O le Autu ma A’u

Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona

Taumafai e Avea e Faapei o Keriso i luga ma fafo o le Malae

“I le avea ai ma se so’o o Iesu Keriso, ou te taumafai ai ina ia avea e faapei o Ia.”

Saunia e Carolyn Esplin

polo soka

A o ou tuputupu ae, o le taalo soka na ou maua ai le mautinoa ma le fiafia. O lea sa faigata ai ina ua amata ona faiaina la’u au soka. Sa i ai se matou talaaga o le manumalo, ae o lenei ua luluina lo matou talitonuga mautinoa o se au. Sa ou manua foi ma misi ni nai taaloga ma toleniga. Sa ou lagona le le fiafia ia te au lava ona sa ou lei taalo i le tulaga na faamoemoeina e isi mai ia te au.

I se tasi afiafi a o lei amata se taaloga, sa ta’u mai e faiaoga ia te au o le a amata se tasi o le au i lo’u tulaga. Ou te le’i tei ai, ae sa ou lagona le lotovaivai. Sa ma tauva ma lenei tagata o le au mo le tulaga lava lea e tasi ma sa ma atiina ae se faatauvaga le leoa ma le le fiafia.

A o ou matamata atu i le tauiviga a lau au, sa ou matauina le tagata o lau au lea sa taalo i lou tulaga o aveesea mai le taaloga. Sa savali ese o ia mai le malae, ma foliga faanoanoa tele. Sa uunaia au e talanoa atu ia te ia. Sa ou alu atu ma ofo atu ia te ia ni upu faamalosiau. Sa faateia o ia, aua ma te lei agalelei muamua i le tasi ma le isi. A o ou savali ese, sa ou lagonaina le olioli ma le filemu ua oo mai i ou luga. Mai lena aso, sa lei avea i ma’ua ma ni tagata e faasagatau ae o ni uo.

Sa ou aoaoina e oo lava i le soka, e mafai ona ou taumafai e mulimuli i le faataitaiga a le Faaola. I le avea ai ma se tagata taalo, e le mafai ona ou puleaina ni manuaga, taimi taalo, malo, po o le faiaina. Ae e mafai ona ou pulea ou uiga ma le auala ou te taulimaina ai isi. O le faataitaiga a le Faaola e mafai ona fesoasoani i taimi uma, ma e mafai ona ou filifili e mulimuli ia te Ia. O le avea ma se soo o Keriso o le a manaomia ai pea le galue malosi, ositaulaga, ma le tautinoga. Ae a tatou tautino atu e mulimuli ia Keriso, o le a tele atu le filemu, olioli, ma le faamoemoega i le olaga.

E alala le tusitala i Colorado, ISA.