“ʻOku ʻikai ke u ongoʻi ʻe au ha meʻa lolotonga ʻeku lotú. Te u lava fēfē ʻo ʻai ke ʻuhingamālie ange ʻeku lotú?,” Ki Hono Fakamālohia ʻo e Toʻu Tupú, Sune 2022.
Ngaahi Fehuʻí mo e Talí
“ʻOku ʻikai ke u ongoʻi ʻe au ha meʻa lolotonga ʻeku lotú. Te u lava fēfē ʻo ʻai ke ʻuhingamālie ange ʻeku lotú?”
Loto-Fakatōkilalo, Houngaʻia, mo Fakamātoato
“ʻOku toputapu ʻa e lotú. ʻOku fakatōkilalo ʻa e lotu ʻoku ʻuhingamālié. ʻOku ʻikai ngata pē ʻi heʻeku kole ki he ʻOtuá ha ngaahi meʻá, ka ʻoku ou fakahā ai kiate Ia ʻa e meʻa ʻoku ou houngaʻia aí. Hangē ko ia ne akoʻi ʻe Molonaí, ʻoku ou feinga ke lotu ʻi he tui, ʻi he loto-fakamātoato mo e loto-moʻoni (vakai, Molonai 10:4). ʻOku tokoniʻi moʻoni au ʻe he ngaahi lotu ko iá ke u ongoʻi ha meʻa ʻoku loloto mo maʻongoʻonga.”
Angbo K., 20, Côte d’Ivoire
Tānaki Atu ʻa e Foʻi Lea Koeʻuhí
“ʻOku ou saiʻia ke fakaʻaongaʻi e foʻi lea koeʻuhí ʻi heʻeku ngaahi lotú. ʻI he taimi ʻokú ke tānaki atu ai ʻa e koeʻuhí, ʻokú ke fakamatalaʻi ai ki he Tamai Hēvaní e ʻuhinga ʻokú ke lotu aí. Hangē ko ʻení: ʻFakamolemole ʻo tokoniʻi hoku kaungāmeʻá pe mēmipa ʻo e fāmilí ke moʻui koeʻuhí ʻoku ou ʻofa ʻiate kinautolu.’ ʻOku tokoni moʻoni ia ke toe ʻuhingamālie mo fakataautaha ange ai ʻeku ngaahi lotú.”
Eliza G., 17, Meulileni, USA
ʻOku Fakaafeʻi ʻe he Lotú ʻa e Laumālie Māʻoniʻoní
“Lotu maʻu pē ʻi he ʻaho kotoa pē. Kole ki he Tamai Hēvaní ke tokoni atu ke ke ongoʻingofua ange ʻa e Laumālie Māʻoniʻoní. Te ke lava foki ʻo ako lahi ange fekauʻaki mo e Laumālie Māʻoniʻoní mo e lotú ʻi he polokalama Gospel Library—ʻa ia ʻe tokoni lahi ʻaupito!”
Elena J., 13, Kuatemala
Lea Māmālie
“Taimi ʻe niʻihi ʻoku tau lotu pē koeʻuhí ke fakahoko ia. ʻOku tau lea ʻaki pē e ngaahi meʻa ʻoku tau fanongo ʻoku lotua ʻe he kakai kehé, pea ʻoku ʻikai ke tau lea moʻoni ʻaki e ngaahi meʻa ʻi hotau lotó. Ko e lotú ko ha faingamālie ia ke fakataufolofola ai ki he ʻOtuá. ʻOua naʻa fakavaveʻi ia. Tuku ha taimi ke fakahaaʻi kotoa e meʻa ʻi ho lotó.”
Marseilles O., 15, Tonga
Fakamālō Kiate Ia mo Kolea ha Tokoni
“Ko e lotú ko ha fepōtalanoaʻaki ia mo e Tamai Hēvaní, ko ia, fakataufolofola kiate Ia! Te ke lava ʻo fakamālō kiate Ia ʻi ha meʻa naʻá ke fiefia ai. Te ke lava ʻo kole tokoni ki he ʻOtuá. ʻI he taimi ʻoku ou manatuʻi ai ʻoku ʻafioʻi mo ʻofaʻi au ʻe he Tamai Hēvaní, ʻoku faingataʻa ke taʻofi ʻeku lotú. ʻI heʻeku ʻiloʻi e mamahi lahi fau ʻa e Fakamoʻuí maʻakú, ko e kihiʻi meʻa siʻi te u lava ʻo faí ko hano fai ha lotu fakamātoato.”
Ingrid R., 15, Palāsila
Fakakaukau mo Fakalaulauloto ki Hoʻo Ngaahi Lotú
“Neongo te ke lava ʻo lotu ʻi ha faʻahinga taimi pē, ka kuo pau ke ke fakakaukau lelei. Kuo pau ke ke lotu ʻi he loto-fakamātoato ke ongoʻi Hono Laumālié. Fakakaukau mo fakalaulauloto ki hoʻo ngaahi leá lolotonga hoʻo lotú. ʻOku totonu ke makehe mo kehekehe ʻa e lotu kotoa pē.”
Elyssa T., 15, Mīsuli, USA
Fakaʻehiʻehi mei he Ngaahi Fakahohaʻá
“Feinga ke tukutaha pē hoʻo tokangá ʻi he lotú kae ʻikai ko ha toe meʻa kehe lolotonga hoʻo lotú. ʻOku fie maʻu ke tau ʻiloʻi ko e lotú ko ha meʻa-foaki ia he ʻoku tau talanoa ai ki heʻetau Tamai Hēvaní. Te tau lava ʻo manatuʻi ʻa e ngaahi tāpuaki kuó Ne foaki mai maʻatautolú.”
Rebecca J., 14, ʻInitia
Fai ha Fepōtalanoaʻaki ʻUhingamālie
“ʻOku ou saiʻia ke fakakaukau ki heʻeku lotú ko ha fepōtalanoaʻaki moʻoni ia mo e Tamai Hēvaní. ʻOku ou ongoʻi fiefia ʻi he taimi ʻoku ou lotu ai ʻi he founga ko ʻení ʻo hangē pē ko ʻeku ongoʻi hili ha fepōtalanoaʻaki lelei mo ha kaungāmeʻa. Kuó u fakatokangaʻi foki ʻoku tokoniʻi au ʻe he lotu lilo leʻolahí ke u tokanga ange ki he lotú kae lava ke u ʻai ke ʻuhingamālie ange.”
Dot V., 12, Kalolaina Noate, USA