“O Pupuni o le Lagi,” Mo le Malosi o le Autalavou, Tes. 2022.
Sau, Mulimuli Mai ia te A’u
O Pupuni o le Lagi
Ua faamanuiaina au i lou olaga atoa e ala i le ola ai i le tulafono o le sefuluai.
Atapue mai le Getty Images ma faaaloaloga a Elder Revillo
Ina ua liliu mai ou matua i Le Ekalesia a Iesu Keriso o le Au Paia o Aso e Gata Ai, sa leai se tupe maua mautu a lou tama. I lena taimi, e pei o le asō, sa tele le mativa i Filipaina. Sa faigata ona maua ni galuega.
O lea sa ia tatalo ai ma tau atu i le Atua e i ai sana molimau i le tulafono o le sefuluai ae sa manaomia ona ia maua se galuega ina ia mafai ai ona ia ola ai. Sa ia folafola atu i le Tama Faalelagi o le a ia totogia se sefuluai faamaoni i lona olaga atoa.
Ia, na maua e lou tama se galuega. Sa ia maua le galuega o se tagata teufale i le falegaosi oloa a le Coca-Cola. Ina ua amata ona ia totogia le sefuluai, sa amata ona suia lona olaga.
Faamanuiaina le Mafuatiaina
Sa masani ona matou savavali i le lotu ona sa le lava ni a matou tupe e totogi ai femalagaaiga lautele. Sa amata ona suia lena mea. Sa galue malosi lou tama i lana galuega faatauvaa ma amata ona siitia lemu lona tulaga, ma iu ai ina avea ma se pule o fefaatauaiga. Sa mafai ona matou gafatia femalagaaiga e faaopoopo atu i meaai. O se tasi o vavega moni o le mafai lea e fanau uma e toaono a ou matua ona o atu ma faauma le kolisi.
E tusa ai ma lena vavega faapitoa, e oo lava i le au faigaluega a lou tama na foliga mai na faateia. “E mafai faapefea ona e auina atu lau fanau uma i le kolisi?” latou te fesili atu ai. “E te mauaina le aofaiga lava e tasi o le tupe e pei ona matou maua. E le o fetaui!”
E ataata pea lo’u tama ma fai atu, “Ua faamanuiaina a’u ona o le ola ai i le talalelei. Ua faamanuiaina a’u ona ou te totogi sefuluai.”
Folafolaga ma le Puipuiga
Na aoao mai le perofeta o le Feagaiga Tuai o Malaki, “Ina aumaia mea e sefulu ai a outou mea uma lava i le fale e tuu ai mea, … ma ia outou tofotofo mai ia te a’u i lenei mea, ua fetalai mai ai Ieova o au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:10).
Ua ou molimauina le ala ua faamanuiaina ai au ma lou aiga i le faaletino ma le faaleagaga e ala i le ola ai i lenei poloaiga. Sa tele ni mea na fetaiai ma au i lo’u olaga lea sa puipuia ai au mai mea matautia faaletino pe faaleagaga. Ou te talitonu na puipuia au e le Alii aua sa ou faamaoni i le totogiina o au sefuluai.
Pe a Faigata le Totogiina o le Sefuluai
I Filipaina, sa ou vaaia ai le mativa i soo se mea. Sa ou fefautuaai ma le toatele o tagata o le Ekalesia e uiga i le taua o le totogiina o sefuluai ma taulaga, e tusa lava pe sa lei faigofie.
Ou te manatua se tasi o alii faatoa auai i le Ekalesia. Sa avea a’u ma ana peresitene o le siteki i le taimi lena. “Peresitene, e mafai faapefea ona ou totogia le sefuluai?” na ia fesili ai. “E le lava lau tupe maua e faatau ai ia lava ni meaai.”
O lenei uso lelei o se avetaavale uila afi pa’u tolu. Sa ia galue malosi mo mea uma sa ia mauaina. “E manaomia ai le faatuatua,” sa ou tali atu ai ia te ia. “Ae ou te folafola atu a e ola i le tulafono o le sefuluai, o le a faamanuiaina oe e le Alii.”
Na Ia faia lava. I ni nai masina mulimuli ane, sa ou toe feiloai ai ma lenei uso. Sa ia tau mai ia te au e moni lava ua faamanuiaina o ia e le Alii i mea uma sa ia manaomia.
Sa asiasi atu Peresitene Gordon B. Hinckley (1910–2008) i Filipaina ma sa popole i le mativa sa iai iina. Sa faapea atu Peresitene Gordon B. Hinckley, “Ou te talitonu ma lo’u loto atoa, afai e taliaina e tagata le talalelei ma ola ai, totogi a latou sefuluai ma taulaga, tusa lava pe itiiti, o le a tausia e le Alii Lana folafolaga anamua mo i latou, ma o le a latou maua ni araisa ia latou ipu ma lavalava i o latou tua ma faapaologa i luga o o latou ulu.”1
Ua ou vaaia le faataunuuina o lena folafolaga.
O Le Aafiaga o Taulaga
Ou te fia faasoa atu se manatu i taulaga. O nisi talavou atonu latou te le iloaina le lelei ofoofogia lea e sau mai taulaga anapogi, taulaga alofa, ma isi foai. Ae sa ou molimauina le aafiaga o na foai i Filipaina.
Ua ou vaai i aiga ua faasaoina mai le matelaina ona o taulaga anapogi. E le gata i lea, o le tele o mea lelei e faia e ala i fesoasoaniga alofa ma isi taulaga. Mo se faataitaiga, o le foai atu o se tausamiga se tasi mo fesoasoaniga alofa, e mafai ona fafaga ai se aiga i se isi vaega o le lalolagi mo se aso pe sili atu.
A o outou ola i le tulafono o sefuluai ma taulaga, ou te molimau faatasi atu ma Malaki o le a tatalaina e le Alii pupuni o le lagi ma “sasaa atu ia te outou se faamanuiaga.”
E manaomia ai le faatuatua ia Iesu Keriso.