“Riki n Aron Kristo,” Ibukin Kakorakoraia Te Roronrikirake, Tianuare. 2023.
Riki n Aron Kristo
Teuana mwakoron aia burokuraem Ataei ao Kairake bwa a na kekeiaki n riki n ai aron Kristo man karikirakei maiun tamneia, n aia reitaki, n rabwataia, ao ni wanawanaia (taraa Ruka 2:52). Tao ko kakoaua ke ko aki, karekean te kouru bon tiaki te bwai ae e na matoatoa n aron ae ko iangoia. Noora aroia kairake ni kabutaa te aonaaba ake a tabe n rikirake n riki n ai aron Kristo!
Te Maiu n Tamnei
Ara: Catalina
Tabo: Chile
Kouru: Wareware ni Booki aika tabu ao tataro ni katoabong
“I kateimatoaa kaniu ma te Tamnei rinanon te tataro. I tataro ni katoa tairiki imwain ae I matu ao imwiina I wareki au booki aika tabu. I karaoa au kamatebwai bwa n na ota raoi iai. Ngkana I wareware ao n tataro ni katoa bong, ao I namakina te rau ao te kaan riki nakon te Atua.”
Te Aro n Reitaki
Ara: Raisa
Tabo: Samoa
Kouru: Karekean te ikikina ma ataeinnaine n ana kiraati
“I kona ni bane n tia n atai araia ataeinnaine ni kabane n au uoote, ma I tuai raoi n rangi ni kinaiia bwa aekakira ao tera ae a tatangiria. Ngaia are I a moanna temanna imwiin temanna, e ngae ngke I rangi ni mama, ma I kukurei n atai arora tabeua aika ti tebo. Inanon au tai ni kakarekea kinakiia, ao ai aron ae I tabe naba n noora tamaroaia ataeinnaine aikai n aron ana taratara Tamara are i Karawa.”
Rabwata
Ara: Eugene
Tabo: Kenya
Kouru: Katamaroaan ana takakaro n te booro (butibooro)
“I moana au kataneiai ma raoraou n te namwakaina ae nako. E reiakinai au kataneiai aei bwa n na ataia ae e aki tangiria te Atua bwa ti na rinanon te maiu aei n tii ngaira n akea raora. Ti kona ni karekeia raoraora bwa a na raoniira n ara kouru bwa ti na riki n ai aron te Tia Kamaiu. E ataia bwa ti kainnanoira n tatabemaniira nako bwa ti aonga n tokanikai. Ngkana ti tataro, ao E na karokoia aomata bwa a na buokiira bwa tina karekea te kabanea n tamaroa inanon maiura.”
Te Wanawana
Ara: Jackson
Tabo: South Carolina, USA
Kouru: E na maan tain mwakuriana: E na riki bwa te tia bwaibwai n te kaa ibukin kabonakoan te amwarake n te bong teuana; e uarereke tain mwakuriiana: Reirei aron karaoan te amwarake
“I tuanga temanna mai ibuakoia au taan kairiiri irouia Ataeinimwaane rongorongon au kouru ae n na karekea te kaa ibukin kabonakoan te amwarake. E taku, ‘Ni katoa ririki I karaoa au amwarake ni kukurei ibukin manga teiraken te reirei. Bukin tera ko aki nakomai ni karaoa te amwarake ibukira?’ Ma ngaia anne ae I karaoia. I karaoa ae nakon 50 hot dogs ao burgers inanon 45 te miniti. I tatangiria ni bobotaki ma tariu n au kooram, ao n te tai arei ao I karekea aia kaeka ae kakukurei man te bwai are a noria n raonaki ma tabeua taeka ni kakaitau. Ao I reiakina ae mwaiti.”