« 4 rāve’a e ha’apūai ai Iesu Mesia ia ’outou », Nō te Pūai o te Feiā ’Āpī, Tēnuare 2023.
4 rāve’a e ha’apūai ai Iesu Mesia ia ’outou
E ti’a iā’u te mau mea ato’a nei i te Mesia.
Philipi 4:13
’Ati a’e te ao nei, tē ’oa’oa nei te mau keresetiano i teie pāpa’ira’a mo’a : « E ti’a iā’u te mau mea ato’a nei i te Mesia, tei tauturu mai iā’u ra » (Philipi 4:13).
’Ia fa’aro’o ana’e te ta’ata i te reira, e mana’o paha vetahi ē, te aura’a ra, e nehenehe rātou e rave i te hō’ē tāmatara’a, e rē i te mau ha’uti ato’a, ’e e tupu mai te mau hina’aro ato’a. E ’ere rā tā teie pāpa’ira’a mo’a e ha’api’i nei.
Nā te ’āpōsetolo Paulo i pāpa’i i te reira ’a tāpe’ahia ai ’oia i roto i te fare tāpe’ara’a. ’Ei ta’ata mau ’āuri, e rave rahi te mau mea ’aita e ti’a ia Paulo ’ia rave, ’ua ’ite rā ’oia ē, e nehenehe Iesu Mesia e ha’apūai iāna nō te rave i te mea faufa’a a’e.
Nā reira ato’a ’outou !
1 E ha’apūai te Mesia ia ’outou ’ia ’ite
’Ua hōro’a mai Iesu Mesia ia ’outou e rave rahi mau rāve’a faufa’a rahi e ti’a ia ’outou ’ia ’ite e aha te parau mau. ’Ua ha’api’i ’oia ia tātou pā’āto’a ’ia pure tāmau noa (hi’o 3 Nephi 18:18) ’e ’ia ani ’ia ’ite mai e aha te parau mau (hi’o Moroni 10:4–5). E nehenehe ato’a ’outou e ’ite ’e e hāro’aro’a e aha te parau mau nā roto i tā ’outou tuatāpapara’a i te mau pāpa’ira’a mo’a.
E fa’atae mai te pure ’e te tuatāpapara’a pāpa’ira’a mo’a i te Vārua i roto i tō ’outou orara’a. E nehenehe te Vārua e paraparau i « tō [’outou] ferurira’a ’e… tō [’outou] ’ā’au » (Te Ha’api’ira’a Tumu ’e te mau Fafaura’a 8:2), « ’o tē fa’a’ī i tō [’outou] ’ā’au i te ’oa’oa », ’e « ’o tē ha’amāramarama atu i tō [outou] ferurira’a » (Te Ha’api’ira’a Tumu ’e te mau Fafaura’a 11:13).
Nā roto i teie mau rāve’a, e nehenehe tā ’outou e « fa’aro’o iāna »—e fa’aro’o i te mau parau a te Fa’aora ’e e pe’e i te mea tāna i parau. ’Ua ha’api’i mai te Peresideni Russell M. Nelson ē, teie « te hōho’a nō te manuiara’a, te ’oa’oa ’e te poupou i roto i teie orara’a. »1
2 E ha’apūai te Mesia ia ’outou ’ia rave
E tae mai te pūai ia ’outou ’a tūtava ai ’outou i te ha’apa’o i te mau fa’auera’a ’e ’ia rave i te mau mā’itira’a maita’i e arata’i atu i te hau ’e te ’oa’oa. Tē ha’apūai nei Iesu Mesia ia ’outou ’ia rave i te reira noa atu ē, e mea fifi ’ia rave i te reira mau mā’itira’a. I te tahi taime e nehenehe ’outou e rave i te hō’ē mā’itira’a hape. ’Aua’e rā, nā roto i te tāra’ehara a te Fa’aora e ti’a ai te tātarahapara’a. Maoti Iesu Mesia, e nehenehe ’outou e riro mai ’ei mea mā ’e e ’ite i te ’oa’oa. E ti’a iāna ’ia ha’apūai ia ’outou nō te « rave maita’i a’e ’e ’ia riro ’ei mea maita’i atu ā »2 i te mau mahana ato’a.
3 Tē ha’apūai nei te Mesia ia ’outou nō te upo’oti’a
I roto i te fare tāpe’ara’a, ’ua pāpa’i Paulo : « ’Ua ’ite ho’i au i te [māuruuru] i te mau mea ato’a i ro’ohia mai ai au nei.
« E ti’a iā’u te iti, ’e e ti’a iā’u te mea rahi ; te mau vāhi ato’a, ’e te mau mea ato’a ra ’ua pi’i ïa vau » (Philipi 4:11–12).
E nehenehe e parau ē, ’ua ha’api’i mai Paulo ē, nā roto i te Mesia, e nehenehe tāna e upo’oti’a ’e e ha’api’i mai nā roto mai i tōna mau tāmatara’a ’e mau fifi. E ti’a ia Iesu Mesia ’ia ha’apūai ia ’outou ’ia nā reira ato’a.
’Ua fa’aoroma’i te Fa’aora « i te māuiui ’e te ʼati ’e te mau huru faʼahemaraʼa atoʼa ra ». ’Ua rave ’oia i ni’a iāna iho i tō tātou mau paruparu ’ia « ’ite ’oia… i te rāve’a nō te fa’aora [te aura’a ra nō te tauturu] i tōna mau ta’ata ’ia au i tō rātou mau paruparu » (Alama 7:11–12). Noa atu ā te mea tā ’outou e fa’aruru nei, e nehenehe Iesu Mesia e ha’apūai ia ’outou nō te fa’a’oroma’i ’e nō te rave i te mau ’ohipa o tā ’outou iho e ’ore e nehenehe e rave.
4 Tē ha’apūai nei te Mesia ia ’outou ’ia riro mai
’Ua rave Iesu Mesia i te ti’afa’ahoura’a pāpū nō tātou pā’āto’a, ’e ’ua fa’atupu ’oia i te ora mure ’ore nō te feiā e tātarahapa, e fāri’i i te mau ’ōro’a faufa’a rahi ’e e rave ’e e ha’apa’o i te mau fafaura’a e tū’ati ia rātou. ’Āhani ’aita te Mesia, e’ita tā tātou e nehenehe e fa’atupu i te mea tā te Metua i te ao ra e hina’aro rahi a’e—nō te riro rahi atu ā mai iāna ’e i tāna Tamaiti, ’o Iesu Mesia, ’e ’ia pārahi i pīha’i iho ia rāua ē a muri noa atu.
E nehenehe ’outou e riro rahi atu ā mai ia Iesu Mesia a ha’api’i mai ai ’outou nō ni’a iāna, a tūru’i ai ’e a ti’aturi ai iāna, ’e a pe’e ai i tōna hi’ora’a. E arata’i te reira ia ’outou ’ia ora ma te fa’aro’o rahi atu, te ti’aturi, te aroha, te fa’a’oroma’i, te ha’eha’a, te vi’ivi’i-’ore ’e te ha’apa’o maitai. E mau hīro’a ana’e teie nā te Fa’aora.
’A tūtava ai ’outou i te pe’e ia Iesu Mesia, e riro ’oia ’ei tīa’ira’a nō ’outou ’e ’ei māramarama nō ’outou ’o tē arata’i ia ’outou ’ia riro mai i te mau mea ato’a tāna i ’ite e nehenehe ia ’outou ’ia riro mai. ’E, mai ia Paulo, e ti’a ia ’outou ’ia parau ē, « E ti’a iā’u te mau mea ato’a nei i te Mesia, tei tauturu mai iā’u ra. »