“E Mafai Faapefea Ona Ou Faasoa Atu le Tusi a Mamona?,” Mo le Malosi o le Autalavou, Tes. 2022.
E Mafai Faapefea Ona Ou Faasoa Atu le Tusi a Mamona?
O le auala lenei na auai faatasi ai le autalavou i le lalolagi atoa e tuuina atu i le Tusi a Mamona se leo fou.
E te manatua le taina e Peresitene Nelson o le pese “Faamoemoe o Isaraelu” i le piano i le Faaaliga Musika a le Autalavou i le lalolagi atoa i le aso 17 o Mati, 2021? O le valaauina o i tatou o le autau talavou a le Alii, sa ia valaaulia ai i tatou e tuu atu i le Agaga e taitaia i tatou a o tatou fesoasoani e faapotopoto Isaraelu i nei aso e gata ai.
Atonu e pei o le toatele o outou, sa ou mafaufau po o le a se mea e mafai ona ou faia o se tagata e 15 tausaga le matua e mulimuli ai i le valaaulia a le perofeta, aemaise lava i le totonugalemu o se faamai pipisi i le lalolagi atoa.
I se tausaga na muamua atu, sa valaaulia ai foi e Peresitene Nelson le lalolagi e #FaalogoIaTeIa, o lona uiga ia faalogo i afioga a le Alii o Iesu Keriso. Sa ou iloaina o le Tusi a Mamona o se tasi lea molimau ia Iesu Keriso. Na oo mai le manatu ia te au e fesoasoani i tagata ia faalogo i le siufofoga o le Alii e ala i le faasoaina atu o le Tusi a Mamona i se auala fou: e pei o se podcast o loo pueina e tupulaga talavou.
E faaopoopo atu i lipine na gaosia lelei o le Tusi a Mamona o loo maua mai le Ekalesia, sa ou manatu e manaia le faalogo i le tusi o faitauina e talavou o aso uma e pei o oe ma au, i le ala ua tatou masani ai. E le o taimi uma e atoatoa ai le tatou faitau, ma e le iloa e tagata uma pe faapefea ona faaleo sao upu uma. Ae e le afaina lena mea aua e leai lava se tasi o i tatou e atoatoa. Ou te manatu o le le atoatoa i nisi o leo pue—ou te lagona ai le pei o loo ou faalogologo i se tasi o au uo o faitau.
Sa tele ni galuega na faia e le galuega faatino. E iloa ai o le talosagaina, suia, faapotopotoina, lolomiina, ma le talimalo i se faasalalauga i faamaumauga mai tagata eseese e 250 o se galuega tele. O le taunuuga o se faamaumauga o le anotusi atoa o le Tusi a Mamona o loo faaalia ai le aufaitau mai setete e 15 o le I.S. ma atunuu e 10 mai le salafa o le lalolagi. E mafai ona faalogoina ia lipine i luga o le uepisaite www.teensreadthebook.com ma i luga o faasalalauga tetele uma o loo faalogologo ai i tulaga i lalo o le Faitau e le Autalavou le Tusi.
O McKay (ofutino samasama i le ogatotonu) o potopoto faatasi ma isi talavou o e sa fesoasoani i le podcast. Sa latou fiafia i le avanoa e talanoa ai e uiga i le faasalalauga ma manatunatu i le faamanuiaga o le galue ai.
Ou te fiafia lava e faalogo i le tele o leo ma tautalaga a le autalavou o e na auina mai faasalalauga na pueina. O le iloaina o le a faalogoina o latou leo i le salafa o le lalolagi, o le toatele o le au faitau sa galulue malosi ina ia sao lelei a latou faasalalauga na pueina. O nisi, e pei o Tomasi mai Niu Sila (na faitauina le 3 Nifae 20) po o José mai Peru (na faitauina le 3 Nifae 23), na faataitai mo le tele o itula po o aso a o lei pueina. Sa feagai se vaega o talavou e toa 10 mai Korea i Saute ma le luitau o le Igilisi e le o le latou gagana muamua. O la latou vaifofo o le galulue faatasi, o le pueina o nai fuaiupu taitasi i le taimi e tasi ma tuufaatasi i latou i le mea na avea ma 2 Nifae 28 ma le 29.
O lau sini ina ua ou amataina le galuega faatino, o le fesoasoani lea i tagata ia lagona le Agaga ma faalatalata atili atu ia Iesu Keriso. O le vaaia o le autalavou, o le toatele o i latou ou te le iloa, o tali mai i lau valaaulia na faaali mai ai ia te au o latou lagona loloto e uiga i le Tusi a Mamona. Ua sii mai nei i lalo a latou upu ma ua faalogologoina i le faitau afe o taimi. O loo latou fesoasoani i tagata ia lagona le Agaga o le Atua.
Sa tusi mai se tasi o faifeautalai ua maea lana misiona ia te au ma faapea mai, i masina talu ai nei sa ia “tatalo mo se auala fou e faitau ai [le Tusi a Mamona] po o se auala fou e suesue ai. O lenei galuega faatino ua avea ma se tali i a’u tatalo.”
Ou te faafetai ia i latou o e na saofaga i lenei galuega faatino ma mo le auala na ou lagonaina ai le fesoasoani a le Alii i le faia. Ua faamamaluina au e avea ma se vaega o le autau talavou a le Alii, o loo tutu faatasi ma isi o e fiafia i le Tusi a Mamona. Ua ou aoaoina foi a tatou tali atu i valaaulia mai le perofeta a le Alii, o le a taialaina e le Agaga a tatou taumafaiga.
Mo au lava ia, ou te iloa o le Tusi a Mamona e mafai ona fesoasoani tatou te lagona ai le Agaga ma faalatalata atili atu ai i le Tama Faalelagi ma Iesu Keriso. O nisi o taimi sili ona fiafia o lou olaga na i ai, o le taimi na ou faitau ai e le aunoa mai le Tusi a Mamona. Ou te faamoemoe o le a faalogologo i tatou uma le autau talavou a le Alii i le siufofoga o le Alii ma lagonaIna Lona malosi e ala i upu o le Tusi a Mamona.
E alala le tusitala i Kalefonia, ISA.