“Te Waakirake Nakon Boong Aika Nakoraoi Riki,” Ibukin Kakorakoraia Te Roronrikirake, Tianuare. 2023.
Maium Buokana
Te Waakirake Nakon Boong Aika Nakoraoi Riki
Te kaantaninga, mwakuri n ibuobuoki, ao ni kamaiu a tauraoi ibukiia aika a tia n tokanikai man te bwainikirinaki.
N te taina ao I kiba nako n te wanikiba man te tabo ae onrake n te bubu man te urarake ae kaan. Inanon kibanakon te wanikiba, ao tia rinnako rinanon te bubu ma te mannang ni kaea nangin karawa are e a itiaki riki ao n ota n otan taai. I ataia bwa otan taai ma te eea are itiaki e a tia ni mena ikekei n te bong anne, ma au konabwai n noora tamaroana e a tia n tukaki n te bwai ae riao aron au konabwai iaona. Bon akea irekerekeu ma rikin te ai aei, ma e a tia n rota maiu ana mwakuri.
Anne bon ai aekan te bwainikirinaki. Naake a tia n rinanon te bwainikirinaki a na aki bukinaki, ma ae a bon rinanon mwiin te bwai are e a tia n riki nakoia. Te bwainikirinaki e kona ni kamabubua kinaakin kakawakira ao ni kameemerea namakinan ana tangira te Atua. E kona n anaa te tai ibukiia koraki ake a tia n rinanon te bwainikirinaki ni kona n tokanikai iaon ana mwakuri ni kewe Tatan ao ni manga okira te koaua. Ma te kantaninga, te mwakuri n ibuobuoki, ao ni kamaiu bon bwaai aika a kaman tauraoi n tainako inanon kawaira!
Te Karaki Teuana
Taman Stacie1 bon iai irouna te anua ni bwabwainikiriniia aomata. E tuangnga bwa e na akea te bwai ae tamaroa ae e na uaana mai irouna ngkana e ikawai. Aio are e angan neiei te namakin bwa akea uaana.
Ngke e mwaing nako Stacie ibukin ana reirei, e a kona n iango raoi riki. E a manga moana irina n te taromauri ao n namakina ana tangira te Atua ibukina ao ana utu. Inanon te tai, e rikirake te rau irouna n te euangkerio ao n ana reitaki ma te Tia Kamaiu.
E katautauaki inanon te ririki aei bwa e na nakon teuana te birion ataei ni kabuta te aonaaba aika a na rinanon waaki ni bwainikirinaki.2 Tao ngkoe ke tabeman aika ko kinaia a tabe ngkai n rinanon te waaki are e a tia n riki naba iroun Stacie. Aikai aanga aika a na kona n ibuobuoki.
Ngkana ko Rinanon te Bwainikirinaki
Ngkana ko a tia ni kammarakaki, taiaoka tibwaia nakon temanna te bwai are e riki nakoim. Ko riai n ataia ae e tangiriko te Atua! A tangiriko naba kaain te utu aika raraoi, raoraom, ao kaain te Ekaretia ake ko kinaia inanon maium. A na tei irarikim ao ni buokiko ni kakoroa nanon aei.
Ao uringa, “Te bwainikirinaki bon tiaki, ao e na bon aki riki bwa te bwai ae ko na bukintaeka iai. … Tiaki ngkoe ae ko na rairananom; ko aki bukintaeka iai.”3
E taekinna Dr. Sheldon Martin, te tia rabakau are mwakuri ma te Church’s Family Services, bwa e kona n rang n ibuobuoki ibukiia ake a tia n tokanikai bwa a na kabanea aia taratara iaon koaua aika akea tokiia ibukin bwaai ake a riki ni maiuiia n taai ake ngkoa, n taai aikai, ao n taai aika a na roko.
-
Ngkoa: “A mwaiti aomata n aron ae kam ataia ae a tabeakini ngkami,” e taku Dr. Martin, e kamatataa bwa ngkami moan ao aia kabanea ni kakawaki n nati irouia ara karo ake i karawa. E reitianako riki ami utu ae akea tokina riaon ake ko kinaiia bwa am koraki iaon te aba. Ao irarikin te korakora ao te mwengaraoi are ko karekea mairoun Tamam are i Karawa, Iesu Kristo, ao te Tamnei ae Raoiroi, ao bon iai naba am utu aika tangiraki n iteran te rabuna are teuana aika a tabe ibukimi ao ni kona naba ni karaoa te mwakuri n ibuobuoki nakoimi.
-
Ngkai: “Bon akea te kangaanga ngkana ko moanibwaiko bon iroum,” e taku Dr. Martin, bwa tera nnem are ko mena iai inanon am tai n rinanon te mwakuri n ribuaka are karaoaki. Ko na bon kona n un, n uruaki nanom, ke n aki ota. Bwaina te taotaonaki n nano.
-
Ae na Roko: “A na bane n nakoraoi bwaai,” e taku Dr. Martin. “I ataa te bwai aei bukina bwa I ataa te Tia Kamaiu. E tabe ibukimi.” Karaoa ae ko kona bwa ko na tena Mangaia. Ngkana ko karaoia, ao ko na kona ni kararoako man reitaki aika ana kabwakako ao ni kona iai ni karikirakea iai namakinan Ana rau ao Ana tangira.
Ngkana Ko Ataia n Am Iango bwa iai Raraom Ae e Rinanon te Bwainikirinaki
-
Titirakiniia, “Iai ae karaoa te mwakuri n iowawa nakoim?”
-
Kakauongo raoi nakon te bwai ae e taekinna. Kaota nakoia te akoi ao te nanoanga.
-
Tuanga temanna ae na kona n ibuobuoki, n aron te tia reirei, te karo, te kauntira n te reirei, ke te tia kairiiri n te Ekaretia.
-
Teimatoa n riki bwa raoraoia. Karaoiia n aron ae tataneiai ni karaoaki. Buokiia ni karaoi reitaki n iraorao aika tamaroa ma tabeman.
Teimatoa ni Waaki Nako
Te bong aei, e riki Stacie bwa temanna ae mwaatai iaon te bwai are e a tia n riki nakoina ma oin ana utu ae ataia bwa e tangiria. Iai boong aika e matoatoa uotakiia, ma e namakina te tangira ao te nano ni kakabwarabure ibukiia tabeman ae moan te bati.
“I ataia bwa e kona Iesu Kristo ni kamaoi ni kabane ikoakira,” e taku Stacie. Ngkana iai te bwai ae na tibwauaia ma ake a tia n rinanon te aekaki ni kangaanga aei, ao bon ti te teimatoa inanon te kantaninga.
“Iai n tainako te kantaninga iroun Kristo,” e taku, “riki ngkana ko rinanon te bwainikirinaki ae teina kangaa e na aki kona n toki.”
N aki tabe ma tera kangaanga ake ko rinanoi, teimatoa ni waaki rake. Kaona maium n te raoiroi ao te onimaki ni mwakuri nako ake ko kona ni karaoi. A mena imwain boong aika nakoraoi!