“Tukufakaholo ʻo e Poupoú—Ngaahi Konga Fakamatala,” Ki Hono Fakamālohia ʻo e Toʻu Tupú, Nōvema 2022.
Tukufakaholo ʻo e Poupoú
Ngaahi Konga Fakamatala
Hangē ko hono talamai ʻe heʻeku faʻeé ʻi heʻeku lāunga he faingataʻa ha meʻá, “Ko ia pē Hala, kuo pau pē ke faingataʻa. Kuo pau pē ke pehē. Ko e moʻuí ko ha siviʻanga ia.”
Naʻá ne lava ʻo lea ʻaki ia ʻi he fiemālie, naʻa mo ha malimali pē, koeʻuhí he naʻá ne ʻiloʻi ha meʻa ʻe ua. Neongo pe ko e hā e faingataʻá, ko e meʻa mahuʻinga tahá ke aʻu ki ʻapi ke nofo mo ʻene Tamai Hēvaní. Pea naʻá ne ʻiloʻi te ne lava ʻo fakahoko ia ʻi he tui ki hono Fakamoʻuí. …
Ko e tukufakaholo ʻo e poupou naʻá ne tuku mai maʻamautolú ʻoku fakamatalaʻi lelei taha ia ʻi he Molonai 7, ʻa ia naʻe poupouʻi ai ʻe Molomona hono foha ko Molonaí mo hono kakaí. …
ʻOkú ne fakamuʻomuʻa ʻa Sīsū Kalaisi, ʻo hangē ko ia ʻoku fakahoko ʻe kinautolu kotoa kuo nau lavameʻa ʻi hono poupouʻi ʻa kinautolu ʻoku faingataʻaʻia ʻi he hala ki honau ʻapi fakalangí. …
Naʻe vakai ʻa Molomona ki heʻenau angamaluú ko ha fakamoʻoni ki he mālohi ʻo ʻenau tuí. …
ʻOku poupouʻi leva kinautolu ʻe Molomona ʻaki ʻene fakamoʻoni ʻoku nau ʻi he hala ki hono maʻu e meʻaʻofa hono fakafonu honau lotó ʻaki e ʻofa haohaoa ʻa Kalaisí. …
ʻI heʻeku vakai ki muí, kuó u fakatokangaʻi he taimí ni ʻa e founga ne hanga ai ʻe he meʻa-foaki ʻo e manavaʻofá—ʻa e ʻofa haohaoa ʻa Kalaisí—ʻo fakamālohia, tataki, poupouʻi, mo liliu ʻeku faʻeé ʻi heʻene fāinga ke foki ki ʻapí. …
… ʻOku ʻafioʻi fakaikiiki ʻe he Fakamoʻuí hoʻo ngaahi faingataʻaʻiá. ʻOkú Ne ʻafioʻi e meʻa lahi te ke malavá ke tupulaki ai ʻi he tuí, ʻamanaki leleí, mo e ʻofa faka-Kalaisí.
Ko e ngaahi fekau mo e ngaahi fuakava ʻokú Ne ʻoatú ʻoku ʻikai ko ha ngaahi sivi ia ke puleʻi koe. Ko ha meʻaʻofa ia ke langaki hake ʻaki koe ki hono maʻu kotoa e ngaahi meʻaʻofa ʻa e ʻOtuá pea foki ki ʻapi ki hoʻo Tamai Hēvaní mo e ʻEikí, ʻa ia ʻokú Na ʻofa ʻiate koé.