Niu pāpū

Te ’itera’a i te ’oa’oa i roto i te tāvinira’a pehe

Fa’ahōho’ara’a nā Emily Jones

’Ua ha’amata vau i te mau ha’api’ira’a piāna i te hitura’a o tō’u matahiti. I te ha’amatara’a, e mea fifi ’ia tai’o i te mau nota pehe ’e ’ia ha’apa’o maita’i i te roara’a o tā’u mau ha’api’ira’a. ’Aita roa atu vau i au i te ha’api’ipi’i i te piāna.

I muri iho, ’ua ani mai tō’u māmā iā’u ’ia ha’uti « Le jour de mon baptême » (Chants pour les enfants, 53) i tō’u bāpetizora’a. ’O te taime mātāmua ïa ’a ha’uti ai au i te fare purera’a. ’Ua taiā ri’i au, terā rā, tē ha’apeu nei au iā’u iho i tō’u ravera’a i te reira.

’Aita i maoro roa, ’ua me’ume’u tā’u ’ohipa i te fare ha’api’ira’a ’e ’ua hina’aro vau e fa’aru’e i te piāna, terā rā, ’ua fa’aitoito tō’u nā metua iā’u ’ia tāmau noa i te ha’api’i. ’Ua parau rātou ē, mai te mea e tāmau noa vau i te ha’uti, e ’itehia iā’u te ’oa’oa i roto i te tāvinira’a i te Fatu.

Mai taua taime ra, e mea au nā’u ’ia ha’uti i te piāna. ’Ua ha’amata vau i te ha’uti i roto i te purera’a ’ōro’a, ’e i te 12ra’a o tō’u matahiti, ’ua pi’ihia vau ’ei fa’ata’i piāna nō te pāroita. ’Ua ’oa’oa roa vau ! ’Ua ha’uti au i roto i te mau fa’a’ite’itera’a a te Paraimere ’e ’ua ’āpe’e atu vau i tā mātou pupu hīmene pāroita i roto i te mau ’āmuira’a ’e te mau purera’a. ’Ua pi’i-ato’a-hia vau ’ei fa’ata’i piāna pupu hīmene nō te titi ’e ’ua ha’uti ato’a ho’i i roto i te ’āmuira’a titi.

Tē māuruuru nei au i tō’u nā metua i tō raua fa’aitoitora’a mai iā’u ’ia rave au ’e ’ia maita’i roa atu ā te reira. E māuruuru roa atu vau ē a muri noa atu i te Metua i te ao ra nō te tārēni tāna i hōroa mai nō’u. ’Ua ’ite au ē, e ti’a ia’u ’ia fa’a’ohipa i tā’u mau tārēni nō tā’u misioni ’e i roto i te tahi atu ā tāvinira’a, i te hō’ē mahana. E ’oa’oa pāpū mau tō’u i te tāvinira’a i te Fatu.

Jyle S., Tuha’a fenua nō National Capital, Firipino