« Tā tātou ’euhe ’ia riro ’ei māramarama », Nō te Pūai o te Feiā ’Āpī, Tēnuare 2023
Mai, pe’e mai
Tā tātou ’euhe ’ia riro ’ei māramarama
’O Iesu Mesia te māramarama o te ao nei. E rave ana’e tātou i te mau mea ato’a e nehenehe ia tātou nō te fa’a’ite i tōna māramarama
’Ua haere mai te naho’a ta’ata nā te mau vāhi ato’a nō te hi’o i te ta’ata i roto i te medebara tei ’ō’omo i te ’ahu i hāmanihia i te rouru o te kamela ’e ’ua ’amu i te mau ’arape ’e te meri. ’Ua ’ana’anatae rātou i te fa’aro’o i tāna mau ha’api’ira’a nō ni’a i te Fa’aora, te tātarahapa ’e te bāpetizora’a. I muri a’e i tō rātou fa’aro’ora’a iāna, e rave rahi ta’ata tei hina’aro ’ia bāpetizohia. ’Ua bāpetizo ’oia i te feiā tei tātarahapa. Te i’oa o teie ta’ata, ’o Ioane Bāpetizo ïa.
I te hō’ē mahana, ’a bāpetizo ai Ioane i te ta’ata i roto i te ’ānāvai Ioridana, ’ua haere mai Iesu Mesia ’e ’ua ani ’ia bāpetizohia ’oia. ’Ua māere ’o Ioane. ’Ua ’ite ’o Ioane ē, ’ua ha’apa’o māite Iesu i te mau fa’auera’a a te Atua ’e ’aita i tītauhia iāna ’ia tātarahapa. ’Oia mau, ’ua mana’o ’oia ē, nā Iesu e bāpetizo iāna (hi’o Mataio 3:14) ! ’Ua fa’ata’a Iesu ē ’ua fa’aue te Atua i te mau ta’ata ato’a ’ia bāpetizohia, nō reira ’ua tītau-ato’a-hia iāna ’ia bāpetizohia nō te fa’a’ite i te hō’ē hi’ora’a. ’Ua fāri’i Ioane ’e ’ua bāpetizo ia Iesu i roto i te ’ānāvai Ioridana.
Tē ha’api’i nei te bāpetizora’a o Iesu ia tātou ē, ’ia bāpetizo-ato’a-hia tātou e ti’a ai. I tō ’outou bāpetizora’ahia, ’ua rave ’outou i te hō’ē fafaura’a ’e ’ua fa’a’ite i tō ’outou hina’aro ’ia pe’e i te hi’ora’a o te Fa’aora, ’eiaha i tō ’outou noa bāpetizora’a, i te mau taime ato’a rā.
Te mau fafaura’a ’e te mau rāve’a
I te bāpetizora’a, e rave ’outou i te hō’ē fafaura’a ’e te Atua ’e e fafau ’outou e rave i ni’a ia ’outou i te i’oa o Iesu Mesia (hi’o Mosia 5:8–10). E fafau ato’a ’outou ’ia ha’apa’o i tāna mau fa’auera’a, ’ia ti’a ’ei ’ite nō te Atua « i te mau taime ato’a ’e nō te mau mea ato’a, ’e i roto i te mau vāhi ato’a » (Mosia 18:9), ’e e tāvini iāna (hi’o Mosia 18:8–10 ; Te Ha’api’ira’a Tumu ’e te mau Fafaura’a 20:37).
I te mau hepetoma ato’a i te fare purera’a, e fa’a’āpī ’outou i teie fafaura’a ’a rave ai ’outou i te ’ōro’a mo’a (hi’o Te Ha’api’ira’a Tumu ’e te mau Fafaura’a 20:77, 79). « ’Ia haere māite ’outou i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua e te ta’ata ato’a » (2 Nephi 31:20).
I ni’a i te ’ē’a, e rave rahi tā ’outou mau rāve’a nō te pe’e i te hi’ora’a o te Fa’aora e nō te fa’a’ite i tō ’outou here iāna ’e i te feiā ’ati a’e ia ’outou. ’Ua parau ’o Elder Jeffrey R. Holland nō te pupu nō te Tino ’Ahuru Ma Piti ’āpōsetolo ē : « Tē vai nei tō tātou mau ta’ata tupu e ha’amaita’i, te mau tamari’i e pāruru, te feiā veve e fa’ateitei, ’e te parau mau e pāruru. Tē vai ra tā tātou mau hape e fa’a’āfaro, te mau parau mau e fa’a’ite, ’e te maita’i e rave. ’Ei ha’apotora’a, tē vai ra tō tātou orara’a ’ei ti’ara’a pipi e hōro’a. »1
Hō’ē māramarama nō te feiā nava’i ’ore
Tō tātou hi’ora’a maita’i roa, ’oia ho’i te Fa’aora, ’ua here ’oia ’e ’ua tāvini noa ho’i ia vetahi ’ē ’e ’ua « hāmani maita’i haere » (Te ’Ohipa 10:38).
I roto i te mau tau fifi, ’o Iesu Mesia te māramarama ’o tē « ’ana’ana mai nei i roto i te pōiri » (Ioane 1:5). ’Ua ha’api’i ato’a mai ’oia ia tātou ’ia riro ’ei māramarama. ’Ua parau ’oia, « Inaha, ’o vau nei te māramarama tā ’outou e fa’ateitei atu i ni’a—te mea tā ’outou i ’ite iā’u i te ravera’a » (3 Nephi 18:24).
’Ei tuha’a nō tā ’outou fafaura’a nō te bāpetizora’a, ’ua ’euhe ’outou ’ia « hina’aro ’outou ’ia amo te tahi i tā te tahi mau hōpoi’a, ’ia māmā te reira » ’e ’ia « ’oto ’a ’oto ai te feiā ’oto ra […] ’e ’ia tāmāhanahana ia rātou ’o tē au ’ia tāmāhanahanahia » (Mosia 18:8–9).
’Ia fārerei ana’e ’outou i te tahi ta’ata o te ’oto ’aore rā e paruparu ra, penei a’e paha e mea faufa’a ’ia ’ite ē nāhea ’ia tauturu. I te tahi rā taime, ’aita ’outou i ’ite e aha te parau ’aore rā, e rave. I roto i te reira mau taime, e nehenehe noa ā ’outou e ’īriti i tō ’outou ’ā’au. E nehenehe ’outou e fa’aro’o ia rātou ’e e pāturu ia rātou.
’A here ’e ’a tāvini ai ’outou ia vetahi ’ē, e tupu te māramarama o te Fa’aora i te ’ana’ana i roto ia ’outou ’e e tūrama ho’i i te ’ē’a i mua ia ’outou. E ’ume ato’a mai te reira ia vetahi ’ē o tē ’imi nei i te māramarama o te Fa’aora. Nā roto i te haere-tāmau-ra’a i mua ’e te ha’apa’ora’a i te mau ’euhe tā ’outou i rave i te bāpetizora’a, e ’ite ’outou e rave rahi rāve’a e nehenehe ai ia ’outou ’ia ha’amaita’i ’e ’ia fa’a’ana’ana atu ā i teie ao.