“Ukoukoran te Kimwareirei n te Mwakuri ni Katangitang,” Ibukin Kakorakoraia Kairake, Tianuare 2021.
Aan Kateitei aika Matoatoa
Ukoukoran te Kimwareirei n te Mwakuri ni Katangitang
Kamataata n te tamnei iroun Emily Jones
I moana au reirei iaon te biano ngke itiua au ririki. N te moan tai, ao e rangi ni kangaanga irou warekan nooti ao n aki naba kona ni kabaanea au tai nakon bwain au reirei. Kaanga bon akea ungau ni katanga te biano.
Ma n au tai ni bwabetito ao e a tuangai tinau bwa n na katanga te anene ae “When I Am Baptized” (Aia Boki n Anene Ataei, 103). Ai tibwa au moan n tai ni katangitang inanon te taromauri. I nako n nano ma I kakatonga ngke I tia ni katangnga.
E aki maan ao I a rangi n tabetabe ma au bwai n reirei ao I a tangiria ni katuka moa te biano, ma a kaungaai au karo bwa n na reitanako au reirei n te biano. Aki toki n tuangai bwa ngkana I teimatoa ni katangnga, ao n na karekea te kukurei inanon au tai ni beku ibukin te Uea.
Mai ikanne, are e a reitinako iai tatangiran katangan te biano. I moanna man te katangitang n tain bootakin te toa, ao ngke e koro 12 au ririki, ao I a anganaki nakoau bwa te tia biano n te uoote. I rangin ni kukurei! I kakatanga kunaia ataein te Moanrinan n aia tai ni kamataku ao n ira ana kuaea te uoote n tain ana maungatabu ao n ana botaki n taromauri. I weteaki naba bwa te tia katanga te biano n ana kuaea te titeiki ao ni katangitang n tain ana maungtabu te titeiki.
I rang ni kakaitau nakoia au karo ibukin kaungakiu ni karaoa au kabanea n tamaroa. N na bon aki toki ni kakaitau nakon Tamara are i Karawa ibukin te tarena are E a tia n anganai. I ataia bwa n na kona ni kabonganai au tarena n au mition ao ni mwakuri n ibuobuoki riki tabeua n te tai teuana. I kunea raoi te kukurei n au tai ni beku ibukin te Uea.
Jyle S., National Capital Region, Philippines