Ko e Kaveingá mo Au

ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné

Moʻui ʻAki ʻEku Ngaahi Tuʻunga ʻUlungāngá

“ʻI heʻeku faifeinga ke taau mo e hakeakiʻí.”

Fai ʻe Joy Yamada

finemui

Faitā ʻa Christina Smith

Kuó u fakatokangaʻi ʻi hoku ʻapiakó ʻoku feinga maʻu pē ha kakai ʻe niʻihi ke fakatokangaʻi e meʻa kotoa ʻoku nau faí. Ka ʻoku ou loto ke maʻu ʻa e fakakaukau ke fakahoko ha meʻa koeʻuhí pē he ʻoku totonu ia kae ʻikai ke fakatokangaʻi ai au. ʻOku ou ʻilo ʻoku mahuʻinga ke fili ki he totonú mo tauhi e ngaahi fekaú. ʻI heʻeku moʻuí, ʻoku ou fiefia ʻaupito ʻi heʻeku tauhi ki heʻeku ngaahi tuʻunga moʻuí, koeʻuhí kuo ʻaonga moʻoni ia kiate au ʻi he lele lōloá.

Ko e mēmipa kehe pē ʻe taha ʻo e Siasí ʻi hoku ʻapiakó. ʻOku ou feinga ke hoko ko ha faʻifaʻitakiʻanga ki hoku ngaahi kaungāmeʻá he ʻoku ou fakafofongaʻi ʻa e Siasí. ʻOku ou fie maʻu ke nau ʻiloʻi ʻoku ngaohi au ʻe he ongoongoleleí ke u hoko ko ha tokotaha fiefia.

ʻOku ou fanongo he ngaahi lea taʻetāú ʻi hoku ʻapiakó he taimi kotoa pē. Naʻa mo ha niʻihi ʻo ʻeku kau faiakó ʻoku nau lea taʻetaau. Ka ʻoku ou fili ke moʻui ʻaki e ngaahi tuʻunga moʻui kotoa pē ʻo e Siasí neongo kapau ʻoku faingataʻa ke tauhi. ʻOku faingofua ange ke u tauhi ki he ngaahi tuʻunga moʻui kehe hangē ko e Lea ʻo e Potó pe teunga tāú. ʻOku ou ʻilo ʻe maluʻi au ʻe he muimui ki he Lea ʻo e Potó. Kuó u fokotuʻu foki ʻeku ākengá koeʻuhí ke u lava ʻo maʻu maʻu pē ha meʻa ke u tui ʻoku taau mo fakatupulaki fakatouʻosi. ʻOku ʻikai fie maʻu ia ke u feilaulauʻi ʻeku ākengá ke u moʻui ʻaki ʻeku ngaahi tuʻunga moʻuí.

Mahalo te ke fehangahangai he taimi ʻe niʻihi mo ha ngaahi faingataʻa ʻe feinga ke taʻofi koe mei hono ikunaʻi ha meʻa ʻoku leleí, ka te ke lava ʻo fili ke ke fiefia. Kuó u foua ha ngaahi faingataʻa. Ka ʻoku ou feinga ke u maʻu ha fakakaukau lelei ʻi he ngaahi taimi ko iá. ʻOku tokoniʻi au ʻe he ongoongoleleí ke u fai ia.

ʻOku ou saiʻia ke fakamālohisino. Kuó u fakamālohisino (gymanstics) ʻi he kotoa ʻo ʻeku moʻuí. Ka naʻe pau ke tuku koeʻuhí naʻe lahi ʻeku lavelaveá. Naʻe faingataʻa ke tuku he naʻá ku ʻalu mei he fakamālohisino ʻi ha ngaahi houa lahi he uiké ki ha ʻikai pē ha toe fakamālohisino he uiké. Naʻe ʻikai ke u lava ʻo fakamālohisino ʻi he founga naʻá ku faʻa fakahokó, ko ia naʻá ku fakakaukau ke u feinga ke lele. ʻOku ou saiʻia ke lele ʻi he loto koló. ʻOku tokoni foki ʻa e lelé ke holoki ʻeku loto-mafasiá.

ʻOku ʻikai faingofua maʻu pē ke te hoko ko ha mēmipa ʻo e Siasí, ka ʻoku ʻikai ke ke tuenoa. Fai ʻa e meʻa kotoa pē te ke lavá ke pukepuke ha tōʻonga fakakaukau ʻoku lelei mo fakatuʻamelié!

ʻOku nofo ʻa e tokotaha naʻá ne faʻú ʻi Niu ʻIoke, USA.