Nō te feruri

Tē vai ra ānei te hō’ē vāhi au-roa-hia e ’oe nō te feruri ?

’Ia feruri ana’e ’oe, e rahi atu ā tā ’oe hi’ora’a mure ’ore. E nehenehe ato’a te reira e tauturu ia ’oe ’ia ha’amaita’i i tō ’oe ea i te pae ferurira’a nā roto i te tāmāra’a i tō ’oe upo’o i te ta’a ’ore ’e te pe’ape’a ’o tē tae mai nā roto i te mau fa’ahemara’a ’e te mau fa’anevanevara’a o te orara’a tāmahana. Tē vai nei te tahi nau ta’ata e vāhi ta’a ’ē roa tei auhia e rātou nō te feruri. ’A hio i te tahi mau vahi ferurira’a tei hōro’ahia mai e te tahi atu feiā ’āpī !

Feruri : Te ferurira’a, tōna aura’a, ’o te ha’amatarara’a ïa i tō ’outou ferurira’a ’e te ha’amāhorahorara’a i tō ’outou ’ā’au i te mau muhumuhu a te Vārua Maita’i ’a tuatāpapa ai ’e ’a feruri ai i te ’evanelia. Te feruri-hōhonu-ra’a, ’o tē nehenehe e tupu i te mau vāhi ato’a, e tītauhia ïa i te tahi ’ohipa pae vārua ’a ’imi ai i te heheura’a.

I rāpae’au, i ni’a i te pape

Tā’u vāhi au roa a’e nō te feruri, tei ni’a ïa i te mau huru pape ato’a, mai te tairoto ’e ’aore rā, te moana. I roto i teie hōho’a tei ni’a vau i te poti o tō’u pāpā rū’au. E mea au nā’u taua vāhi ra nō te mea e mana’o fātata i te Vārua tē tae mai, i te hitira’a mahana iho ā rā ’e ’aore rā i te tapera’a mahana. E au ra e fāri’i au i te fa’aurura’a ’e e tae mai tō’u mau mana’o maita’i roa a’e i reira.

Macey M., 16 matahiti, Texas, Marite

’Imi i te taime ’ōtahi

Te vāhi maita’i roa a’e nō’u nō te feruri ’o te taime ïa ’o vau ana’e. Tē feruri noa nei au i te mau taime ato’a, i roto i te hāpura’a vai ’e ’aore rā i te hō’ē vāhi hau mai te fare i roto i tā’u tuatāpapara’a pāpa’ira’a mo’a. E tere au nā ni’a i te pere’o’o ta’ata’ahi, ’e i te tahi taime e fa’aro’o vau i te tahi podcast Mai, pe’e mai. Tē fa’ata’a nei au i te taime ’o vau ana’e nō te pārahi i roto i te nātura he’euri ’e nō feruri ato’a ho’i i reira.

Grant R., 14 matahiti, Texas, Marite