“Irira te Ota ni Koaua,” Ibukin Kakorakoraia Kairake, Tianuare 2023.
Nakomai, Iriirai
Iriira te Ota ni Koaua
Otan Iesu Kristo E tauraoi n tainako ibukim—ngkoananoa, ngkai, ao n aki toki.
Iangoi Aroka aika Kiebu, iroun Haley Miller
Ngke e a bung taai n te Tabati teuana n 1948, I tabe n nakonako irarikin te karaanga ae arana te Trent River i Nottingham, England. Bon te mitinare ngai ao ai tibwa 20 au ririki ni maiu n te tai anne. E bon rangi ni kakua kanoan te bong aei, ma I rangi ni kukurei ao man rau nanou n te mwakuri are I karaoia.
Inanon au tai n nakonako irarikin te karaanga, I mwanewea au tataro inanou. Ni kakaean angau bwa na karekea ana kairiiri te Uea, I titiraki, “I karaoa ngkai te bwai ae Ko Tangiria?”
I kaonaki n namakinan te rau ao te ota are e a bon karina naba n roko irou. N te tai naba anne, I a ataia bwa e kinaai Iesu Kristo ao e tangirai. Bon akea te kaotioti ae I nooria ke tao n ongo te bwanaa, ma e bon kamatoaaki au koaua iroun Iesu Kristo e ngae ngke bon akea ni kaoti imatau ao n ongo ae wetea arau.
E moa man te bong anne, au rinerine ake I karaoi a bon kairaki man au atatai iaon kinaakin Iesu Kristo ae Natin te Atua. E rikirake Tangirakina ao ni korakora nakon ae I kona ni kaotia n au taetae nikawai. Bon au Uea, au tia kamaiu, te tia Kabooira, ao bon raoraou.
Inanon ririki aika nako ao bon ni kabutaa te aonaaba, I a tia ni kaota au koaua ibukin te Tia Kamaiu. I ataia ae bon ngaia te ota ae koaua man akea tokina ae “ota ibuakon te roo” (Ioane 1:5). Bon te tibwanga teuana te nako Nakoina, n Iriiria, ao n namakina Otana inanon maiura.
Te Koaua Iaon te Ota
Ni katoaa 24 te aoa, e bitaki te ngaina nakon te bong ao te bong e manga bitaki nakon te ngaina. Ngkana ti a mena inanon rotongitongin te bong, ti bon aki raraoma ngkai e a raba matan taai mai iroura. Bwa ti ataia bwa e minomino te aonaaba ao taai e na manga kaota otana nakoira. Ti aki kona n ae ti a bon nonoora naba ke n namakina te ota, ma bon iai n taainako ikekei.
Bon titebo te koaua aio naba n te tamnei. Inanon ririki aika mwaiti n nako ao I kauringaki ngke ti tabe n tataraa karawa ngai ao kaainabau, ae Barbara, inanon te tairiki teuana. Mirion itoi ake ti noori a bon kaotii otaia aika takiakia man tamaroa. E okirikaaki au iango ni miimi nakon Iesu Kristo.
E memena Teuarei “iroun te Atua ngke a tuai ni karikaki bwaai” (Ioane 1:2). Man Ana kairiiri Tamara are i Karawa, E karika te aonaaba ao aonaaba ake aki kona ni warekaki (taraa Mote 1:33). Bon Ngaia te mwaaka are e kaotaa taai, namwakaina, ao itoi (taraa Reirei ao Berita aika Tabu 88:7–10). Ngaia bon te ota ao te maiu ni bwaai ni kabane (taraa Ioane 1:3–4; Reirei ao Berita aika Tabu 93:10). E taetae Iesu Kristo, “Otan te aba Ngai: ane irai ao e na bon aki nakonako n te ro, ma e na karekea te oota ni kamaiu” (Ioane 8:12).
Inanon boong aikai, ao e teimatoa Tatan ni mwakuri korakora ni kataia n rabuna otan te Tia Kamaiu. Ma ko bon aki kona n roko inanon te tabo ae rotongitong ae akea iai otan Kristo ngkana ko nakoina n Iriria. E tatauraoi otana n tainako ibukim.
Kamataata n te tamnei iroun Adam Koford
E Kaotaa Kawaira
Ao natin te Atua, Iesu Kristo e neboaki ma te Atua te Tama, “ngke akea aonaba” (Ioane 17:5). E bon rang ni karinerine nakon Tamana (taraa Ioane 5:30) ao e anga nanona bwa e na nakon te aonaaba. E kakea Mimitongina bwa e na bungiaki n te tabo ae mangori ngke tinana “e niria n te kunnikai ae te ninira, ao e kawenea ni nen te man n amarake” (Ruka 2:7).
Inanon Kairakena, Ao e karaoi “ana bwai [Tamana]” (Ruka 2:49) ao ni kamimiia tekoraki ake a ongoraa Ana reirei. Inanon Ana tai ni mwakuri, bon iai Irouna te mwaaka ni karaoi kakai, ni kakabwaia ao ni katoki aoraki, ni kautiia maate, ao ni katauraoa te Mwakuri ni kamaiu ibukira.
Inanon ana mwakuri te Tia Kamaiu are e a tia n taekinna ao ni karaoi, riki n Ana mwakuri ni Kamaiu ibukira, ao E a bon tia naba ni kaota kawaira nakon Tamara are i Karawa. Ana banna ni katooto ao Ana reirei e na buokiira n ataa te bwai ae ti riai ni karaoia n okira Tamara are i Karawa.
Tibwaua Otana
N te tai are ti namakina iai otan Natin te Atua inanon maiura, ao ti riai ni manga karaoa ara mwakuri n tibwauaa te ota anne nakoia tabemwaang. I tangira au mwakuri ni mitinare i Engiran. I tangira au mwakuri ngke I riki bwa te beretitenti n te mition iaon Kanata. Ao I rangi n tangira naba te wewete are I mena iai ngkai ae te membwa n te Kooram n Abotoro n Tengaun ma Uoman, are anganai au tai bwa na kaota koauan Iesu Kristo nakon te aonaaba ni kabutaa.
E reirei te Tia Kamaiu, “Nooria Ngai te oota are kam na taua i eta—are te bwai are kam a tia n noorai bwa I karaoia” (3 Nibwaai 18:24).
E toka iaora otan te Tia Kamaiu ni katoa tai are ti tataro iai ao n ukora Ana taeka inanon booki aika tabu . E toka iaora Otana ngkana ti tangira n aron Ae E tangira naba, ni kakaota ara koaua, ao n anga te mwakuri n ibuobuoki ibukiia tabeman. E bon kaotinakoa naba te roo mai inanon maiura ao ni katikiia te koraki ake a ukoukora naba Ana ota.
Akea tokin Otana
E tauraoi n tainako ikekei otan Iesu Kristo ibukim. Bon akea—ae bon akea—te korakora riki teuana ae kona n tiringa Otana. E na teimatoa n otanako n akea tokina. Iesu Kristo “boni ngaia ootan ao maiun te aonaaba; … te oota ae aki totoki, ae aki kona ni karooaki” (Motiaea 16:9).
I rangi ni kakaitau ibukin te namakin are I kaitibo ma ngaia ngke te mitinare ngai are I a reiakina iai taekan aei bon irou. I a ota riki iai n te bong aei ngkai I a tia n rinanon te maiu ma kaanganga ao kakukurei ake I kaitibo ma ngaai.
Ngkana ko aki ataa kawaim ke n ataa te bwai ae ko na karaoia, katokai matam iaon te Ota ni Kamaiu ae Otan Natin te Atua. Ngkana ko tangiria n Nakoina ao n Iriira Otana, ao E na bon Kaotaa kawaim.