“Bwaintituaraoi n Tamnei i Guam,” Ibukin Kakorakoraia Kairake, Tianuare 2023.
Bwaintituaraoi n te Euangkerio i Guam
Iaon aban marawa, e kunea te reitaki ma tabeman ao te rau Franchesca rinanon te euangkerio.
Tamnei iroun Cody Bell
Ma bikena, ranna ae rau, ao bwanganimatang ni kawai, te aba ae Guam e taraa n titebo ma te tabo ni motirawa ae ko kan nako iai, ma bon te bong ae taneiai iai Franchesca N. ae 15-ana-ririki! E tangira te bike ae tikiraoi. “Bon te bwai ae kakukurei te otinako ao ni mamataku ni bwain te aonaaba aei.”
E bungiaki ao n ikawairake i Guam, e tangiria ni karaoi bwaai itinaniku. “Ngai te aomata ae I tatangira bwaain tinaniku, ngaia ae I bon aki tatangiria n tiku inanon te auti,” e taku. E tatangira te aoao n te booti i marawa, te tebo n ae ora, ao te nako n nakonako n ae abwabwaki ma ana karo ao tarina aika uoman. A rangi ni kan nanakonako riki n neweabai tenaan nangananga ni kawai ake a mena ni bwangabwangan atiibu.
“I bon rangi n rereitaki riki ma tariu. Bon raoraou aika moan te tamaroa,” e taku. Tarina are ikawai riki e reirei i Hawaii. “Te bwai n reitaki iaon te intanete bon te bwai ae kanakoraoa ngkai aron ara reitaki,” e kabwarabwaraa Franchesca. E tangiria ni kateimatoa ana rereitaki mangaiia.
Te Banna ni Katooto nakoia Tabeman
Franchesca bon ataein te reirei n ana reirei te Katorika aika tii aine kaaina ao ai ana kauoua n ririki n reirei, ao bon tii ngaia naba ae kaain Ana Ekaretia Iesu Kristo Ibukiia Aika Itiaki ni Boong aika Katira. Ngkai ti ngaia kaain te Ekaretia n ana reirei e kuri ni kangaanga aron te reitaki irouna n te moan tai, ma e taneiai n taraaki ni kaokoro mai irouia tabeman. Ma n raonaki ma aia iango tabeman ao a taku bwa kaanga iai teina ae kan ngkai bon kaain te aro ngaia ae kaokoro.
Te katoto, a bon tabe ni mooi kobee raoraona inanon aia tai ni katawanou n te bong teuana, ao e a reke naba ana tai Franchesca ni kabwarabwaraa Tuan te Mauri nakoia.
E rineia naba Franchesca bwa e na bon aki tinaraa e ngae ngke a rangi ni kakaraoia aomata tabeman n aia reirei. E taekinna, “E a mwaiti au tai ni kataaki mai imwaaina, ma te bwai ae kakorakoraai bon au reitaki ae onoti ma Tamau are i Karawa rinanon te tataro.” E reitia man taku, “I aki riai ni karaoi bwaai aikai, bwa ibukina bwa bon mwakuri aika bure ao ibukina naba bwa I rangi n tangira Tamau are i Karawa ao Iesu Kristo.”
Kakaeaia Raoraou
N tabetai ao e konaa n reke ae akea raraona ngkai bon tii ngaia kaain te Ekaretia n ana reirei. Ngke e moan rin Franchesca n ana reirei, ao e rangi n namakina te titiku n tii ngaia inanon tain te buti n aoraki ao bon akea naba raoraona. E rangi n tei nangin ae e na maroroakinna ma ana karo taekan te bwai aei, ma ngke e tataroakinna, ao e namakina te wirikiriki bwa e na bon riai n tuangiia aron ana namakin.
N aia utu, a baireia bwa a na tataro ibukina bwa e aonga ni kona ni kai reke raoraona ake e na kona n onimakiniia. Ma bon te kamiimi, bwa ni bon te tai naba are moti iai aia tataro, ao a ongo naba te karebwerebwe iaon aia mataroa. Ao ngaia bon raraona temanna man te uoote teuana, are e roko ma uotana tenaan bitiketi! E ataia bwa Tamana are i Karawa e a tia n ongo ana tataro.
Bon iai naba kaain ana titeiki Franchesca aika kaain Kuaam ao tabeua riki man aban nako te betebeke tabeua. Ana uoote iai te bootaki n roronrikirake ae uarereke, ma ana uoote anne bon ana utu. A rangi ni bobonanon membwa, ao anne ae e kaungaa nanona bwa e na nanako n taromauri ni katoa Tabati. Bon banna ma katooto aika korakora ngaiia inanon maiuna.
E kunea naba kakorakorakina Franchesca inanon ana tieminarii kiraati. “Te tieminarii bon teuana te bwai ae moamoa irou ni katoa wiiki,” E taku. “Ngkana I kaea te tieminarii, ao a bua namakinan te raraoma irou.”
E rangi ni mamate nanona ni iriira ana teiminarii, n te onrain ke bon n te kiraati, ao e aki kona n ae e na aki roko ni kiraati ma tii ngkana e bon riai. E taku bwa a rangi n nakoraoi kanoan ana wiiki bukina bwa e rineia bwa e na mena n te tieminarii. Ngkana e roko ni kakuana kanoan ana wiiki, ao e baireia raoi bwa e na bon riai n nako ni kaea ana tieminarii bwa e namakina te rau iai.
Bon iai naba aia bootaki ni kakukurei kairake ake a kakaraoaki ni katoa uoua ke teniua te tai n te namwakaina. Franchesca e bairea karaoan kanoan teuana—te tairiki are e na boo te takakaro iaon te raubaba ao ake a irekereke ma koroboki aika tabu. E aaki rangi n rereke aia tai ni kakaitibo inanon tain butin te aoraki, ngaia are ngkana e reke aia tai ni kaitiboaki, ao bon te tai ae rangi ni kakukurei irouia.
Ataeinaine a rawea tamneia n te witeo are a anene n riaia ni iriira kunan te Ekaretia ibukiia te roro n rikirake ae “Good Day” ao ni katokaa iaon te intanete bwa ai aanga ni tibwaa aia tangira ma aia boutoka nakoia tabeman. “Bwaai n reitaki iaon te intanete a bon kona naba ni kakorakorai aia reitaki aomata, ai moaraara riki n taai ake tiaaki kona ni kaitibo iai ma ara koraki ni kabane.”
Te Ingainga Nakon te Tembora
N tain te maungatabu ni kabuta are karaoaki n Okitobwa 2018, e katanoataaki taekan te Yigo Guam Tembora. E taku Franchesca, “A rangi ni ingainga ataein te roro n rikirake—ti bon bane n tataroakinna.” Imwiin anne, e bon bane ana tai ni matakuakinna ao n tataningaa katiaan aia temobra, are e tia karaoakina inanon Meei 2022.
A kaman kakaraoa te mwamwananga nako Biribin n taai aika nako ibukin kaean te tembora. A bon karaoi aia waaki ni karikirake ibukin kabanemwane ni mwanangaia, n aron te kaboonakoan kabuki ma te kaitiaki kaa. Bukina ngkai bon te mwananga ae bubura, ao a na bon riai ni kabanea teuana te wiiki inanon mwanangaia. E rangi ni korakora nanon Franchesca ngkai e a konaa n rereke rokona n te tembora ao ni karekei kakabwaia ibukin te mwakuri ni bwabetito ibukiia ana bakatibu.
Te Rau rinanon te Tataro
E taku Franchesca bwa e rangi ni mwaiti ana tai ae raraoma iai, ma e a tia te tataro n rangi n ibuobuoki nakoina. “E bon rangi ni korakora mwaakan te tataro. Tii te taetae ma Tamara are i Karawa ao e rangi ni karekea te rau nakoiu. E ongo ao e kona ni buokiira.”
E reitia n taku bwa “Ngkana I tataro, ao e aki kona n ae e a bon roko naba boona n aron anne. “Bon namakinan te tamnei ni kairiiri ae buokai; namakinana ae iai Ngaia ao Ana tangira. E anganai te rau ao te bebete.”
Ana taeka n reirei nakoia raona n te roro n rikirake: “Tataro nakon Tamara are i Karawa. Taetae Nakoina. E na bon rangi n ibuobuoki.”
E taku naba bwa tinana bon te tia tebeaianga ni bwaai aika riki naba ma bon te tia boutoka ae korakora. “Tinau bon te kakabwaia nakoiu mai iroun Tamau are i Karawa, ao e a mwaiti ana tai ni kaira kawaiu.”
“Te utu bon te kakabwaia,” e taku. “N au iango ao e rangi ni kakawaki ae ko na tibwaua am kangaanga ngkana ko kaitara ma kataaki aika matoatoa nakon am utu ke raoraom.”
E tangiria Franchesca bwa a na karekei kakabwaia aomata ni kabane ni katoa bong. “E rangi ni kai reke kakabwaia ni katoa bong. Te nako n reirei bon teuana te kakabwaia ae rangi ni kakawaki. A bon mwaiti naba kakai aika rangi ni kamimi ngkana ti karaua raoi n tarai. I rangi ni kakaitau ngkai I kona ni karekea te Euangkerio inanon maiu.”