“O Se Olaga e Tumu i le Olioli,” Mo Le Malosi o le Autalavou, Tes. 2022.
O Se Olaga e Tumu i le Olioli
Ua iloa e Caroline lona faamoemoega, ma ua naunau o ia e faataunuuina.
Ata na pueina e Christina Smith
O Caroline M. mai Tennessee, ISA, e fiafia e faasalalau atu le olioli. “Ou te fiafia pe a fiafia tagata,” o lana tala lea. “O lo’u faamoemoega i le olaga o le fesoasoani lea i tagata ia iloa le tele o le alofa o Iesu ia i latou. O lo’u faamoemoega iinei i le lalolagi o le faasalalau atu lea o le faamoemoe, fiafia, ma le alofa.”
E fiafia Caroline e aoao le talalelei a Iesu Keriso, ola i mea ua ia aoaoina, ma faasoa atu le talalelei i isi. Na te iloa e aumaia e le talalelei le olioli tele aua ua ia lagonaina mo ia lava.
O Le Olioli i le Aoaoina o le Talalelei
Ua maua e Caroline le olioli i le talalelei a Iesu Keriso aua “e aumaia ai le alofa tele i tagata uma.” Fai mai a ia: “Ou te mulimuli ia Iesu Keriso e ala i le usiusitai. O Ia o le punavai o le filemu ma le fiafia ma le alofa—o le tagata lena e i ai Iesu Keriso ia te au. Sa maliu o Ia mo i tatou ma totogi a tatou agasala ina ia mafai ai ona tatou faapei o Ia.”
O le seminare o se tasi lea o auala na mafai ai e Caroline ona aoaoina le talalelei, ma o se aafiaga lelei mo ia. “Ou te fiafia i le seminare i le taeao po. O au o se tagata o le taeao.” E o mai tamaiti aoga i lona fale talu ai o lona tina o le faiaoga seminare. “E le toatele ni tagata o le Ekalesia i le mea ou te nofo ai. Ae na o ni nai tagata o le ekalesia e auai i la’u aoga maualuga ma o mai faatasi ma a’u i le seminare.”
E fiafia o ia e suesue i le Feagaiga Tuai i le seminare i lenei tausaga. O se tasi o ana tala e fiafia i ai o le tala i le Foafoaga i le tusi o Kenese. “Ou te fiafia e faitau e uiga i le Foafoaga aua ua faaalia ai na foafoaina e Iesu lenei lalolagi mo au. Ou te matua fiafia ai lava e mafaufau na Ia faia lena mea mo au.”
O Le Olioli i le Ola Ai i le Talalelei
O le ola ai i le talalelei e aumaia ai foi le olioli tele ia Caroline. E alofa o ia ia Iesu Keriso ma e manao e mulimuli ia te Ia, lea na fesoasoani ia te ia e malamalama ai i le taua o le papatisoina. “Sa ou iloa e tatau ona ou usitai i poloaiga a le Atua, e tatau ona ou osia feagaiga ma Ia ma mulimuli i le ala sao.”
O le papatisoina, sa ia iloa ai o le a ia mulimuli i le ala sao—le ala na faaali mai e Iesu ia i tatou. Mo ia, o le papatisoina “sa matuai ofoofogia lava.” E ala i lona manao e osia ma tausia feagaiga ma lona manao e auauna atu i isi ma aumaia ia i latou le olioli, ua ia faaalia ai e manao o ia e mulimuli ia Iesu Keriso.
O le isi auala sa iloatino ai e Caroline le olioli o le talalelei e masani lava ona ala mai i gaoioiga a le Ekalesia. E fiafia o ia e alu i vasega ma gaoioiga a Tamaitai Talavou ona o le fiafia na te maua iina. “O Tamaitai Talavou e faafiafiaina ma faaata au.”
E fiafia foi o ia e alu i le tolauapiga a Tamaitai Talavou. “Pe a ou i ai i le tolauapiga a Tamaitai Talavou, e siomia au e tagata uma ma e mafai ona ou lagonaina le Agaga. E faamanatu mai ai ia te au le taimi na ou papatiso ai.”
Ua maua foi e Caroline le olioli o le talalelei i lona olaga i aso uma. “O taimi uma lava ou te taina ai le piano po o le kitara, o taimi uma lava ou te ole atu ai i le Atua e fesoasoani i se tasi, soo se taimi lava ou te lagona ai le tuuatoatasi, soo se taimi lava ou te faalogologo ai i musika faagaeetia—e faaali mai e tagata uma ia te au e alofa le Faaola ia te au aua e mafai ona ou faalogo ia te Ia.”
O le Olioli i le Faasoaina Atu o le Talalelei
A o i ai Caroline i le tolauapiga a Tamaitai Talavou, sa ia molimau atu i le mea moni o ia o se afafine o le Atua, e i ai Sona faamoemoega mo ia i lenei olaga, ma o lona faamoemoega o le aumaia lea o le olioli ma le alofa i isi. “O le toatele o tagata na ta’u mai ia te au lo latou fiafia i la’u molimau.”
O se tasi o mea faapitoa e uiga i lenei molimau patino o le mafai e tagata uma ona lagona manino o ia ma malamalama i mea sa ia fai atu ai. O lenei mea na fiafia ai Caroline talu ai e le o le tulaga lava lena i taimi uma. O Caroline e aafia i le Down syndrome, ma e fai mai o se mea masani mo tagata le faigata ona malamalama ai i mea uma e fai mai ai se tagata e aafia i le Down syndrome.
Sa malosi le Agaga a o ia tuuina atu lana molimau, ma mulimuli ane sa fai mai le toatele o tagata o le faalogo atu i le molimau a Caroline o se tasi lea o aafiaga sili ona paia o o latou olaga. Sa ia iloa na faamaonia manino mai e le Agaga le moni o le mea sa ia fai mai ai.
Ua aoaoina e Caroline mo ia lava o le auauna atu i isi e aumaia ai le olioli! Ua fesoasoani le Agaga Paia ia te ia ia lagona le olioli o le talalelei ma le olioli o le mulimuli ia Iesu Keriso, ma e manao o ia i isi ia lagonaina lena lava lagona e tasi. E ala i le faasalalauina o le fiafia ma le alofa i isi, na te aumaia ai le Agaga i o latou olaga. Ma e ala i le faasoa atu o mea e aumaia ai lona olioli, ua ia valaaulia ai i latou e o mai ia Keriso.