa e ngaahi faingataʻa lahi.” Kapau ʻoku ʻikai lele lelei e ngaahi meʻá pea ʻoku ʻikai ke ke ongoʻi lelei, kātaki pē pea ʻe vavé ni pē haʻo fakatokangaʻi e ngaahi tāpuakí. ʻOku ʻi ai ha ngaahi taimi ko e meʻa pē ʻoku fie maʻu ke tau faí ko e kātaki ki he ngataʻangá pea muimui ki he Laumālie Māʻoniʻoní. ʻI he taimi ʻoku ou loto-fakatōkilalo aí, ʻoku lava ke u ongoʻi hono tokoniʻi au ʻe he Laumālié mo talamai ʻa e meʻa ʻoku fie maʻu ke u fai ke fakaleleiʻi ʻaki e ngaahi palopalema ʻi heʻeku moʻuí. ʻOku ou ʻilo ʻe tokoniʻi au ʻe heʻeku fai ʻení ke u maʻu ha loto-falala lahi ange ʻi he ʻao ʻo e ʻOtuá.