“Tauhi Totonu ki he ʻOtuá mo ʻEne Ngāué—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
Tauhi Totonu ki he ʻOtuá mo ʻEne Ngāué
ʻUlukuai
Ko e taha ʻo e ngaahi sīpinga mālohi taha ʻi he folofolá ʻo e loto-hohaʻa … fekauʻaki mo e fekumi ki ha fakamoʻoni ki he ngāue ʻa e ʻOtuá mo Sīsū Kalaisí, ʻoku ʻomi ia ʻi he faleʻi ʻa ʻAlamā ki hono ngaahi foha ʻe toko tolú—Hilamani, Sipiloni, mo Kolianitoni. …
Ko e ʻuluaki meʻa ne tokanga ki ai ʻa ʻAlamaá … ke maʻu ʻe he tokotaha takitaha ha fakamoʻoni kia Sīsū Kalaisi pea tauhi totonu ki he ʻOtuá mo ʻEne ngāué.
… Naʻe angatonu ʻa Sipiloni ʻo hangē ko hono taʻokete ko Hilamaní. Ko e faleʻi ʻoku ou fie fakamamafaʻí ko e ʻAlamā 38:12, ʻa ia ʻoku pehē ai, “Tokanga foki ke ke taʻofi kotoa hoʻo ngaahi holi fakakakanó, koeʻuhi ke ke fonu ʻi he ʻofá.”
… ʻOku ʻikai kovi ʻa e sinó—ʻoku fakaʻofoʻofa mo mahuʻinga ia—ka ʻe lava ʻe ha ngaahi holi ʻe niʻihi, ʻo kapau he ʻikai fakaʻaongaʻi lelei mo taʻofi totonu, ʻo fakamavaheʻi kitautolu mei he ʻOtuá mo ʻEne ngāué pea uesia lahi ai ʻetau fakamoʻoní. …
Makehe mei hono mapuleʻi e ʻitá mo taʻotaʻofi e ngaahi holi kehé, ʻoku fiemaʻu ke tau taki e moʻui maʻa haohaoá ʻaki hono mapuleʻi ʻetau ngaahi fakakaukaú, leá, mo e tōʻongá. …
Koeʻuhí ko e angaʻuli ʻa Kolianitoní, naʻe fiemaʻu ai ke akoʻi ia ʻe ʻAlamā fekauʻaki mo e fakatomalá. …
Ko ia, ko e faleʻi tokamuʻa ʻa ʻAlamaá ke taʻofi e ngaahi holi fakakakanó, ka ko ʻene faleʻi kiate kinautolu kuo maumaufonó, ke nau fakatomala. …
He ʻikai lava ha taha ʻo foki ki he ʻOtuá ʻi heʻene ngaahi ngāue leleí pē; ʻoku tau fiemaʻu kotoa ʻa e lelei ʻo e feilaulau ʻa e Fakamoʻuí. Kuo faiangahala kotoa pē, pea ko e Fakalelei pē ʻa Sīsū Kalaisí te tau lava ai ke maʻu ʻa e ʻaloʻofá pea nofo mo e ʻOtuá.