“4 Kawai Aika E Kakorakorakoiai Iesu Kristo,” Ibukin Kakorakoraia Kairake, Tianuare 2023.
4 Kawai ae Kakorakorako iai Iesu Kristo
I konai ni karaoi bwaai ni kabane rinanon Kristo.
I-Biribi 4:13
Ni kabuta te aonaaba, a kimwareirei Kiritian n te koroboki ae tabu aei: “I boni konai bwai ni kabane ni karaoi iroun Teuare e kakorakoraai” (I-Biribi 4:13).
Ngke a ongo aio aomata, a taku tabeman bwa a kona n tokanikai iaon taian kataaki nako, n tokanikai iaon takakaro nako, ao ni koro bukin aia iango nako. Ma anne tiaki te bwai ae reiakinaki n te kibu aei.
E bon koreaki iroun te Abotoro are Bauro ngke e mena n te matawariki. Ngke te bure ngaia, a mwaiti bwaai are e aki kona ni karaoi Bauro, ma e ataia bwa e kona ni kakorakoraaki iroun Iesu Kristo ni karaoi bwaai aika a rangi ni kakawaki riki.
Bon titebo naba te koaua aio ibukim!
1 Kristo E Kakorakorako Bwa Kona Ataia
Iesu Kristo e a tia n angani ngkami kawai aika a kakawaki are kam na ataa iai te bwai ae koaua. E a tia n reireiniira ni kabane bwa ti na tataro n tainako (taraa 3 Nibwaai 18:18) ao n tuangiira bwa ti na ataa te bwai ae koaua (taraa Moronaai 10:4–5). Ko kona ni kunea ao n ataa te bwai ae koaua rinanon am kamatebwai ni koroboki aika tabu.
Te tataro ao kamatebwaian koroboki aika tabu e uota te Tamnei nakon maium. E kona te Tamnei n tuangko n “am iango … inanom” (Reirei ao Berita aika Tabu 8:2), “kaona tamneim ma te kukurei,” ao “ni kaotaa am iango” (Reirei ao Berita aika Tabu 11:13).
Ni kawai aikai, ko kona n “ongo Irouna”—n ongo ana taeka te Tia Kamaiu ao n toumwiin baike E a tia n taekin. E reirei Beretitenti Russell M. Nelson bwa aio “te banna ibukin te tokanikai, te kukurei, ao te kimwareirei n te maiu aei.”1
2 E Kakorakorako Kiristo Bwa Kona Karaoia
E reke korakoram ngkai ko kataia ni kaawakin tuua ao ni karaoi rinerine aika a eti are a kairiiri nakon te rau ao te kukurei. E kakorakorako Iesu Kristo bwa kona karaoa aei e ngae ngke a kaangaanga karaoan rinerine akanne. N tabetai ko kona ni karaoa te rinerine ae aki riai. Ma te kakaitau, man ana Mwakuri ni Kamaiu te Tia Kamaiu e kona ni karaoaki te rairannano. Ibukin Iesu Kristo, ko na riki n itiaki ao ni kunea te kimwareirei. E kona ni kakorakorako ni “karaoa ae tamaroa ao n riki n tamaroa”2 ni katoa bong.
3 E Kakorakorako Kristo Bwa Kona Tokanikai
Inanon menana n te matawariki, e koroboki Bauro: “I a tia n reireiaki te kataua te aro ae I mena i nanona.
“I bon ata te aro ni karinanoaki n akea au bwai, I reireiaki ni bwaai nako ao ni bwaai ni kabane” (I-Biribi 4:11–12).
N taekana teuana, e reiakinna Bauro bwa, rinanon Kristoi, e kona n tokanikai ao n reiakinaki man kaangaanga ao kataakina. Iesu Kristo e konaa ni kakorakorako bwa kona karaoa naba ae aron anne.
Te Tia Kamaiu, E rinanon “maraki ma karawawataaki ao te kaririaki n aekaia nako.” E uota Iaona mamaarara n te aro are “e na ataia … bwa e na kanga ni buokiia [are nanona n ibuobuoki] ana aomata ni kaineti ma mamaaraia” (Aramwa 7:11–12). E aki kakaangai bwa tera ae ko kaitara mangaai, e kona Iesu Kristo ni kakorakorako n teimatoa n uaa te toki ao ni kakoroi bukin bwaai ni kabane ake ko aki kona ni karaoi i bon iroum.
4 E Kakorakorako Kristo Bwa Kona Riki n Aron anne
E a tia Iesu Kristo ni karika te mangauti bwa e na riki nakoira ni kabane, ao E karaoa ae te maiu ae akea tokina e kona n reke irouia naake a rairannanoia, ni karekei otenanti aika a kakawaki, ao ni karaoi ao ni kaawakin berita aika tabu ake a irekereke mangaiia. N akean Kristo, ti aki kona ni kakoroa bukin ana kantaninga Tamara are i Karawa are e rangi n tangiria—ibukira bwa ti na riki n ai Arona ao Natina, Iesu Kristo, ao ni maeka Mangaiia n aki toki.
Ko kona n riki n ai aron Iesu Kristo ngkai ko reireiaki Arona, ni katan ao n onimaki Irouna, ao n toumwiin Ana banna ni katooto. Aei e na kairiko bwa ko na maiu riki ma te onimaki, kantaninga, tangira ae kororaoi, taotaonaki n nano, nanorinano, itiaki, ao te ongotaeka. Aikai anuan ni kabane te Tia Kamaiu.
Ngkai ko kataia n ririmwiin Iesu Kristo, E na riki bwa am kantainga ao otam are e na kairiko n riki n aron are E ataia bwa ko na riki nako iai. Ao, ma Bauro, ko na kona ni kangai, “I bon konai bwaai ni kabane Iroun Teuare kakorakorai.”