“Te Onimaki inanon te Rootongitong,” Ibukin Kakorakoraia Kairake, Ritembwa. 2022.
Te Onimaki inanon te Rootongitong
Aikai tabeua iango ake a buokai ma taian titiraki ao nanououa.
Tamnei iroun Getty Images
Ngke te ataeinimwaane ngai, angin te tai ao au utu a nanako n te Great Basin National Park i Nevada, USA. Te bwai teuana ae rangi ni kakateke n te tabo ni kaukiang ae a tei iai taian kaa bon Lehman Caves.
E kairiko te tia kaneweaba nako kabin te nangananga ni bwaa ao, n te tai ae karina, a tiringaki taura ni kabane. Ko a mena inanon te rootongitong ae bwanin. Bon te namakin ae rawawata, ao te iango ibukin kunean kawaim n otinako man te nangananga ni bwaa n akea te ota e bon kamweengabuaka. Ma te kakaitau, n tainako e a manga kamaiui taian taura te tia kaneweaba ao ni kairiko bwa kona otinako n mano raoi.
N tabetai ti kaitaraaki ma taian titiraki ao ma te nanououa naba n taekan te Ekaretia ao ara koaua. E kona n reke te namakin ae karawawata ao n aki koaua, n aron te mena inanon te nangananga ni bwaa ae roo.
E TAMAROA ae e na iai te titiraki ao tabeaianga. Te bwai ae karekea te bitaki ae moan te korakora bon arom ni kona ni keiakini n rinanona.
Aikai tabeua iango ake I buokaki iai.
Kamwakura te Onimaki
I kunea bwa ngkana I keiakin taian titiraki ao tabeaianga man waakin te onimaki, n tainako I kona ni kunea te kawai ni waakirake. “Te onimaki bon tiaki karekean te ataibwai ae kororaoi ibukin bwaai nako” (Aramwa 32:21). Ao “e ngae ngke akea te bwai ae kam tangiria bwa kam ti kan kakoaua, kamwakura te nano aio inanomi” (Aramwa 32:27).
E na tuangko te aonaaba bwa ngkana ko aki kona ni kakoaua te bwai teuana man te kainibaire n te rabakau n tiaeanti, e aki kona ni koaua. Ti aki aio ana Kawai te Tia Kamaiu. N aron ae taku te Tia Kamaiu nakon Toma, are e nananououa ma tii ngkana e namakina ikoakin te Tia Kamaiu i bon irouna, imwiin mangautina “Tai rawa n onimaki, ma ko na onimaki” (Ioane 20:27).
Bubuti, Ukeuke, Karebwerebwe
Te kibuntaeka “bubuti, ukeuke, karebwerebwe” e kaokiokaki inanon booki aika tabu (taraa Mataio 7:7; Reirei ao Berita aika Tabu 88:63). Ana kawai te Uea n ibuobuoki nakoira ma ara titiraki bon ibukira bwa ti na tabeki ara tItiraki Nakoina.
“Ngkana akea ana rabakau temanna ibuakomi, ao e na butiia te Atua” (Iakobo 1:5). Kaineti nakoni bwaai ni ibuobuoki ibukin taian koaua ni kabane. E tangiriko te Atua ao e na buokiko.
Riki bwa te Tia Ukoukora te Koaua
I kunea bwa naake a kokoaua ao n nanorinano n ukora te koaua n tainako a na karekea kaekaan aia titiraki n tokin te tai. N te anga teuana, naake a bon tii kakakaea kairuan temanna e na kararoaaki riki man te koaua.
Riki bwa te tia ukoukora te koaua. Iai te koaua, ao ko kona ni kunea.
Karaoa te Bwaoki ibukin “Bwa e na Kaekaaki Rimwi”
Ngaia are terana ae ko na karaoia ngkana ko karinanoko n ukori taian kaeka ma te nano ae koaua ao taraan ae aki te roko ni kaoti?
Ao riki, I rineia ni keiakinna ma te onimaki. I a tia ni karaoa te bwaoki ae uarereke iaon te taibora n au iango—n aron te bwaro ni kaubwai ae moan te tamaroa. Ae korobokiaki iaona bon te taeka “Bwa e na Kaekaaki Rimwi.”
Ngkana iai au titiraki ke tabeiangau ae I aki kona ni taobaraia, I koreia iaon te mwakoro ni beeba, karaua raoi n rukimma, ao ni nneia inanon te bwaoki. Ngkanne I manga kaokia nako aon te taibora.
Man karaoan aei, I mwakuriia inanon te onimaki bwan te bong teuana e na bon kaekaaki iroun te Uea. Tao E bon kona, tao E na bon aki. E a bon nakoina n Wanawanana ae akea tiana.
Irarikina, tabeua au titiraki a tia ni kaekaaki. Ma angiina bon aika inanon te bwaoki. Ao akea au KAANGAANGA n anne.
Raraou aika a tangiraki inanon Kristo, kam na riki bwa taan ukoukora te koaua.
Ngkai e rikirake am onimaki, e memena te Uea irarikim. Ao ngkai ko kawaria inanon te onimaki, E na kaotii bwaai nakoim ake ko riai n atai n te tai ae eti.