“Ara Berita bwa Ti na Riki bwa te Ota,” Ibukin Kakorakoraia Kairake, Tianuare 2023.
Nakomai, Iriirai
Ara Berita bwa ti na Riki bwa te Ota
Iesu Kristo bon Otan te Aonaaba. Ti na bane ni karaoa are ti kona n tibwa Otana.
A roko te uanao n aomata man taabo nako bwa a na noora te mwaane ae mena n te rereua are e kunnikainna ni bwaai aika a karaoaki man buraen te kamero ao e kakang rokati ao ana karewe te manibeeru. A kukurei n ongora ana reirei n taekan te Tia Kamaiu, te rairannano, ao te bwabetito. Imwiin te ongora irouna, angiia aomata a tangiria ni kan bwabetitoaki. E bwabetitoaki naake a tia n rairinanoia. Aran te mwaane aei bon Ioane te Tia Bwabetito.
N te bong teuana, ngke e bwabetitoiia aomata Ioane n te Karanga are Ioretan, e roko Iesu ao e tua bwa e na bwabetitoaki. E miimi Ioane. E ataia bwa Iesu e a tia n ongotaeka nakon ana tua te Atua ao n aki kainnanoa te rairananona. N te koaua, e taku n ana iango bwa e riai ni bwabetitoaki iroun Iesu (taraa Mataio 3:14)! E kabwarabwara Iesu bwa e tua te Atua bwa a na bwabetitoaki aomata ni kabane, bwa Ngaia naba e riai ni bwabetitoaki bwa e na katea te katooto. E kariaia Ioane ao e bwabetitoa Iesu n te Karanga are Ioretan.
Bwabetitoan Iesu Kristo e reireiniira bwa ngaira, naba, ti riai ni bwabetitoaki. Ngke ko bwabetitoaki, ko karaoa te berita ao ni kaota nanom bwa ko na toumwiin ana katooto te Tia Kamaiu, tiaki n tii tain am bwabetito ma n tainako.
Berita ao Tibwanga
N tain te bwabetito, ko karaoa te berita ae tabu ma te Atua ao ni berita bwa ko na katokaa arana iaom (taraa Motiaea 5:8–10). Ko berita naba bwa ko na kaawakin Ana tua, n tei bwa te tia kakoaua ibukin te Atua “n tainako ao ni bwaai nako, ao n taabo nako” (Motiaea 18:9), ao n toro Irouna (taraa Motiaea 18:8–10; Reirei ao Berita aika Tabu 20:37).
Ni katoa wiiki n tain te taromauri, ko kabooua am berita ngkana ko kana te toa (taraa Reirei ao Berita aika Tabu 20:77, 79). Ngkanne, “Kam waaki nako man teimatoa iroun Kristo, ma te kantaninga ae tamaroa ma ni kororaoi, ma tangiran te Atua ma aomata ni kabane” (2 Nibwaai 31:20).
Ni waakin baika a riki, ko na karekei tibwanga aika a mwaiti n toumwiin ana banna ni katooto te Tia Kamaiu ao ni kaota am tangira ibukina ao ibukiia naake irarikim. E taku Unimwaane Jeffrey R. Holland man te Kooram n Abotoro ake Tengaun ma Uoman: “Iai kaain rarikira aika a na kakabwaiaaki, ataei aika a na kamanoaki, naake a maiu ni kainnano ake a na boutokaaki, ao te koaua ae na katanaki. Iai kaairua ake ti karekei aika ti na kaetii, koaua aika a na tibwauaaki, ao te tamaroa ae na karaoaki. Ni kauarerekeana, ti karekei maiura n riki bwa a na reirei aika a babane nanora n angaanga.”1
Te Ota nakoia Naake a Rootaki n te Kainnano
Ara katooto aika a tau, te Tia Kamaiu e tangi ao ni beku ibukiia aomata ao “n nakonako ni karaoa ae raoiroi” (Makuri 10:38).
N taai aika a kaangaanga, Iesu Kristo bon te Ota are “e ota i buakon te ro” (Ioane 1:5). E a tia naba n reireiniira bwa ko na riki bwa te ota. E taku, “Nooria Ngai te oota are kam na taua i eta—are te bwai are kam a tia n noorai bwa I karaoia” (3 Nibwaai 18:24).
Ngkai mwakoron ara berita aika tabu n te bwbetito, ko berita bwa ko na,“tauraoi ni buoka rawawataia raomi, bwa aonga ni beebete; … n tang ma ake a tang; eng, ao ni karaui nanoia ake a kainnanoa karauan nanoia” (Motiaea 18:8, -9).
Ngkana ko kaitibo ma te aomata ae namakina te nanokawaki ke ni bwarannano, e bon teretere raoi bwa ko na kanga n ibuobuoki. E ngae n anne, iai taai tabeua, ko aki ataia bwa tera ae ko na taekinna ke ni karaoia. Inanon taai akanne, ko konaa ni kauka nanom. Ko kona n ongoora mairouia ao ni boutokaiia.
Ngkai ko tangiria ao ni beku ibukiia aomata, e na riki n otamwaaka otan te Tia Kamaiu inanom ao ni kaotaa kawaim. E na katikii naba nanoia tabeman ake a ukoukora otan te Tia Kamaiu. Man te teimatoa ni waaki nako ao ni kaawakin berita ake ko karaoi n tain te bwabetito, ko na kunei kawai aika a mwaiti are ko na kona ni karika te aonaaba aei bwa e na tamaroa ao otamwaaka.