Ko Ho Sinó: Ko Ha Meʻaʻofa Maʻongoʻonga

Fai ʻe Eric B. Murdock; ngaahi tā fakatātaá ʻa Darren Rawlings

ʻE mei lelei nai kapau naʻe ʻi ai haʻo sote ʻe lava pē ia ʻo foki ki hono tuʻunga kimuʻá kapau te ke hae e tupenú? Pe ko ha tēpile maʻu meʻatokoni efiafi ʻe lava pē ia ʻiate ia ʻo fakaleleiʻi ha taha ʻo hono ngaahi vaʻé ke lelei ange ʻi he tuʻunga foʻoú?

Sai, ʻe lava ʻe he sino ʻo e tangatá ʻo fai e meʻa kotoa pē ko iá mo ha ngaahi meʻa lahi ange! Kuo teʻeki ai ha meʻa kuo fakatupu ʻe he faʻahinga ʻo e tangatá ʻe ofi ki he fakaofo mo e ʻaonga ʻo e sino ʻo e tangatá.

ʻI hoʻo hoko ko e fānau ʻa e ʻOtuá, naʻá ke haʻu ki he māmaní mo ha sino fakamatelie. ʻOku tokoniʻi koe ʻe he sinó ni ke ke ako, tupulaki, mo fakalakalaka ʻo taʻengata. He toki tāpuaki moʻoni eni!

Mei he ʻulú ki he motuʻavaʻé, tatau ai pē pe ko e hā ho fōtungá pe lahí, ʻoku fakaʻofoʻofa mo fakaofo ho sinó!

Ko ho sinó ko ha meʻaʻofa ia mei he ʻOtuá, ko ia ʻoku mahuʻinga ke tokangaʻi ia. Ko ha ngaahi tokoni ʻeni ki hono tauhi ho sinó ke mālohi mo moʻui leleí:

Tauhi e Lea ʻo e Potó, kau ai e fakahinohino ki hono kai e meʻakai fakatupu moʻui leleí.

Fakamālohisino maʻu pē.

Tokonga ki hoʻo ngaahi fakakaukaú mo e ongó. Kumi ha ngaahi founga ke ke mālōlō mo fakaleleiʻi ai e ngaahi ongo ʻoku ʻikai leleí, hangē ko e ʻalu ʻo luelue mo talanoa mo ha taha ʻokú ke falala ki ai.

Maʻu ha mohe feʻunga.

ʻI hoʻo tokangaʻi ho sinó, ʻokú ke fakahaaʻi ai ki he Tamai Hēvaní ʻokú ke houngaʻia ʻi Heʻene meʻaʻofa mahuʻinga fau kiate koé. ʻOkú ke fakaafeʻi foki ʻa e Laumālie Māʻoniʻoní ki hoʻo moʻuí.

Pea ʻi hoʻo tokangaʻi ho sino fakaofó, ʻe tokoni ia ke ke fiefia ʻi ha ngaahi meʻa maʻongoʻonga kehe ʻi hoʻo moʻuí!