Fili

Naʻe tapou ʻa Sōsiua ki hono kakaí ke nau fakahoko ʻa e fili totonú—ke muimui ki he ʻEikí.

fili

ʻOku ui ʻetau malava ko ia ke fili mo ngāue maʻatautolú ko e tauʻatāina ke filí. Ko ha konga mahuʻinga ia ʻo e palani ʻa e Tamai Hēvaní. Ko e taumuʻa ʻe taha ʻo e moʻui ko ʻení ke fakahaaʻi te tau fili ke talangofua ki he ngaahi fekau ʻa e ʻOtuá kae lava ke tau hoko ʻo hangē ko Iá. ʻE fakamāuʻi kitautolu ʻo fakatatau ki heʻetau ngaahi filí. (Vakai, 2 Nīfai 2:27; Tokāteline mo e Ngaahi Fuakava 101:78; ʻĒpalahame 3:25.)

ʻahó ni

Naʻe tapou ʻa Sōsiua ki hono kakaí ke nau fili “ʻi he ʻahó ni,” pe ʻi he taimí ni. Te tau lava ʻo fakahoko tuʻo taha ha ngaahi fili mahuʻinga pea feinga ke kei tauhi totonu pē ki ai. (Vakai, Saame 37:5.)

tauhí

ʻOku ʻuhinga ʻa e tauhi ʻi he veesi ko ʻení ke lotu, tokoni, talangofua, mo līʻoa hoʻo moʻuí ki ha taha. ʻOku totonu ke tau tauhi ki he ʻEikí (vakai, Mōsese 1:15).

ngaahi ʻotuá

Naʻe fekau ki ʻIsileli ke nau tauhi pē ki he ʻOtua moʻoni mo moʻui ko Sīsū Kalaisí (vakai, ʻEkesōtosi 20:2–5). Naʻe ʻomi ʻe Sōsiua ha ngaahi sīpinga ʻo ha ngaahi ʻotua kehe ʻoku ʻikai totonu ke lotu ki ai hono kakaí. ʻE lava ke kau ʻi he ngaahi ʻotua kehe ʻi heʻetau moʻuí ʻa e koloá, fakakaukau ʻa e niʻihi kehé, ngaahi meʻa kehe ʻoku tau manako aí—ha faʻahinga meʻa pē te ne ʻave kitautolu mei he ʻEikí.

ko au mo hoku falé

Naʻe lea ʻa Sōsiua maʻana mo hono falé. Naʻá ne pehē te nau tauhi ki he ʻEikí. Naʻá ne loto ke tataki hono fāmilí ʻi he māʻoniʻoni pea akoʻi kinautolu ke muimui ki he ʻEikí (vakai, Tokāteline mo e Ngaahi Fuakava 93:40).