“E Mafai e le Faaola ona Laveai i Tatou,” Mo le Malosi o le Autalavou, Tes. 2022.
E Mafai ele Faaola ona Laveai i Tatou
O le a e feagai ma le tele o faafitauli i le olaga. Ae na auina mai e le Tama Faalelagi Lona Alo, o Iesu Keriso, e fesoasoani ia te oe.
O Le Malamalama o Keriso, saunia e Regan Reichert
Pe na i ai se taimi na i ai sou faafitauli na pei ua matuai telē nauā e taulimaina? Atonu sa pei o sou sese—po o le sili atu foi nai lo lena. Atonu na mafua mai i se tasi e te alofa i ai. Pe atonu foi e sau mai le ola ai i se lalolagi e le atoatoa. I le olaga, e le uma faafitauli. O nisi taimi, e mafai ona lagona ai le faigata tele o lena mea.
O le tala fiafia e lē tatau ona tatou taulimaina na o tatou ia faafitauli. Ua tauaveina e le Faaola i Ona lava luga a tatou agasala, o tatou faanoanoaga, ma o tatou vaivaiga (tagai Alema 7:11–13). Na te silafia mea o loo tatou feagai ai ma mea tatou te manaomia. A o tatou faatuatuaina o Ia ma talia Lona finagalo, e mafai ona Ia laveai i tatou mai soo se faafitauli e fetaiai ma i tatou.
Na Te Laveaia i Tatou …
Mai le Agasala
Sa lagona e se tamaitai talavou e igoa ia Thricia lagona o le tausalaina, maasiasi, ma le le agavaa ina ua uma ona faia se mea sese. Sa amata ona ia faalogologo i musika a le Ekalesia, matamata i vitio a le Ekalesia, ma suesue ma le toto’a i lauga o le talalelei, ae sa lei aluese lava lagona. Na iu lava ina filifili o ia e talanoa i lona peresitene o le paranesi. A o ia feiloai ma ia, sa ia lagonaina le alofa o le Tama Faalelagi ma Iesu Keriso mo ia. O lea la ua ia lagonaina le agaga faafetai ona e ala i le Togiola a le Faaola, ua mafai ai ona faamagaloina ana agasala ma maua le fesoasoani e tulai ae ai i luga atu o ona vaivaiga. “O le mea o loo ou taofimau ai i le taimi nei o le faatasi mai pea lea o Ia ia te au i lenei malaga,” o lana tala lea.
E tofu i tatou taitoatasi ma toilalo ma agasala. Ae e mafai ona fesoasoani le Faaola. E le faapea o le a Ia aveesea uma taunuuga o a tatou amioga, ae e mafai ona Ia fesoasoani ia i tatou a o tatou tatalo i le Tama Faalelagi mo le faamagaloga ma taumafai e faasa’o mea uma.
Na tafetoto le Faaola ma maliu mo au agasala i Ketesemane ma luga o le satauro. A o e filifili e salamo ma mulimuli ia te Ia, “e ui lava ina pei o ofu mumu a outou agasala, e sinasina ia e pei o le kiona” (Isaia 1:18).
Ou Te Le Faasala Foi ia te Oe, saunia e Eva Timothy
Mai le Ita
O nisi taimi tatou te feagai ai ma faafitauli ona o filifiliga leaga a isi tagata . Sa amata ona faamatala atu e se tasi o uo mamae a se tasi o tamaitai talavou ni pepelo e uiga ia te ia i isi teineiti o lana uarota. Sa malamalama lelei le ita o le tamaitai talavou, ae sa ia filifili ia agalelei, ma sa fesoasoani le Tama Faalelagi ma le Faaola ia te ia.
Atonu na i ai ni taimi na e ita ai foi. Atonu e “nono mai” e lou tuagane laitiiti mea e le o onaina e ia pe e le muta le taufaalili o lou uso matua ia te oe. Pe atonu foi ua e oo i ni mea e sili atu ona matuia e ita ai, e pei o le tuulafoaiina po o le sauaina.
Pe a e lagona le ita, tatalo i le Tama Faalelagi. Faalogo i uunaiga e te maua, ma faalagolago i le mana o le Faaola e laveai ai oe. E pei lava ona Ia tauaveina i Ona lava luga au agasala, sa Ia totogia foi le tau mo amioga a isi e faatiga ia i tatou. E mafai ona Ia fesoasoani ia i tatou e lafoai lo tatou ita ma maua le filemu i le taimi e tatau ai.
Mai le Fefe
Sa fefe se tamaitai faifeautalai fou i le tele o mea—o le alu i se nofoaga fou, talanoa i ni tagata ese e uiga i le talalelei—e oo lava i le felelei i vaalele. O lea sa fefe ai o ia ina ua latou fetaiai ma ni faafitauli i se faigamalaga i le vaalele i se tasi aso. Ae i lena taimi sa ia manatua ai le Faaola, ma e ui lava sa fefe pea o ia, ae o lona faatuatua ia te Ia na aumaia ai se lagona o le filemu. “Sa faafilemuina e Iesu Keriso le sami, ma sa mafai moni lava ona Ia faatoafilemuina lou fefe i vaalele,” o lana tala lea.
Atonu e te fefe i mea e pei o nofoaga maualuga, apogaleveleve, po o le tuuina atu o lauga i le Lotu. Pe atonu o loo e feagai ma le atuatuvale pe o e fefe i ni faafitauli ogaoga e pei o ma’i, finauga faaleaiga, po o faigata i lou nuu.
Po o le a lava le pogai o ou popolega, ia manatua e alofa ma malamalama le Faaola ia te oe. Atonu o loo e lagonaina pea le fefe i nisi taimi, ae o lou faatuatua ia Iesu Keriso e mafai ai ona faatagaina o Ia e faatoafilemu ou sami sousou ma laveai oe mai le fefe.
Mai le Faanoanoa
Sa faanoanoa tele Chase ina ua tatala le faaipoipoga a ona matua. I se tasi aso, sa tagi o ia ma tatalo i le Tama Faalelagi. A o ia tatalo, sa ia lagonaina le filemu ma iloa sa popole Iesu Keriso e uiga ia te ia ma iloa le mea sa ia oo i ai.
E tofu uma i tatou ma taimi o le faanoanoa. Ae na tauave e le Faaola i Ona lava luga tiga, puapuaga, faaosoosoga, ma’i, ma le oti ina ia mafai ona Ia “silafia e tusa ai ma la le tino le ala e fesoasoani ai i ona tagata” (Alema 7:11–12). Na te silafia lelei ou lagona ma le auala e fesoasoani ai ia te oe.
Atonu o le a le mou ese atu ou faafitauli, ae o le a Ia “faamāmāina avega ua tuu i [ou] tauau” ma “faamalosi [oe] ina ia mafai ona [e] tauave ma le faigofie [au] avega” (Mosaea 24:14–15).
Ua Toetu o Ia, saunia e Dan Wilson
Mai le Oti
Sa 12 tausaga o Cherry ina ua maliu lona tina. Sa lei avea Cherry ma se tagata o le Ekalesia ma sa ia lagonaina ua le o toe i ai se uiga o lona olaga. Sa ia lagona le nutimomoia ma le faanoanoa ma le tuuatoatasi. Sa ia mafaufau foi e faauma lona lava ola. Ona ia aoao lea e uiga i le talalelei, ma o loo sauniuni nei o ia e papatiso mo lona tina i le malumalu. Ua ia iloa ona sa maliu le Faaola ma sa toetu mai, o le a tatou toetutu uma ai i se aso. O le oti e le o le mutaaga lea.
O le maliu o sē pele o se tasi lea o mea e sili ona faigata e mafai ona tatou oo i ai. Ae e aumaia e le Faaola le faamoemoe. A o tatou faalagolago atu ia te Ia, e mafai ona tatou faamoemoe mo se faavavau e sili atu le fiafia nai lo le mea e mafai ona tatou mafaufauina.
Ioe, o le olaga e tumu i faafitauli—laiti, tetele, ma o nisi e lagona le tele naua e taulimaina. Ae na auina mai e le Tama Faalelagi Lona Alo e fai ma vaifofo ia i latou uma. A o e taumafai e mulimuli ia Iesu Keriso, o le a Ia tuuina atu ia te oe le malosi e tumau ai ma laveai oe i lea taimi ma lea taimi.