“Ko Hono Tokoniʻi ʻo e Masivá mo e Faingataʻaʻiá—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
Ko Hono Tokoniʻi ʻo e Masivá mo e Faingataʻaʻiá
Ngaahi Konga Fakamatala
ʻOku akoʻi mo fakahoko e ngaahi ngāue tokoni uelofea mo e ʻofa fakaetangata lahi ki hotau ngaahi kaungāʻapí ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea mo kitautolu ko hono kāingalotú. Hangē ko ʻení, ʻoku tau ʻaukai he kamataʻanga ʻo e māhina takitaha pea foaki ʻo fakatatau mo e lahi ʻo e meʻakai ne ʻikai ke tau fakaʻaongaʻi he vahaʻataimi ko iá ke tokoniʻi hotau kāingalotu ʻoku faingataʻaʻiá. ʻOku toe fai foki ʻe he Siasí ha foaki lahi ki he ngaahi tokoni ʻofa fakaetangata mo e ngaahi ngāue tokoni kehe ʻi he māmaní.
Neongo e ngaahi meʻa kotoa ʻoku fakahoko fakahangatonu ʻe hotau Siasí, ko e lahi taha ʻo e tokoni ʻofa fakaetangata ki he fānau ʻa e ʻOtuá ʻi he māmaní ʻoku fakahoko ia ʻe ha kakai mo ha ngaahi kautaha ʻoku ʻikai ke nau fengāueʻaki pau mo hotau Siasí. …
ʻOku tukupā e Siasi ʻo Sīsū Kalaisí ke tokoni kiate kinautolu ʻoku faingataʻaʻiá, pea ʻoku toe tukupā foki ke ngāue fakataha mo e niʻihi kehé ʻi he ngāue ko iá. …
ʻOku akoʻi ʻe he fakahā ʻo onopōní ko hotau Fakamoʻui ko Sīsū Kalaisí, ʻa e “maama moʻoni ʻoku fakamaama ʻa e tangata kotoa pē ʻoku haʻu ki he māmaní” [Tokāteline mo e Ngaahi Fuakava 93:2]. Ko ia ai, ʻoku fakamāmaʻi e fānau kotoa pē ʻa e ʻOtuá ke nau tauhi kiate Ia mo fetauhiʻaki ʻiate kinautolu pē ʻi he lelei taha ʻo ʻenau ʻiló mo malavá. …
… [ʻOku] totonu ke fakatokangaʻi ʻe [hotau tokolahi] e ngāue lelei ʻoku fai ʻe he niʻihi kehé pea ke poupouʻi ia ʻi heʻetau maʻu e taimi mo e koloa ke fai peheé. …
ʻOku ou fakamoʻoni kia Sīsū Kalaisi, ʻa ia ʻoku tataki kotoa kitautolu ko e fānau ʻa e ʻOtuá ʻe Heʻene māmá mo e Laumālié ʻi hono tokoniʻi ʻo e masivá mo e faingataʻaʻiá ʻi he funga ʻo e māmaní.