“Ko Hono Tanumaki mo Vahevahe Hoʻo Fakamoʻoní—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
Ko Hono Tanumaki mo Vahevahe Hoʻo Fakamoʻoní
Ngaahi Konga Fakamatala
ʻOku Ou ʻIloʻi Nai pea Mahino Kiate Au e ʻUhinga ʻo e Fakamoʻoní?
Ko hoʻo fakamoʻoní ko ha koloa mātuʻaki mahuʻinga ia, ʻoku faʻa ʻalu fakataha mo ha ngaahi ongo fakalaumālie loloto. ʻOkú te faʻa maʻu fakalongolongo pē e ngaahi ongo ko ʻení pea fakamatalaʻi ko ha “kihiʻi leʻo siʻi” [1 Ngaahi Tuʻi 19:12]. Ko hoʻo tuí ia pe ʻilo ʻo e moʻoní, ʻa ia ʻoku ʻoatu ko ha fakamoʻoni fakalaumālie ʻo fakafou ʻi he ivi tākiekina ʻo e Laumālie Māʻoniʻoní. …
ʻOku Ou ʻIloʻi Nai e Founga ke Vahevahe ai ʻEku Fakamoʻoní?
ʻOkú ke fakahoko hoʻo fakamoʻoní ʻi he taimi ʻokú ke vahevahe ai hoʻo ngaahi ongo fakalaumālié mo e niʻihi kehé. ʻI hoʻo hoko ko e mēmipa ʻo e Siasí, ʻokú ke maʻu e ngaahi faingamālie ke vahevahe ai hoʻo fakamoʻoní ʻi he ngaahi fakataha ʻa e Siasí pe ngaahi fepōtalanoaʻaki fakataautaha mo e fāmilí, kaungāmeʻá, mo e niʻihi kehé.
Ko e founga ʻe taha ʻokú ke vahevahe ai hoʻo fakamoʻoní ko hoʻo angatonú. …
ʻOku tuʻu e kau mēmipa ʻo e Siasí ko ha kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē, pea ʻi he feituʻu kotoa pē. ʻOku taʻefaʻalaua e ngaahi faingamālie ke fakahoko ai ʻeni ʻi he ʻuniveesi fakakomipiutá ʻo fakaʻaongaʻi haʻatau ngaahi fakamatala fakalaumālie pe vahevahe e ngaahi meʻa langaki moʻui ne teuteu ʻe ha niʻihi kehe. …
Ko e Hā ʻa e Ngaahi Fakafeʻātungia ki Hono Vahevahe ʻEku Fakamoʻoní?
ʻE ala kau ʻi he ngaahi fakafeʻātungia ki hono vahevahe hoʻo fakamoʻoní hoʻo taʻepauʻia he meʻa ke lea ʻakí. …
Ko ha fakafeʻātungia ʻe taha … ko e mavasiʻí. …
ʻE hanga hoʻo maʻu ha tuí … ʻo fakaʻatā koe ke ke ikunaʻi e ngaahi ongo ko ʻení. …
Te u Tauhi Fēfē ʻEku Fakamoʻoní?
ʻOku ou tui ko e fakamoʻoní ʻoku fakatōloloto ia ʻiate kitautolu, ka ke lava ʻo pukepuke mo fakatupulaki kakato iá, naʻe akoʻi ʻe ʻAlamā kuo pau ke tau “tauhi fakalelei [ʻetau fakamoʻoní] [vakai, ʻAlamā 32:37]. …
Siʻoku kāinga ʻofeina, ʻoku ou palōmesi atu ʻi he mahino kakato ange kiate kimoutolu ʻa e fakamoʻoní, pea ʻi homou vahevahe iá, te mou ikunaʻi ai e ngaahi fakafeʻātungia ʻo e veiveiuá mo e manavasiʻí, ʻo malava ai ke mou lehilehiʻi mo tauhi ʻa e koloa mahuʻinga tahá ni, ʻa hoʻomou fakamoʻoní.