“N tabetai I namakinna ae e a rangi n riao aron kaetakiu irouia au karo. “N na kanga ni kaeka ma te karinerine?,” Ibukin Kakorakoraia Kairake, Tianuare 2023.
Titiraki ao Kaekaia
“N tabetai I namakinna ae e a rangi n riao aron kaetakiu irouia au karo. N na kanga ni kaeka ma te karinerine?”
Kabanea te Tai ni Bootaki ma Ngaia
A angani ngkami te reirei ao te kaetieti ami karo bukina bwa a tangiri ngkami ao n tangiria naba bwa kam na nakoraoi. Ngkana ko namakinna bwa e aki nakoraoi mwiin te kaetieti anne, ao maroroakinna ma am karo imwiina ngkana ko taraia bwa kamwa uaia n namakina te rau. Kam na kona ni karekea ami tai ngkana kam kaai ni karaoa te bwai, ae kam kaai ni uaia n tangiria ni karaoia, n aron te kuuka ke te kamarurung. Aio e na buokia ni kaoa te Tamnei nakon te marooro.
Rebekah M., 17, Maryland, USA
Uringnga A Tangiriko
Ngkana ko uringnga ae a kaetiko ao a reireiniko am karo bukina bwa a tangiriko, ao e na bebete riki iai butimwaean aia taeka n reirei. Taekinan te tataro ni bubutia te Tamnei bwa e na buokiko n teimatoa ni karinerine ao n nanorinano e na buokiko ni kanakoraoa riki am reitaki mangaiia.
Lauren M., 16, Texas, USA
Te Kokoaua e Kamarurung
Te marooro, ae raoiroi ao e koaua e kona ni katoki aekan nako itabaraara. Tekateka ma am karo ao marooro nakoiia. Tuangiia bwaai aika ko aki kukurei iai, ao kakauongo nakon bwaai aika a kananokawakiia ke ni kauniia. Kabanea riki am tai mangaia, ao karikirakea te tangira ao te rau n ami reitaki ao n te mweenga. Ngkana iai te bwai ae ko un iai, butiia Tamam are i Karawa bwa e na karaua nanom.
Rafaella P., 17, São Paulo, Brazil
Tuangiia ae Ko Tangiriia
Ko kona ni kaeka ma te karinerine, e ngae ngkana e kangaanga. Tuangiia am karo ae ko tangiriia, ko tabeakiniia, ao ko ataia ae a tangiriko. Tuangiia te bwai ae a taekinna ae kammaraka nanom, tamneim, ao am iango. Tataro n tainako. E na bon buokiko Tamam are i Karawa.
Wellie S., 13, Luanda, Angola
A Noora Am Konabwai
E kantaninga te kabanea n tamaroa mai iroura te Atua ao ni kona n noora ara konabwai ni koaua. Anne bukina ngkai E tangira ae mwaiti mai iroura. A noora naba am konabwai am karo ao n tangira te kabanea n tamaroa ibukim ao ibukin bwa ko na nakoraoi! A bae n aki kororaoi ni kaungaa rikirakem, ao aki kororaoi ni kakoroa nanona. Kakaota te koaua ao te tangira nakoia am karo inanon ami tai ni marooro, ao e na kairiko te Tamnei ni karekea otam.
Brooke T., 18, Arizona, USA
Riiki Bwa te Tia Kakauongo ae Nanorinano
N te tai ae aki maan n nako ao I a tia ni kataia n riki bwa te tia kakauongo ae tokanikai riki. I kataia ni kakauongo raoi nakon bwaai aika a na taekin au karo irarikin are te kauntaeka ke te un n tatakarua nakoia. E tangira te taotaonannano ao te nanorinano ae mwaiti, ma karaoan aei e na kona ni kakorakora am reitaki ma am karo ao ni karekea te rau imarenami.
Kami K., 18, Utah, USA