ʻAi Hangatonu

ʻOku ʻikai ke u tangi ʻi he taimi ʻoku ou ongoʻi ai ʻa e Laumālié. ʻOku ʻi ai nai ha meʻa ʻoku fehalaaki ʻiate au?

ʻOku ʻikai ko e tangí pē ʻa e founga ke ongoʻi ai e Laumālie ʻo e ʻOtuá. ʻOku ʻikai foki ko e fakaʻilonga angamaheni ia ʻoku ʻi ai ʻa e Laumālié.

Naʻe pehē ʻe Palesiteni Hauati W. Hanitā (1907–95): “ʻOku ou hohaʻa ʻi he taimi ʻoku hangē ʻoku lau ai ʻa e ongo mālohi ʻo e lotó pe tafenoa ʻo e loʻimatá tokua ʻoku ʻi ai ʻa e Laumālié. ʻOku moʻoni ʻe lava ʻe he Laumālie ʻo e ʻEikí ʻo ʻomi ha ngaahi ongoʻi mālohi fakaeloto, kau ai ʻa e loʻimatá, ka ʻoku ʻikai totonu ke fetoʻoaki ʻa e fōtunga pehē ki tuʻá mo e ʻi ai tonu ʻa e Laumālié” (ʻi he Malangaʻaki ʻEku Ongoongoleleí: Ko ha Fakahinohino ki he Ngāue Fakafaifekaú [2019], 105).

ʻOku lahi e ngaahi founga ke fakatokangaʻi ai e Laumālie Māʻoniʻoní. ʻE lava ke ke ongoʻi nonga mo fiemālie. Mahalo te ke maʻu ha ʻatamai mahino mo ha ngaahi fakakaukau fakalaumālie. Pe te ke ongoʻi ha ngaahi ongo ʻoku lelei hangē ko e ʻofá, fiefiá, angamaluú, faʻa kātakí, pe loto-holi ke fai lelei. (Vakai, Tokāteline mo e Ngaahi Fuakava 6:15, 23; 8:2; 11:12–14; Kalētia 5:22–23; Molonai 7:13.) Kapau ʻokú ke aʻusia ha faʻahinga meʻa peheni, ʻe lava ke ke maʻu ha loto-falala ʻokú ke ongoʻi ʻa e Laumālié. ʻE lava ʻe he ngaahi ongo mālohí ʻo ʻai koe ke ke ʻongoʻi māfana, ka ʻoku ʻikai totonu ke ke fakakaukau ko e founga pau taha pe lelei taha ia ke fakatokangaʻi ai ʻa e Laumālié.