“Muimui ʻia Sīsū Kalaisi ʻo Laka Atu ʻi he Tui—Ngaahi Konga FakamatalA,” Ki Hono Fakamālohia ʻo e Toʻu Tupú, Nōvema 2022.
Muimui ʻia Sīsū Kalaisi ʻo Laka Atu ʻi he Tui
Ngaahi Konga Fakamatala
ʻE kāinga, ʻoku ou fakamoʻoni ko e taimi te tau muimui ai ʻia Sīsū Kalaisi mo laka atu ʻi he tuí, ʻoku ʻi ai ha ʻamanaki lelei. ʻOku ʻi ai ha ʻamanaki lelei ʻi he ʻEiki ko Sīsū Kalaisí. ʻOku ʻi ai ha ʻamanaki lelei ki he tokotaha kotoa pē ʻi he moʻuí ni. ʻOku ʻi ai ha ʻamanaki lelei ke ikunaʻi ʻetau ngaahi fehalākí, faingataʻá, pea mo hotau ngaahi ʻahiʻahí mo e faingataʻaʻiá. ʻOku ʻi ai e ʻamanaki lelei ʻi he fakatomalá mo e fakamolemolé pea ʻi hono fakamolemoleʻi ʻo e niʻihi kehé. ʻOku ou fakamoʻoni ʻoku ʻi ai ha ʻamanaki lelei mo e nonga ʻia Kalaisi. Te Ne lava ʻo tokoniʻi kitautolu he taimí ni ʻi he ngaahi taimi faingataʻá. Naʻá Ne fai ia maʻá e kau paionia he kuonga muʻá, pea te Ne fakahoko ia he taimí ni maʻatautolu takitaha. …
ʻI heʻeku fakakaukau ki he kau paionia kuo nau teuteuʻi e halá maʻá e niʻihi kehé, ʻoku ou ʻuluaki fakakaukau pē ki he Palōfita ko Siosefa Sāmitá. …
ʻOku hoko ʻetau kau faifekau he ʻaho ní ko ha kau paionia ʻi onopooni he ʻoku nau vahevahe ʻa e pōpoaki nāunauʻia ko ʻení [ʻo hono Fakafoki Mai ʻo e Ongoongoleleí] mo e kakai ʻi he funga ʻo e māmaní, ʻo fakaʻatā ai ʻa e hala maʻá e fānau ʻa ʻetau Tamai Hēvaní ke nau ʻiloʻi Ia mo Hono ʻAlo ko Sīsū Kalaisí. …
Kuo hoko ʻa Palesiteni Nalesoni ko ha paionia ʻi he Siasí. …
ʻOkú ne akoʻi mai kiate kitautolu e founga ke tau moʻui fakafalala fakalaumālie ai pē kiate kitautolú. …
Ko hotau Fakamoʻui ko Sīsū Kalaisí ko e paionia maʻongoʻonga taha Ia ʻi hono teuteuʻi e halá. Ko e moʻoni, ko Ia ʻa e “halá” [Sione 14:6] ke aʻusia ai ʻa e palani ʻo e fakamoʻuí kae lava ke tau fakatomala pea toe foki hake ki heʻetau Tamai Hēvaní, ʻo fakafou ʻi he tui kiate Iá. …
Fakatauange te tau muimui maʻu pē ʻi he tā-sīpinga ʻa Sīsū Kalaisí pea tokanga taha pē kiate Ia ʻi he tui ʻi he foʻi laka kotoa pē, ʻo fokotuʻu maʻu hotau vaʻé ʻi he hala ʻo e fuakavá.