“Hoihoifua ko e Fetongi ʻo e Efuefú: Ko e Halanga Faifakamoʻui ʻo e Fakamolemolé—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
Hoihoifua ko e fetongi ʻo e Efuefú: Ko e Halanga Faifakamoʻui ʻo e Fakamolemolé
Ngaahi Konga Fakamatala
Peá u Kai, tā fakatātāʻi ʻe Kristin Yee
ʻOku ʻikai tuku kitautolu ke tau fefaʻuhi mo e ngaahi nunuʻa ʻo e ngaahi angafai ʻo e niʻihi kehé ʻiate kitautolu pē; ʻe lava ke fakamoʻui foki mo kitautolu pea ʻomi mo e faingamālie ke fakahaofi ai kitautolu mei he mafatukituki ʻo ha loto-ʻita pea mo ha faʻahinga angafai pē ʻe hoko mai.
… ʻOku finangalo ʻa e ʻEikí ke tau fakamolemoleʻi maʻa ʻetau lelei pē ʻatautolú. Ka ʻoku ʻikai ke Ne kole mai ke tau fai ia taʻe-kau ai ʻa ʻEne tokoní, ʻa ʻEne ʻofá, ʻa ʻEne mahinó. ʻOku fakafou ʻi heʻetau ngaahi fuakava mo e ʻEikí ʻa ʻetau lava ke maʻu ʻa e mālohi fakaivia, tataki pea mo e tokoni ʻoku tau fiemaʻú ke fakamolemole pea mo fakamolemoleʻí. …
… Naʻá Ne folofola, “ʻOku ʻiate au ʻa e Laumālie ʻo [e ʻEikí], koeʻuhí kuó ne fakanofo au ke u malanga ʻaki ʻa e ongoongoleleí ki he masivá; kuó ne fekau au ke fakamoʻui ʻa e loto mafesí, ke malanga ʻaki ʻa e huhuʻí ki he kau pōpulá, mo e fakaʻā ʻo e kuí, ke vete ange ʻa kinautolu kuo laveá” [Luke 4:18; naʻe tānaki atu hono fakamamafaʻí].
ʻOkú Ne ʻomi ʻa e fakamoʻuí, fakaakeaké mo e fakahaofí kiate kinautolu kotoa pē ʻoku loto-mamahí, pōpulá, kafó pea mahalo kuo fakakuihi ʻe he mamahí pe angahalá. ʻOku ou fakamoʻoni ʻoku moʻoni ʻa e fakamoʻui mo e fakaakeake ʻokú Ne ʻomí. …
Ko Sīsū Kalaisi ʻa hoʻo Mīsaia fakatāutahá, ko hoʻo Huhuʻi mo e Fakamoʻui ʻofá, ʻa ia ʻokú Ne ʻafioʻi e ngaahi tautapa ho lotó. ʻOkú Ne fakaʻamu ke ke maʻu ʻa e fakamoʻuí mo e fiefiá. ʻOkú Ne ʻofa ʻiate koe. ʻOkú Ne mamahi mo koe ʻi hoʻo ngaahi mamahí pea fakafiefiaʻi koe ke ke fiefia. Fakatauange te tau fakatuʻamelie pea piki ki Hono toʻukupu ʻoku kei fakamafao maí lolotonga ʻetau ʻaʻeva ʻi he halanga faifakamoʻui ʻo e fakamolemolé.