“ʻUnu ke Ofi Ange ki he ʻOtuá,” Ki Hono Fakamālohia ʻo e Toʻu Tupú, Sune 2022.
Ko e Kaveingá mo Au
ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné
ʻUnu ke Ofi Ange ki he ʻOtuá
“Te u ʻofa ki he ʻOtuá ʻaki hoku lotó, iví, ʻatamaí, mo e mālohí kotoa, pea tauhi ʻeku ngaahi fuakavá.”
Ko hoku tokouá ʻa e fuofua mēmipa hoku fāmilí ke kau ki he Siasí. Ko ha faʻifaʻitakiʻanga lelei ia kiate au. Hili ha ngaahi taʻu siʻi mei hono papitaiso iá, naʻe kamata ke fanongo kotoa hoku fāmilí ki he ongo faifekaú. Naʻá ku pehē leva ke u kau ki he Siasí he ʻoku ou ʻiloʻi ʻoku moʻoni ʻa Sīsū Kalaisi pea ko Hono Siasi moʻoní ʻeni. Hili hoku papitaisó, naʻe hangē naʻe fanauʻi foʻou au ki ha moʻui foʻoú. Naʻá ku palōmesi ki he ʻOtuá te u tauhi ʻEne ngaahi fekaú. Kapau ʻoku tau fie foki ki he Tamai Hēvaní, ʻoku fie maʻu ke tau talangofua ki Heʻene ngaahi fekaú.
ʻOku tokoniʻi kitautolu ʻe he Laumālie Māʻoniʻoní ke tau tauhi e ngaahi fekaú, hangē ko e talangofua ki heʻetau mātuʻá. ʻOku ou saiʻia ke heka pasikala mo hoku ngaahi kaungāmeʻá. ʻOku talamai ʻe heʻeku ongomātuʻá ke ʻoua te u fuʻu ʻalu mamaʻo, ka ʻoku saiʻia hoku ngaahi kaungāmeʻá ke mau fononga pasikala mamaʻo. Naʻe fakaafeʻi au ʻe hoku ngaahi kaungāmeʻá ʻi ha taimi ʻe taha ke mau heka pasikala lōloa, ka naʻá ku ongoʻi naʻe ʻikai totonu ke u ʻalu. Naʻe mavahe hoku ngaahi kaungāmeʻá ʻi heʻenau pasikalá pea lavea ai ha taha ʻiate kinautolu. Naʻe faifai pē peá ne SAI, ka naʻá ku fiefia ʻi heʻeku fakafanongo ki he Laumālié mo talangofua ki heʻeku ongomātuʻá.
ʻOku ou feinga ke u ongoʻi ofi ki he ʻOtuá he ʻaho kotoa pē. ʻOku tokoni ʻa e folofolá ke fakaʻaiʻai au ke u fai ʻa e meʻa ʻoku totonú. ʻOku feinga hoku fāmilí ke lotu fakataha ʻi he ʻaho kotoa pē. ʻOku ou manako foki he valí mo e tā fakatātaá. ʻOku ou saiʻia ke tā fakatātaaʻi e Fakamoʻuí. ʻOku ou fie maʻu ke Ne ʻiate au maʻu pē.
ʻOku ou ʻilo ʻoku ʻofeina au ʻe heʻeku Tamai Hēvaní, pea ʻoku ou ʻofa ʻiate Ia. Koeʻuhí kuo tāpuekina lahi au ʻe he Tamai Hēvaní, ʻoku ou fie ʻalu ʻo ngāue fakafaifekau. ʻOku ou fie akoʻi e niʻihi kehé kau ki he Tamai Hēvaní mo e meʻa ʻokú Ne fai maʻatautolú.
Te tau lava ʻo ongoʻi ʻa e fiefia mei he ongoongoleleí, pea ʻe lava foki ke tau vahevahe ia mo e niʻihi kehé.
ʻOku nofo ʻa e tokotaha naʻá ne faʻú ʻi Niu Teli, ʻInitia.