“ʻUnuʻunu ke Ofi Ange ki he Fakamoʻuí—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
ʻUnuʻunu ke Ofi Ange ki he Fakamoʻuí
Ngaahi Konga Fakamatala
ʻOku tau ʻiloʻi ko e taimi ʻoku tupulaki ai ʻa e koví ʻi he māmaní, ʻe fiemaʻu ʻe heʻetau moʻui fakalaumālié, pea mo e moʻui fakalaumālie ʻa kinautolu ʻoku tau ʻofa aí, ke tau tanumaki kakato ange, poupouʻi mo fakamālohia ʻa e ngaahi aka ʻo ʻetau tui kia Sīsū Kalaisí. …
Hangē ko ia ʻoku tau ʻiloʻí, ko e tui kia Sīsū Kalaisí mo e hoko ko ha ākonga moʻoní ʻoku mahulu ange ia ʻi ha fili ʻoku fakahoko tuʻo taha pē—ʻoku mahulu ange ʻi ha meʻa ʻoku hoko tuʻo taha pē. Ko ha founga ngāue toputapu ia ʻoku tupulaki mo lahi ange ʻi he ngaahi faʻahitaʻu ʻo ʻetau moʻuí, ʻo hokohoko atu kae ʻoua kuo tau tūʻulutui ʻi Hono toʻukupu kelekelé.
ʻI he tupu fakataha ʻa e uité fakataha mo e tea ʻi he māmaní, ʻe lava fēfē ke tau fakaloloto mo fakamālohia ʻetau tukupā ki he Fakamoʻuí ʻi he ngaahi ʻaho ka hokó?
Ko ha ngaahi fakakaukau ʻeni ʻe tolu:
ʻUluakí, te tau lava ʻo fakafemoʻuekinaʻi kakato ange kitautolu ʻi he moʻui ʻa Sīsuú, ʻEne ngaahi akonakí, Hono fakaʻeiʻeikí, Hono mālohí, mo ʻEne feilaulau fakaleleí. …
Hokó, ʻi heʻetau ʻiloʻi lelei ange mo ʻofa ʻi he Fakamoʻuí, ʻoku lahi ange ʻetau holi ke tukupā kiate Ia ʻetau līʻoá mo e falalá. ʻOku tau fai ha ngaahi fuakava mo Ia. …
ʻOku fakaʻatā ʻe hono fakahoko mo tauhi ʻo e ngaahi fuakavá ke tō loloto ange ai e ʻofa ʻa e Fakamoʻuí ki hotau lotó. …
Fakaʻosí, ko ʻeku fakakaukau hono tolú: ʻi he ngāue toputapú ni, ʻoku tau mataʻikoloa ʻaki, maluʻi pea taukaveʻi mo maluʻi ʻa e meʻafoaki ʻo e Laumālie Māʻoniʻoní. …
… ʻI hoʻo fakaʻatā hoʻo ʻofa ki he Fakamoʻuí mo ʻEne ʻofa ʻiate koé ke tōkakano ki ho lotó, ʻoku ou palōmesi atu ha loto-falala, ha nonga, mo ha fiefia lahi ange ʻi hoʻo fehangahangai mo e ngaahi faingataʻa ʻo hoʻo moʻuí.