“O Lou Mesia Folafolaina,” Mo Le Malosi o le Autalavou, Tes. 2022.
O Lou MesiaFolafolaina
Sa folafola mai e perofeta o le a afio mai Iesu Keriso e aumai le olioli ma le faamoemoe ia te oe.
Aiga o Peteleema, saunia e Kelsy ma Jesse Lightweave
O le Kerisimasi o se taimi matagofie o le tausaga. A o latalata mai le vaitau o le Kerisimasi, matou te tulimatai atu i moli matagofie, teuga fiafia, ma meaai mananaia. O le Kerisimasi o se taimi e tumu i aiga ma uo, pese ma tala, ma le tuuina atu ma le mauaina o meaalofa.
Po o fea lava e te nofo ai, o tu masani matagofie ma tulagaese o le Kerisimasi e te faamanatuina e i ai se agaga faapitoa e uiga ia i latou aua o le Kerisimasi o se faamanatuga o se tasi o mea aupito sili ona olioli i le talafaasolopito atoa—o le soifua mai o lo tatou Faaola, o Iesu Keriso.
O Le Savali a Perofeta
A o lei taitai soifua mai le Faaola, sa molimau mai perofeta o Iesu Keriso o le Mesia folafolaina, “o le ua faauuina,” ma o Lana taulaga togiola o le a togiolaina ai le lalolagi mai le agasala ma le oti ma tatala ai le faitotoa i le tino ola pea ma le ola e faavavau.
O le soifuaga ma le misiona a Iesu Keriso sa avea pea ma savali tutotonu a perofeta. Sa aoao mai Apinati: “Sa lei vavalo atu ea Mose … e uiga i le afio mai o le Mesia, ma o le a togiola e le Atua ona tagata? Ioe, ma e oo i perofeta uma o e sa vavalo talu mai le amataga o le lalolagi—sa latou lei tautatala tetele pe itiiti mai ea e uiga i nei mea?” (Mosaea 13:33).
O le asō, tatou te manatua ai ma lotofaafetai le fanau mai o le pepe na fanau i se fale o manu faatauvaa, ua aui i le ie, ma faataoto i se faatanoa vao. O Lona soifua mai sa matuai taua lava ona o mea o le a Ia oo i ai ma puapuagatia ai ina ia le gata ina mafai ona Ia laveaiina le lalolagi mai le agasala ma le oti ae e aumaia ai foi le olioli ma le faamoemoe ia te oe.
O Valoaga ma Folafolaga
Ua faatumulia tusitusiga paia i valoaga matagofie o le soifua mai o le Faaola ma folafolaga e faatatau i le ituaiga tagata ua i ai o Ia ma le mea o le a Ia faia mo i tatou uma.
Na tau atu e le agelu iaAtamu ia osi taulaga o “se faatusa lea o le taulaga a le Toatasi na Fanaua e le Tama, o le ua tumu i le alofa tunoa ma le upumoni” (Mose 5:7). O nei taulaga “e faasino atu i lena taulaga tele ma le mulimuli … o le Alo o le Atua” (Alema 34:14).
Ata na tusia e Apryl Stott
Sa valoia eIsaia e faapea, “Aua ua fanau mai mo i tatou le tama, ua foaiina mai mo i tatou le atalii: … e igoa foi o Ia o le Silisili Ese, o le Faipule, o le Atua malosi, o le Tama o le faavavau, o le Alii o le Filemu” (Isaia 9:6).
I le ono selau tausaga a o lei soifua mai le Faaola, na aoao mai ai Liae o le a faatuina mai e le Atua “se Mesia, po o, i se isi upu, o le Faaola o le lalolagi” (1 Nifae 10:4).
Sa faaali atu e se agelu ia Nifae se faaaliga lea na ia “vaai ma toe iloa atu le taupou … ua sapasapaia e ia se tamameamea i ona lima.
“Ma sa fetalai mai le agelu ia te aʼu: Faauta i le Tamai Mamoe a le Atua, ioe, o le Alo lava o le Tama Faavavau!” (1 Nifae 11:20–21).
Na aoao mai leTupu o Peniamina, i le 124 tausaga a o lei soifua mai le Faaola, e uiga i Lana misiona taua i le lalolagi:
“Aua faauta, e oo mai le taimi, ma ua le o toe mamao atu, ma le mana, o le Alii … o le a afio mai i lalo mai le lagi … ma o le a o atu i totonu o tagata, ma faia vavega tetele, e pei o le faamalologa o e mamai, faatutuina mai o e ua oti, faasavavaliina o e ua pipili, ma faapupula e ua tauaso, ma faia ia faalologo e ua tutuli, ma faamalolo ituaiga uma o mai eseese” (Mosaea 3:5).
Sa tautino maiApinati : “O Ia o le malamalama ma le ola o le lalolagi; ioe, o se malamalama e lē gata, e lē mafai lava ona faapouliuligia; ioe, ma se ola foi e lē gata, e lē mafai ona toe i ai se oti” (Mosaea 16:9).
Sa faia e se agelu lenei folafolaga ia Maria: “Faauta, o le a … e fanauina se tamatane, e te faaigoa ia te ia o Iesu.
“E sili o ia, e ta’ua foi o le Alo o le Silisili Ese” (Luka 1:30–32).
O Folafolaga ua Faataunuuina mo Oe
A tatou faamanatuina le soifua mai o Iesu Keriso, ua tatou faamanatuina foi folafolaga faaperofeta uma na faataunuuina e Iesu Keriso e ala i Ana aoaoga ma le Togiola.
Na aoao i tatou e le Faaola ia alolofa ma faia mea lelei i le tasi ma le isi. Na Ia tuuina mai ia i tatou poloaiga, ma afai tatou te mulimuli i ai, e mafai ona tatou lagonaina atoatoa Lona alofa atoatoa ma le loloto ma maua le ola e faavavau i se aso. O Ana aoaoga ma faataitaiga e taialaina ma faamalosia ai i tatou i le ala e tatau ona tatou ola ai.
Ona saunia lea e Iesu Lana taulaga togiola. Sa Ia faamaligiina ma le naunautai Lona toto mo le faamagaloina o a tatou agasala (tagai Mataupu Faavae ma Feagaiga 27:2), ma ofoina atu le meaalofa o le salamo ma faamanuiaga o le faamagaloga (tagai Alema 34:15–17; 42:22–24). Ma e ala i Lana Togiola, ua Ia tuuina mai ai ia i tatou le meaalofa o le tino ola pea. O se vaega o Lana Togiola, o Iesu Keriso na “mafatia i tiga ma puapuaga ma faaosoosoga o ituaiga eseese uma” (Alema 7:11). Sa Ia faia lenei mea ina ia mafai ona Ia lagonaina patino ma iloa o tatou faaosoosoga, o tatou tauiviga, o tatou lototiga, ma o tatou mafatiaga, ma le auala e fesoasoani ai ia i tatou.
Ia manatua i taimi uma, na oo ma le naunautai le Faaola i nei mea uma mo oe ona e alofa o Ia ia te oe. O Ia o lou Faaola. Po o le a lava le mea o loo e feagai ai, o loo i ai o Ia iina e fesoasoani ma faamalosia oe. E ala mai ia Isaia, na fetalai mai le Faaola, “Aua e te fefe: aua Ou te ia te oe: … Ou te faamalosia oe; e moni, Ou te fesoasoani ia te oe” (Isaia 41:10).
I Le Lalolagi e Pei ona Faia i le Lagi, saunia e Justin Kunz
Saili Atu i le Mesia
Faatasi ai ma perofeta anamua ma aso nei, ou te olioli e molimau atu i le soifua mai, soifuaga, maliu, ma le Toetu o Iesu Keriso. O Ia o le Mesia folafolaina ma sa i ai pea lava, ma o le a avea pea lava, “o le malamalama, o le ola, ma le faamoemoe o le lalolagi.”1
Faatasi ai ma Moronae, ou te valaaulia “outou ia outou saili lenei Iesu o le ua tusi i ai le au perofeta ma aposetolo, ina ia i ai ma tumau ia te outou e faavavau le alofa tunoa o le Atua le Tamā, ma le Alii o Iesu Keriso, ma le Agaga Paia, o le ua molimau ia te i laua” (Eteru 12:41).
Ia tatou manatua uma mea na faia e lo tatou Faaola mo i tatou ma alolofa ma auauna atu ia te Ia i lenei Kerisimasi ma aso uma.