“Faamalamalama le Lalolagi i Auaunaga i le Kerisimasi,” Mo Le Malosi o le Autalavou, Tes. 2022.
Faamalamalama le Lalolagi i Auaunaga i le Kerisimasi
Ua faasoa mai e le autalavou mai le salafa o le lalolagi le auala e faia ai e le auauna atu i isi se vaitau faapitoa o le Kerisimasi.
E i ai ni nai auala sili atu e manatua ai le Faaola i le taimi o le Kerisimasi nai lo le mulimuli i Ana faataitaiga ma auauna atu i isi. O le a e lagonaina le filemu ma le alofa o Keriso a o e tuuina atu lou taimi ma taleni. O ni nai talavou nei mai le salafa o le lalolagi ua faamanuiaina i le auaunaga na latou tuuina atu i le taimi o le Kerisimasi.
Kerisimasi i se Laueleele Fou
Sa siitia atu Brandon (16), Jake (15), Melisa (12), ma Grace (9) i Iurukuei mo le tolu tausaga ina ua valaauina o latou matua o ni taitai o le Misiona a Iurukuei Montevideo. O Tesema sa vevela ma susu i Iurukuei, sa leai se Kerisimasi malulu ma toulu le kiona e pei ona sa latou masani ai. E ui ina sa faigata le o ese mai le fale ma le aiga mo Kerisimasi e tolu, ae sa latou maua le fiafia a o latou auauna atu i tagata na siomia i latou. O vaitau taitasi o le Kerisimasi, o le a laeiina ai e le aiga ma faifeautalai ni ofutino lanu mumu “Faamalamalama le Lalolagi” a o latou auauna atu faataamilo i le atunuu.
“Sa matou o atu i paka ma matafaga i Montevideo faatasi ma faifeautalai ma faamama otaota ma lapisi mai afā o le taumafanafana,” o le tala lea a Jake. E manatua e Brandon, “O le Kerisimasi muamua sa matou i ai i Iurukuei, sa matou faapipiiina ai lole i kata ‘Faamalamalama le Lalolagi’ e tufa atu. I le goto o le la, e toatele tagata o le a faapotopoto i luga o le matafaga, ma o le nofoaga tonu lava lea e tuu atu ai ia i latou lole ma se kata, e ui lava e lei tele se gagana faaSipaniolo matou te tautatala ai.”
Ata na pueina e Julie Olsen
Mo nei fanau, o le auauna atu na latou lagona ai le fiafia i le aiga ma fesoasoani ia i latou e taulai atu i le Faaola ma le uiga moni o le Kerisimasi.
Fai mai Jake, “O le faia o auaunaga mo le Faamalamalama le Lalolagi na fesoasoani e lagona ai le taua o le Kerisimasi. E ui lava sa masani ona matou maua se Kerisimasi paepae, ae o le auauna atu na pei ai le mafanafana o le taumafanafana o Iurukuei e pei o le Kerisimasi.” Sa ioeina e Melisa. “O le faia o le auaunaga na aveese ai lou mafaufau mai le mea sa ou misia i le aiga,” o lana tala lea. “O le faia o isi ia fiafia na matou maua ai le fiafia ma fesoasoani ai ia matou lagona atili le fiafia i le aiga.”
Faasalalauina o le Olioli o Keriso
O Jana B. mai Baden-Württemberg, Siamani, e fiafia foi e faasalalau atu le olioli o le Kerisimasi e ala i faatinoga faigofie o le auauna atu.
“I le taimi muamua, matou te tuuina atu i o matou tuaoi ni meaalofa e pei o fasimoli, moligao, po o kuki,” o le tala lea a Jana. “Ona amata ai foi lea ona foai atu e tuaoi meaalofa o le Kerisimasi. O se tu masani. O le tausaga lenei sa matou tao ai kuki mo o matou tuaoi ma faifeautalai ma talanoa atu i o matou tuaoi ina ia aumaia ia i latou le filemu ma le olioli. Tatou te le faia i taimi uma ni mea faatasi ma o tatou tuaoi ma o nisi taimi e galo ai o loo latou i ai pea iina mo i tatou. A tatou tuuina atu ia i latou ni meaalofa o le Kerisimasi, e pei lava o se faafetai mo le fesoasoani mai ia i tatou i le tausaga atoa.”
E maua foi e Jana se taimi e auauna atu ai i lona aiga.
“O lou tinamatua e 90 tausaga ma e nofo na o ia,” o lana tala lea. “E faigata ia te ia ona alu i fafo i soo se mea. O le Kerisimasi talu ai sa matou faia ai le tele o mea e auauna atu ai ia te ia, ae maise lava talu ai o lana Kerisimasi muamua e aunoa ma Tamamatua. E fiafia lava lou tinamatua i taimi uma pe a matou o mai. E faaali atu ai ia te ia matou te alolofa ia te ia.”
O le mea e sili ona taua, ua iloa e Jana o le auauna atu e mafai ona fesoasoani ia te ia e mulimuli ai i le faataitaiga a le Faaola ma manatua ai le uiga moni o le Kerisimasi.
“Pe a e faamanatuina le Kerisimasi e ala i le aumaia i tagata le olioli, o le a faamanatu atu ai ia te oe ia Iesu Keriso, ma e mafai ona e faasoa atu le olioli o Lana savali i isi,” o le tala lea a Jana.
O Lau Lava Auaunaga o le Kerisimasi
O lenei Kerisimasi, mafaufau i tagata o siomia oe e mafai ona faaaogaina sina agalelei. E mafai ona e kukaina le meaai o le afiafi mo lou aiga pe valaaulia se uo i se gaoioiga a le autalavou. E mafai ona e tausitama mo se tuaoi, faaalu se taimi ma se uo e faia se tasi o mea e sili ona latou fiafia i ai, aumai ni palanikeke mafanafana i le falemai o tamaiti, pe foai atu ni meataalo ma lavalava i se nofoaga o auaunaga alofa i le lotoifale.
E le o toe mamao ona e iloa lea o le faafiafiaina o isi e masani ona avea o se meaalofa sili e mafai foi ona e tuuina atu ia te oe lava! Afai e te le latalata faaletino i se tasi e te alofa i ai, ia manatua o tekinolosi e mafai ona fesoasoani ia te oe e auauna atu ai ia i latou i le mea lava e tasi. Taumafai e tuu i luga pe aisea e te alofa ai ia i latou i luga o ala o faasalalauga faaagafesootai, pesepesega mo i latou i se valaau faavitio, po o le auina atu o se afifi malie o tusi ma kiona pepa i le meli. O lau auaunaga e mafai ona faamalamalama ai le olaga o se tasi.