“Kateaki iaon te Tabo ae Matoatoa,” Ibukin Kakorakoraia Kairake, Tianuare 2023.
Matoan Aan te Kateitei
Kateaki Iaon te Tabo ae Matoatoa
Kamataata n te tamnei iroun Emily Jones
I taraia ma te aki ota, ngke ti a tabe n teboka timantin nanon ara auti ngai ma au utu. I bon namakinna ae titebo ia tei ni kamanga iai. Antai ae e a tia n ongongo taekan tebokan timantin nanon ana auti? Ngke ti mwaing nako Texas, USA, e kabwarabwara kaain rarikira bwa ti riai n teteboka timantin nanon ara auti bwa e aonga ni kona ni matoa ni kaitaraa te uruaki are e na riki man ana urubwai buakan kanoan boong. Ngaia ae I a moana tebokan timantin nanon te auti, e ngae ngke I namakinna bwa I a bon tei ni kamanga ngke I karaoia.
E ibuobuoki tebokakina n te tai anne, ma e aki maan imwiina, ao e a moanna n tabwenaua timantin ara auti. Ti waekoa ni kunea bwa e aki kateaki ara auti iaon te tabo ae matoatoa. E a tia ni kateaki iaon te tabo ae kanoaaki n te mange, are e a karika inakon ara auti ngke a tabe n mka maange ake a taunaki iaana. Ti teboka aana, ma e bon teimatoa n tabwena timantin ara auti. Ngaia ae n tokina ao ti a kitanna.
Te bwai ae i rinanona aei e kauringai n aron kakawakin kateakin aan tamneiu iaon tanon ana euangkerio ae matoatoa Iesu Kristo. Iai taai ngke I a tia n namakina aki taun au koaua ibukin te euangkerio. Ma man rineakina ni kakoauaa, I “teboka aan” au onimaki ni karokoa ae I a kona ni katea au koaua iaon tanon te euangkerio ae matoatoa. Ngke I a tia n rineia bwa n na maiuakina ana euangkerio Iesu Kristo, I a tia ni katea aan au koaua ae matoatoa ae na aki kona n tabwenaua.
Ann J., Maryland, USA