“ʻOku Faingofua pē ʻEne Haʻamongá, pea Maʻamaʻa ʻEne Kavengá—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
ʻOku Faingofua pē ʻEne Haʻamongá, pea Maʻamaʻa ʻEne Kavengá
Ngaahi Konga Fakamatala
Kuo lahi ha ngaahi lea kuo fakahoko ʻe hotau kau taki ʻi he Siasí ki he ʻofa faka-Kalaisí, uouangatahá, ʻofá, angaʻofá, manavaʻofá, faʻa fakamolemolé mo e ʻaloʻofá. ʻOku ou tui ʻoku fakaafeʻi kitautolu ʻe he Fakamoʻuí ke tau moʻui ʻi ha founga māʻolunga mo māʻoniʻoni ange—ʻEne founga ʻofa ʻe lava ai ʻa e taha kotoa ʻo ongoʻi ʻoku nau kau moʻoni mo fiemaʻu.
ʻOku fekauʻi kitautolu ke tau ʻofa he niʻihi kehé, kae ʻikai fakamaauʻi kinautolu. Tau tuku hifo muʻa e kavenga mamafa ko iá; ʻoku ʻikai ʻatautolu ia ke fua. Ka, te tau lava ʻo fua e haʻamonga ʻo e ʻofa mo e manavaʻofa ʻa e Fakamoʻuí. …
… Ko kinautolu naʻá Ne tākiekina fakaelotó naʻa nau ongoʻi ʻEne ʻofá, pea naʻe fakamoʻui mo liliu kinautolu ʻe he ʻofa ko iá. Naʻe ueʻi kinautolu ʻe Heʻene ʻofá ke fie liliu ʻenau moʻuí. ʻOku ʻomi ʻe he moʻui ʻi Heʻene foungá ʻa e fiefiá mo e nongá pea naʻá Ne fakaafeʻi mo ha niʻihi ki he tōʻonga moʻui ko ia ʻi he angamaluú, angaʻofá, mo e ʻofá. …
… ʻI he fakautuutu ʻetau feinga ke fakahoko e meʻa ʻokú Ne kole kiate kitautolú—ʻo ʻikai fai-fakafatongia pe ko e ngaahi tāpuaki ʻoku tau maʻú ka ʻi he ʻofa ʻataʻatā pe kiate Ia mo ʻetau Tamai Fakalangí—ʻe tafe atu ʻEne ʻofá ʻiate kitautolu mo ʻai e meʻa kotoa ʻokú Ne kole ke tau faí ke ʻoua naʻa malava pē kae faingofua mo maʻamaʻa ange pea mo fakafiefia ange ʻi ha toe meʻa te tau mafakakaukauá. …
… ʻOku fiemaʻu ʻe he taha kotoa ke ne ongoʻi ʻoku kau moʻoni mo fiemaʻu moʻoni ʻi he sino ʻo Kalaisí. Ko e fakaʻamu lahi taha ʻa Sētané ke fakamavahevaheʻi e fānau ʻa e ʻOtuá, pea kuó ne lavameʻa ʻaupito, ka ʻoku ʻi ai ha mālohi pehē ʻi he uouangatahá. Pea ʻoku fiemaʻu ke tau fetākinima ʻi he fononga faingataʻa ʻo e matelié!