“Tu Atu mo le Mea Tonu,” Mo le Malosi o le Autalavou, Tesema. 2022.
O le Autu ma A’u
Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona
Tu Atu mo le Mea Tonu
“O le a ou fesoasoani e saunia le lalolagi mo le toe afio mai o le Faaola”
I se tasi aso, sa ma aai ai ma se uo i se faleaiga ina ua ma faalogo atu i nisi o tagata na lata ane o talanoa e uiga i lotu. Sa taua e se teineitiiti sa ia feiloai i ni alii se toalua i uila na ofo atu e talanoa ia te ia e uiga i le Atua. Ina ua uma ona latou feiloai mo ni nai vaiaso, sa ia taliaina le la valaaulia ina ia papatisoina o se tagata O Le Ekalesia a Iesu Keriso o le Au Paia o Aso e Gata Ai.
Sa amata ona fai atu e se tasi o uo ni fesili faigata ma uunaia o ia e sui lona mafaufau. Sa foliga lē toafimalie o ia, ma tautino mai na te lei iloaina uma ia tali, ae na fai mai e sa’o lava le lagona e papatiso. Sa ia tau atu ia i latou na pau lava le mea sa ia manao ai o le latou lagolago.
Sa mafai ona ma iloa ma lau uo ua popole nei o ia. Sa le mafai ona ma le amanaiaina le uunaiga e tautatala atu.
Ae ma te lei tuumuli, sa ma savavali atu ma faapea atu, “Faamalie atu mo le faalavelave, ae na ma faalogo atu ua e filifili e papatiso! O i maua o tagata o le Ekalesia ma ma te mananao ia e iloa o loo e faia le faaiuga sili ona lelei o lou olaga. Faitau pea ma tatalo e uiga i le Tusi a Mamona.”
I se tausaga mulimuli ane, sa ou faalogologo ai i se lesona i le lotu ma sa faasoa mai e le faiaoga se tala e uiga i lana uo o loo la faamau. I se tasi aso, sa ia tatalo ai ia iloa pe tatau ona papatisoina o ia. I lena lava po, sa alu ai o ia i se faleaiga faatasi ma nisi o ana uo. Sa amata ona latou talanoa e uiga i mataupu faalelotu ma lana filifiliga ina ia papatisoina. Sa fai atu ana uo ia te ia e aloese mai faifeautalai ma ia aua nei papatisoina.
Sa ia lagona le le fiafia i le leai o se lagolagosua. Ona o mai lea o ni tagata se toalua ia te ia ma fai mai o i laua o ni tagata o le Ekalesia. Sa la uunaia o ia ina ia papatisoina ma ia faaauau pea ona faitau ma tatalo. Sa tau atu e le uo a le faiaoga ia te ia o le i ai o na tagata ese e toalua e o mai ma faasoa atu ma le lototoa a laua molimau o se tali lea i ana tatalo.
Ou te matua faafetai lava ona sa ma faalogo ma lau uo i le uunaiga e tautatala atu ma tutu atu mo le mea sao.
E alala le tusitala i Arisona, ISA.