Te ’a’ara’a nō te tī

I te hō’ē mahana tau to’eto’e, tē haere ra vau nā roto i te ’āua o te fare ha’api’ira’a ’e tō’u mau hoa ’o Alice ’e ’o Trevor ’a ’ite ai mātou i te hō’ē tāpa’o i pāpa’ihia : « ’Ua ineine te mau hāpaina tī i teienei. » Ma te ’oa’oa rahi, ’ua parau ’o Trevor ē nāna e ho’o mai i te hō’ē hāpaina tī nā mātou tāta’itahi. ’Ua pāhono atu vau, « ’Eiaha, māuruuru maita’i ».

E pūpū noa ’o Trevor i te tī nā’u i te mau mahana ato’a, ’e ’ua tāmau noa vau i te fari’i ’ore. I te pae hope’a, ’ua ui mai ’oia iā’u nō te aha vau e ’ore ai e inu i te tī. ’Ua parau atu vau iāna nō ni’a i te Parau pa’ari, ma te ti’aturi ē, e māramarama ’oia. ’Ua huri rā ’oia i te reira ’ei parau hō’atara’a rahi. ’Ua tāmata ’oia i te tūra’i iā’u ’ia ’ōfati au i te Parau pa’ari.

« E ’ere i te ravera’a rā’au ta’ero », ’ua parau ’oia. « ’E ’ere i te mea ’ino hō’ē hāpaina tī ! »

I te hepetoma i muri mai, ’ua ha’amata ’oia ’e tōna mau hoa i te fa’ao’ō’o ’ino roa iā’u. ’Ua tāmata vau i te ’ore e ha’amā, noa atu ē, e ’ere i te mea ’ōhie.

I te roara’a o te tau, ’ua ’oto rāua nō tā rāua mau ’ohipa ’ino ’e ’ua fa’aea rāua i te fa’ao’ō’o mai iā’u. I te hō’ē mahana, ’ua parau mai tō’u ’orometua ha’api’i iā’u ē : « ’Ua riro noa ’oe ’ei hi’ora’a nō tō ’oe fa’aro’o ’e tā ’oe ha’apa’ora’a fa’aro’o. Tē fa’ahiahia nei au ia ’oe. »

Tē fa’ahiahia ato’a nei au iā’u. E ’ere ho’i i te mea ’ōhie, ’ua ’ite rā vau ē, e ha’amaita’ihia vau nō te ha’apa’ora’a i tā’u mau fa’aturera’a.

Nicolé M., West Midlands, Peretāne