“Katoma,” Ibukin Kakorakoraia Kairake, Tianuare 2023.
Katoma
Tojonirina R.
17, Madagascar
Tamnei iroun Valisoa Rakoto
Arau bon Tojonirina mai Antananarivo, Madagascar. I kan ongoongora ni kuuna ni motirawa ni kakibotu, wareware ni booki, ao n takakaro n te bwatiketibooro ao te butibooro.
Ngke waniua au ririki, I rineia bwa N na bwabetitoaki. Ngke I kateboaki iaan te ran, I namakina te kukurei ae onoti are e roko man te Tamnei. E aki maan imwiin bwabetitoau, e a motirawa tinau. I namakina te nanokawaki, te rawawata ao te bwarannano. Akea te ataei ae ataia bwa tera aron aia namakin ngkana e bua tinaia.
E ngae n anne, teniua te ririki imwiina ti nako n te tembora ao ni kabaeaki ara utu. E oki te namakin ae onoti mairoun te Tamnei n te bong anne, ao I namakinna bwa e mena tinau ikekei irarikiu inanon te tembora. I karekea te onimaki bwa N na manga nooria n te bong teuana.
I kataia n taainako n ururinga te bwai are I namakinna inanon te tembora. I kateimatoa tikun te Tamnei irarikiu man warekan koroboki aika tabu ao ni kamatebwai kakabwaia man te tembora. Ngkana I kamangaoaki n rongorongo man te aonaaba, I kamatebwai koroboki aika tabu ao n onimakini aia taeka burabeti. A kaungaai ao ni kakorakora au onimaki.