“Te Kabanea n Tamaroa ni Kakai” Ibukin Kakorakoraia Kairake, Tianuare 2023.
Nakomai, Iriirai
Te Kabanea n Tamaroa ni Kakai
Iai riki teuana te kakai ae rangi ni kaakawai riki nakon akanne ni kabane.
Ma te Atua, a kona ni karaoaki bwaai ni kabane (taraa Ruka 1:37; I-Biribi 4:13). Ma ko kona n tataro raoi ibukin te bwai teuana ao e korobukina? Bukin tera ngkai tabeman aomata a rinanon taian kakai ngke taraan ae tabeman a bon aki? Ao tera ae nanona n aei ni kabane iroum?
Teniua kakai ake ngkoa, teniua kakai aika ngkai, ao teuana te kabanea n tamaroa ni kakai ae reireiniira ae mwaiti riki.
1
Te Kakai are Ngkoa
Kamataata n te tamnei iroun Camila Gray
Taraan ae korakora miimiin Maria ngke e tuangaki iroun te anera ae Kabiriera ae e na riki bwa tinan te Tia Kamaiu. E na bon bae n aki riki. Ma e kabwarabwara te anera ae Kabiriera bwa Iesu e na riki bwa Natin te Atua ao e taku, “Ba akea te taeka teuana mairoun te Atua ae na aki mwaaka” (Ruka 1:37). Ao e koaua te anera. Maria e bungia te Tia Kamaiu ibukin te aonaaba.
Te Kakai ae Ngkai
Uoman mitinare ae a mwakuri i Mexico a ririanna inanon te kawai ae tabetabe ni katoa bong. N tabetai a na bae n tataninga n te maan ae 10 te miniti imwaain ae reke aia tai n toua nanon te kawai nakon are iterana, ao a ana bon riai ni biri! Ngkanne a kaitibo ma te aomata ae e a kara, ae rangi n aau kaain te aro ae aki bati ni kakaonimaki. E tangiria ni kan nako n taromauri mangaiia, ma—aio te mwakoro are e kaangaanga karaoana—e na riai n toua nanon te kawai ae tatabetabe. Ao tiaki naba anne, ma aki kona mitinare ni uotia nakon are iterana (e ngae ngke a tabe n iangoia). Ma ngkanne a karekea te kakai. “Ngke ti a roko n te kawai,” e taku temanna te mitinare, “bon akea te kaa ni kaoti. Ti a kona n nakonako ni karaurau ao n toua nanon te kawai ao ni mano.”
E kaangaanga? Iangoia Riki!
Ma, te Atua, a kona ni karaoaki bwaai ni kabane (e ngae ngke bwaai naba aika a kaangaanga karaoaia!).
2
Te Kakai are Ngkoa
Iai te mwaane ae “naki baina,” ke e boo. E kakoaua bwa e kona ni kamarurungnga te Tia Kamaiu. Ma a mwaiti aomata ake a mena irarikin Iesu, ao e bon kaangaanga te roko Irouna. Ma tera ae e karaoia te mwaane? E karuoaki irouia raoraona nako aon ana kainiwene mai taubukin te auti ni karoko iroun te Tia Kamaiu. Tiaki, e bon aki bebete te aro anne. Ma e riai ngaia ma raoraona n reke aia onimaki ae korakora. Ao e materaoi karaoana—Iesu e kabwara ana bure te mwaane ao ni kamaiua (taraa Ruka 5:17–26).
Te Kakai ae Ngkai
E takakaro Ella W. ma raoraona n te tabo are a tetei iai taian kaa ngke raoraona a bua aia man ae te chameleon. Taraan ae tiaki te kaangaanga ae bubura. Ma uringnga bwa chameleons a bibitaki karan kuniia n irengan ma baike a mena irarikina. Imwiin te kakae n te tai ae uarereke, e baireia Ella bwa e a boo tain te tataro nonimaki. N te tai ae aki maan ao a kunea te chameleon iaon te aroka! “N te tai are e mena iai inanon bain temanna, ti atonga te tataro ni kakaitau nakon Tamara are i Karawa,” e taku Ella.
A Kaoti Taian kakai rinanon te Onimaki iroun Iesu Kristo
Te bwai are e kaangaanga karaoana n tainako ao e bon bebete karaoana iroun te Atua. Ma ti riai ni karekea ara onimaki iroun te Tia Kamaiu (ke tao te nano ni kan kakoaua) ao ni mwakuriia te onimaki anne bwa a na riki taian kakai.
3
Te Kakai are Ngkoa
A mareaki Eritabeta ao Takaria n ririki aika bwakanako ma aki te roko ni kariki. N tabetai, n namakinana ao taraan ae kanga aki kaekaaki aia tataro n onimaki. Ao n tokin te tai, a bon kara ni karikiia natiia. Ma ngkanne e a kaoti te anera nakon Takaria ao tuangnga bwa e nang reke natin Eritabeta. (Te kamanga ae koaua: n te kabane ao e riki te teei bwa Ioane te Tia Bwabetito!) N te kabane, te bwai are e kaangaanga karaoana e a kona ni karaoaki. Ma a na riai ni kakantaninga Erita ao Takaria, n te tai ae rangi ni maan (taraa Ruka 1).
Te Kakai ae Ngkai
E korakai Lindsey M. man te aoraki ae te katikitiki. “NI katoa moaningabong koraki, N na bae ni bubutia Tamau are i Karawa bwa e na kanakoa te katikitiki mairou,” e taku Lindsey. Ma aki te roko n nako. Inanon ana tai n tataninga Lindsey ibukin kamarurungana, e karekea kakabwaia n te nakoanibonga, are e uota te rau nakoina. Ao te rau anne bon te kakai i bon irouna. “Ngkana ti rairaki nakon Tamara are i Karawa, n akea te nanououa ao E na bon mena ikanne ibukira, ni karaababaa kakai ao n anga te karauan nanora,” e taku. N tokin te tai ao e rinanon te korokoro are e a buokia ma te katikitiki.
A Roko Taian Kakai ni Kaineti ma ana Kantaninga te Atua
Te Atua e kona ni karaoi bwaai ni kabane. E na kona n reke am onimaki ae moan te korakora. Ma a roko taian kakai ni kaineti ma ana tai te Atua ma ana kantaninga ao Ana kawai. Kakaei tabeua kawai inanon kawaim, n aron te rau ao te korakora ni keiakin bwaai.
Te Kabanea n Tamaroa ni Kakai
E mwaiti ara marooro iaon taekan te kakai. Ma iai teuana te kakai ae korakora riki ae moan te kakawaki riki nakoia ni kabane. Te kakai anne ngke e roko Natin te Atua iaon te aba ngke te merimeri ngaia, imwiina e anga reirei ao n anga te kamarurug, ao imwiina E anga oin maiuna. Iesu e katokaa Iaona ara bure, rawaawatara, ao aorakira. N raonaki ma Ana kakai bon tenibong te bong ni mena n te ruanimate ao imwiina mangautina are e uote te maiu imwiin te mate ibukira ni kabane. Te kakai anne e bitii bwaai ni kabane.
E bebete ngkana iai te bwai ae ko mena inanona n akea te bae ko kantaningaia ao n reke am onimaki n te kakai ae onoti. Ao anne e kona ni kaangaanga ngkana ti aki ataa ana kantaninga Tamara are i Karawa. Ngaia are n oneanmwiin are ko na kabotoa nanom iaon am onimaki iaon te kakai are ko tangiria, kabotoa iaon te kakai n ana Mwakuri ni Kamaiu te Tia Kamaiu. Karekea am onimaki are bon akea te bwai ae kaangaanga iroun te Atua, n raonaki ma te bwai are ko tataroakinna. Ma karekea naba am onimaki bwa e tamaroa riki Ana kantaninga ma are iroum. Ngkana aki kaekaaki am tataro n te kawai are ko kantaningaia, E na kakorakorako ao ni buokiko bwa roko n tokina.
Te Kabanea ni Kantaninga
Ngkai ko kabotoa am onimaki iaon Iesu Kristo, ko na ataia bwa tera nanon ae a bebete bwaai ni kabane iroun te Atua. Ko na kakoaua bwa e kona ni kaeka am tataro Tamara are i Karawa, ao ko na onimakina Ana kantaninga ao ni karekea Ana rau ngkana aki nakoraoi bwaai n aron are e baireaki. Ma ngaia are katuka am onimaki iroun Iesu Kristo. Bon ngaia te kakai. Ao a bane ni bebete bwaai ni kabane irouna.