Fesili ma Tali

“Aisea e taua ai tulaga faatonuina o le Ekalesia? E faapefea ona ou maua se molimau e uiga i ai?”

“E manaomia ona tatou taliaina o poloaiga a le Atua ua le na o se lisi umi o ni manatu lelei. O poloaiga e le o ni “māūnu faatogafiti o le olaga” mai se itulau i le Initoneti po o ni upusii faatupu lagona mai se laupapa o le Pinterest. O ni fautuaga faalelagi, e faavae i luga o upumoni e faavavau, ua tuuina mai e aumai ai le filemu.”

O Peresitene Dieter F. Uchtdorf, i le taimi a o avea ma Fesoasoani Lua i le Au Peresitene Sili, “Ola Fiafia i leTalalelei,” konafesi aoao Oke. 2014 (Ensign po o le Liahona, Me 2014, 122).

Latou te Siitia ma Faagaeetia i Tatou

“E taua tulaga faatonuina ona latou te siitia ma faagaeetia i tatou. Latou te taitai atu foi i tatou e faia filifiliga sao, lea e fesoasoani ia i tatou ia latalata atili atu ai ia Keriso. E mafai ona tatou maua se molimau o tulaga faatonuina e ala i le faitauina ma le suesueina o le tamaitusi Mo le Malosi o le Autalavou , lea e faaalia ai mataupu faavae taua ma tulaga faatonuina mo i tatou e mulimuli ai.”

Samuel C., 15, Pasila

E Tausia i Tatou e le Alii

“O tulaga faatonuina o le Ekalesia e taua tele i lo tatou soifua maloloina faaletino ma faalemafaufau. E finagalo le Alii ia tatou soifua maloloina ma fiafia, ma Na te foafoaina tulaga faatonuina e tausia i tatou! Ina ia i ai se molimau i nei upumoni, e tatau ona tatou tatalo ia iloa pe moni, faitau tusitusiga paia, ma tausi i poloaiga. E finagalo le Alii ia i tatou ia i ai se molimau o nei upumoni.”

Dana S., 12, Atenitina

Saili mo Faamanuiaga

“E taua tulaga faatonuina a le Ekalesia aua latou te fesoasoani ia i tatou e faaleleia i tatou lava ma avea ai e faapei o le Alii o Iesu Keriso. Ua ou maua se molimau o lenei mea a o ou vaavaai mo faamanuiaga e afua mai i le mulimuli i tulaga faatonuina o le Ekalesia. Ua faamanatu mai ai ia te au le faamoemoega paia o tulaga faatonuina taitasi ma uunaia ai au e tumau i luga o le ala o feagaiga.”

Christian R., 18, Iuta, ISA

O Tulaga Faatonuina e Aumaia ai le Fiafia

“O tulaga faatonuina o le Ekalesia tatou te latalata atili atu ai ia Keriso. Latou te fesoasoani ia i tatou e faaogatusa i tatou lava ma le fuafuaga a le Tama Faalelagi, lea e aumaia ia i tatou le fiafia e faavavau. A tatou filifili e mulimuli i nei tulaga faatonuina, e mafai ona tatou faamalosia lo tatou faatuatua ia Keriso ma avea atili e faapei o Ia.”

Kenison M., 17, Virginia, ISA

Faatino le Faatuatua, ma Faalagolago i le Finagalo o le Atua

“Afai ou te filifili e tausia tulaga faatonuina o le Ekalesia, o le a ou maua se molimau e uiga i ai e ala i le Agaga Paia. Ua tatou iloa mai le Eteru 12:6 tatou te ‘le maua se molimau seia uma ona tofotofoina lo [tatou] faatuatua.’ Afai ua lava lo tatou faatuatua e talitonu ai o nei tulaga faatonuina o le finagalo lea o le Atua mo i tatou, o le a tatou maua se molimau o na tulaga i le taimi a le Atua.”

Camilla P., 17, Hawaii, ISA

Usitai ma le Talitonu

“Ua i ai tulaga faatonuina o le Ekalesia e fesoasoani ia i tatou e tumau ai i luga o le ala o feagaiga. E tusa lava pe tatou te le malamalama i taimi uma pe aisea e taua ai se tulaga faatonuina patino, e mafai ona tatou maua se molimau e uiga i ai e ala i le usitaia o lena tulaga faatonuina ma e ala i le faalagolago i lo tatou Tama Faalelagi, Iesu Keriso, ma o tatou taitai o le Ekalesia.”

Anwyn T., 16, Florida, ISA

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“O faatosinaga le lelei o loo i soo se mea i ala o faasalalauga. E mafai faapefea ona ou taofia i latou mai le faatosinaina o au?”

Auina mai lau tali ma le ata ae lei oo i le aso 15 o Ianuari, 2023.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.