“Ko ha Founga Ngāue ki he Fakahā Fakafoʻituituí—Ngaahi Konga Fakamatala” Ki Hono Fakamālohia ʻo e Toʻu Tupú, Nōvema 2022.
Ko ha Founga Ngāue ki he Fakahā Fakafoʻituituí
Ngaahi Konga Fakamatala
ʻOku fiemaʻu ke mahino kiate kitautolu e founga ʻoku ngāue ai e Laumālie Māʻoniʻoní ki hono ʻomi ha fakahā fakafoʻituituí. …
ʻOku faʻu ʻe he ngaahi folofolá ʻa e ʻuluaki ʻelemēniti ʻo e founga ngāue ko ʻeni ke maʻu ha fakahā fakafoʻituituí. ʻOku langaki ʻe he keinanga ʻi he ngaahi folofola ʻa Kalaisí, ʻa ia ʻoku maʻu ʻi he folofolá, ʻa e fakahā fakafoʻituituí. …
Ko e ʻelemēniti hono ua ʻo e founga ngāué, ʻoku tau maʻu ʻa e fakahā fakafoʻituituí maʻatautolu pē mo hotau fatongia fakaetauhí, kae ʻikai maʻa ha niʻihi kehe. …
… Ko e totonu ia ʻa e palōfita moʻuí ko hono ʻomi e tokāteline, ngaahi fekau, mo e ngaahi fakahā maʻá e Siasí, ʻa ia ʻokú ne maʻu ia mei he ʻEiki ko Sīsū Kalaisí. …
… Ko e palōfitá pē ʻoku maʻu fakahā maʻá e Siasí. …
ʻOku ʻi ai e totonu ʻa e niʻihi fakafoʻituituí ke ne maʻu ha fakahā fakafoʻituitui. Hangē ko ʻení, te ke lava ʻo maʻu ha fakahā ki he feituʻu ke ke nofo aí, maʻuʻanga moʻui ke feinga ki aí, pe ko e tokotaha te mo malí. …
Ko e ʻelemēniti hono tolu ʻo e founga ngāué ʻe fenāpasi ʻa e fakahā fakafoʻituituí mo e ngaahi fekau ʻa e ʻOtuá mo e ngaahi fuakava kuo tau fakahoko mo Iá. …
ʻI he taimi ʻoku tau kole ai ha fakahā ki ha meʻa kuo ʻosi ʻomi ʻe he ʻOtuá ha fakahinohino mahino ki aí, ʻoku tau fakaʻatā leva kitautolu ki hano fakaʻuhingaʻi hala ʻetau ongó mo fanongo pē ki he meʻa ʻoku tau fie fanongo ki aí. …
Ko e ʻelemēniti hono fā ʻo e founga ngāué ko hono ʻiloʻi e meʻa kuo ʻosi fakahā fakataautaha atu ʻe he ʻOtuá kiate koé, mo toe ʻamanaki atu ki ha fakahā lahi ange meiate Ia. …
… ʻOku ou ʻiloʻi ʻoku lava pea ʻe lava ʻe he Laumālie Māʻoniʻoní ʻo fakahā atu ʻa e meʻa kotoa pē ʻoku totonu ke ke faí.