Tuusao i le Mataupu

O le a se mea tatou te iloa e uiga ia Maria, le tina o le Faaola?

Ia Faia ia te Au, saunia e Liz Lemon Swindle

O le tamaitai talavou o Maria, o le sa filifilia e avea ma tina o Iesu Keriso, sa sau mai Nasareta ma o se e tupuga mai ia Tavita. Na valoia e perofeta i le Feagaiga Tuai e faapea o le a afio mai le Mesia e ala i le laina tautupu o Tavita (tagai, mo se faataitaiga, Isaia 11:1). I le avea ai ma matua faalelalolagi o Iesu, na tuu atu ai e Maria ia te Ia lena gafa.

Ma le isi, e pei ona ta’u atu e le agelu o Kaperielu ia Maria, “O oe … ua alofaina tele oe, ua ia te oe le Alii: amuia oe i fafine” (Luka 1:28). Na maua e Maria le fiafia o le Alii ona sa agavaa o ia, lotomaualalo, lototoa, ma faamaoni. Ma sa ia faaalia nei uiga i lona olaga atoa.

Sa talia ma le lotomaualalo e Maria le mea na poloaiina o ia e le Atua e fai (tagai Luka 1:38). Ma sa ia agai i luma ma le lototoa ma faalagolago i le Atua, e ui lava o tulaga o lona maitaga semanu e mafua ai ona maasiasi o ia aua e lei faaipoipo lava o ia (tagai Luka 1:46–55). Sa ia usitai foi ma le faamaoni i le Atua. Sa ia tauaveina Iesu, tausi ia te Ia, aoao o Ia. I le faaiuga o Lona soifuaga faaletino, sa ia faatasi ai ma Ia. Sa nofo o ia faatasi ma Ana Aposetolo ina ua mavae Lona toetu mai ma afio atu i le lagi (tagai Galuega 1:14). E ala i lona agalelei, sa matuai alofagia moni lava o ia.