Ikuʻi ʻa Māmani mo Maʻu ha Fiemālie
Ngaahi Konga Fakamatala
ʻOkú Ne Tataki Au, tā fakatātaaʻi ʻe Yongsung Kim
ʻOku ʻuhinga nai ki he hā hono ikuʻi ʻa māmaní? ʻOku ʻuhinga ia ke ikunaʻi ʻa e fakatauele ke tokanga lahi ange ki he ngaahi meʻa ʻo māmaní ʻi he ngaahi meʻa ʻa e ʻOtuá. ʻOku ʻuhinga ia ke falala lahi ange ki he akonaki ʻa Kalaisí ʻi he ngaahi fakakaukau fakapoto ʻa e tangatá. … ʻOku ʻuhinga ia ke fili ke fakaʻehiʻehi mei ha meʻa pē ʻokú ne tuli ʻa e Laumālié. …
ʻE founga fēfē leva haʻatau ikuʻi ʻa māmaní? … Ko e taimi kotoa pē te ke feinga ai pea mo muimui ki he ueʻi ʻa e Laumālié, ko e taimi kotoa pē te ke fai ai ha meʻa lelei—ha ngaahi meʻa he ʻikai fai ʻe he “tangata fakakakanó,” ko hoʻo ikuʻi ia ʻa māmaní. …
Sai, ʻoku tāpuekina fēfē nai ʻetau moʻuí ʻi hono ikuʻi ʻo māmaní? Ko e talí ʻoku mahino: Fakahoko ha fefuakavaʻaki mo e ʻOtuá ʻo haʻi kitautolu kiate Ia ʻi ha founga te ne ʻai ke faingofua ange e meʻa kotoa ʻo e moʻuí. Kātaki ʻo ʻoua naʻá ke maʻuhala ʻeku ʻuhingá: Naʻe ʻikai ke u pehē ʻoku fakafaingofuaʻi ʻa e moʻuí ʻi hono fakahoko ʻa e ngaahi fuakavá. Ko hono moʻoní, ʻamanaki ki ha fakafepaki, he ʻoku ʻikai loto ʻa e filí ke ke ʻilo e mālohi ʻo Sīsu Kalaisí. Ka, ʻoku ʻuhinga hoʻo ngāue fakataha mo e Fakamoʻuí ke ke maʻu faingamālie ki Hono iví mo e mālohi huhuʻí. …
… ʻOku ou kole atu ai kimoutolu he taimí ni—ke tokangaʻi hoʻomou fakamoʻoni kia Sīsū Kalaisi mo ʻEne ongoongoleleí. Ngāueʻi ia. Tanumaki ia ke tupulaki. Fafanga ʻaki e moʻoní. …
… ʻI hoʻomou tuku ke lāngilangiʻia ʻa e ʻOtuá ʻi homou moʻuí, ʻoku ou palōmesi atu ha nonga, loto-toʻa, fiefia, ʻio, mo ha fiemalie lahi ange.